Kasi Baibolo Lingamovwirani Kumarana na Suzgo Lakutondeka Kukhala Makora Para Mundagwiliskire Ntchito Munkhwala Wakutimbanizga Wongo?

Chaka chilichose ŵanthu mamiliyoni ghanandi ŵakufwa chifukwa cha kugwiliskira ntchito uheni munkhwala wakupambanapambana kusazgapo na mitundu yinyake ya munkhwala wakukanizgika. Mu nyengo ya muliri wa COVID-19 iyi, ndipo suzgo ili lafika paheni chomene. Ulongozgi wavinjeru wa mu Baibolo wawovwira ŵanandi kumarana na suzgo ili. Para namwe mukulimbana na suzgo lakuyana waka, mbwenu Baibolo lingamovwirani chomene.a

Mu nkhani iyi

Chifukwa wuli tikwenera kupenja wovwiri mu Baibolo kuti timarane na suzgo ili?

Ŵanthu awo ŵakufufuza icho chikupangiska ŵanthu kwamba kugwiliskira ntchito munkhwala wakutimbanizga wongo ŵakuti kanandi chikupangiska ni phukwa, kusuzgika maghanoghano, na kwenjerwa. Baibolo lingamovwirani kuti muŵe na chipulikano icho chingamovwirani kutonda masuzgo agho ghangamupangiskani kuti mwambe kugwiliskira ntchito munkhwala wakutimbanizga wongo. Baibolo likutisambizga ivyo tingachita kuti tiŵe paubwezi wakukhora na Chiuta. (Salimo 25:14) Ivi vingamovwirani kuti mulimbane na masuzgo agho ghakuwoneka kuti pamwekha palije icho mungachitapo.—Mariko 11:22-24.

Vinthu vinayi vya mu Baibolo ivyo vingamovwirani kutonda suzgo ili

1. Mumanyani makora Yehova Chiuta.b (Yohane 17:3) Iyo ni Mlengi kweniso Chisimi cha nkhongono zambura mphaka. Kuluska apa, iyo ni Dada winu wa chitemwa. Iyo wakukhumba kuŵa namwe paubwezi kweniso kumovwirani na nkhongono zake. (Yesaya 40:29-31; Yakobe 4:8) Nakuti chikuru imwe mwasankha kupulikira ulongozgi wake wachitemwa, iyo wakulayizga kuti wamusungirani munthazi muwemi chomene.—Yeremiya 29:11; Yohane 3:16.
2. Pemphani wovwiri kwa Yehova. Lombani kwa Chiuta na kumupempha kuti wamovwirani kutonda suzgo la kugwiliskira ntchito munkhwala wakutimbanizga wongo mwakuti muŵe “ŵatuŵa, na ŵakuzomerezgeka kwa Chiuta.” (Ŵaroma 12:1) Iyo wamupaninge “nkhongono zakuluska zakawiro” kwizira mu mzimu wake utuŵa. (2 Ŵakorinte 4:7; Luka 11:13) Nkhongono ya mzimu utuŵa yimovwiraninge kuti mutonde suzgo la kugwiliskira ntchito munkhwala wakutimbanizga wongo na kuvwara “wunthu uphya” uwo ukukolerana na khumbo la Chiuta.—Ŵakolose 3:9, 10.
3. Zuzgani maghanoghano ghinu na fundo za Chiuta. (Yesaya 55:9) Iyo wamovwiraninge kuti muzgoke “ŵaphya mu kaghanaghaniro kinu,” ivyo vingamovwirani kuti mutonde suzgo linu. (Ŵaefeso 4:23) Maghanoghano gha Chiuta ghakusangika mu Baibolo, ntheura ntchakuzirwa chomene kuti muliŵerengenge nyengo zose. (Salimo 1:1-3) Ŵanandi ŵapindura chomene chifukwa cha kovwirika na kupulikiska fundo za mu Baibolo. (Milimo 8:30, 31) Ŵakaboni ŵa Yehova ŵakujipeleka kusambizga Baibolo kwa ulere. Tikumupemphani kuti mwize ku maungano ghithu, ndipo pa maungano agha tikusanda ivyo Baibolo likuyowoya kweniso umo tingalondezgera fundo zake pa umoyo withu.
4. Sankhani ŵabwezi ŵawemi. Ŵabwezi ŵinu ŵakukhwaska chomene nkharo yinu, ŵangamovwirani kuti chiŵe chipusu kumarana na suzgo ili, panji kumutondeskani. (Zintharika 13:20) Chiuta wakutovwira kusanga mabwezi ghawemi pakati pa ŵanthu awo ŵakumusopa, ndipo wakukhumba kuti namwe musange chandulo na ŵabwezi aŵa. (Salimo 119:63; Ŵaroma 1:12) Mukwenera kuŵaso maso pa nkhani ya vyakusanguluska, chifukwa vikuŵa waka nga kuti muli paubwezi na ŵanthu awo mukutemwa kuwonelera mavidiyo ghawo, kupulikizga sumu zawo, panji mabuku agho ŵakulemba. Kanani chilichose icho chingamupangiskani kuti chimuŵireni chakusuzga kuchita icho ntchiwemi.—Salimo 101:3; Amosi 5:14.

Mavesi gha mu Baibolo agho ghangamovwirani kumarana na suzgo ili

Salimo 27:10: “Nanga adada na amama ŵanganisida, Yehova wanitorenge.”

“Nkhaŵamanyanga yayi adada ŵakunibaba, ivi vikanipangiskanga kujipulika kuti nkhusoŵekera chinthu chinyake. Nkhati namanya Yehova Chiuta na kwamba kumuwona wanadi kwa ine kweniso kuti wakunitemwa, nkhamba kuwona kuti umoyo ngwakuzirwa ndipo nkhamarana nalo suzgo la kugwiliskira ntchito munkhwala wakutimbanizga wongo.”—Wilby, wa ku Haiti.

Salimo 50:15: “Unicheme mu nyengo ya suzgo. Nikuthaskenge.”

“Kanandi waka, lemba ili likanipanga nkhongono kuti nilutilire kulimbana na suzgo ili, nangauli nyengo zinyake nkhatondekanga. Yehova wakasunga layizgo lake.”—Serhiy, wa ku Ukraine.

Zintharika 3:5, 6: “Uthembenge Yehova na mtima wako wose, ungagomezganga pa kapulikiskiro kako yayi. Mu mendero ghako ghose maso ghako ghaŵe kwa iyo, ndipo wakunyoloskerenge nthowa zako.”

“Lemba ili likanovwira kuti nileke kujithemba, kweni nithembenge Yehova. Na wovwiri wake, nkhasanga nkhongono zakuti nisinthirethu umoyo wane.”—Michele, wa ku Italy.

Yesaya 41:10: “Ungawopanga yayi, pakuti nili nawe. Ungenjerwanga chara, pakuti ndine Chiuta wako. Nikukhozgenge, enya, nikovwirenge, nikukolenge na woko lane lamalyero laurunji.’”

“Para nakhala waka kwambura kugwiliskira ntchito munkhwala wakutimbanizga wongo, nkhasuzgikanga chomene maghanoghano. Lemba ili likanovwira kukhorwa kuti Chiuta wanovwirenge kutonda suzgo lane, ndipo ndivyo wakachita nadi.”—Andy, wa ku South Africa.

1 Ŵakorinte 15:33, mazgu ghamusi: “Mungapuluskikanga yayi. Mendezgano ghaheni ghakunanga nkharo yiwemi.”

“Ŵabwezi ŵane ndiwo ŵakapangiska kuti nambe kugwiliskira ntchito munkhwala wakutimbanizga wongo. Nkhamarana na suzgo ili nati naleka kwendezgana nawo na kusanga mabwezi ghaphya agho ghakaŵa na nkharo yiwemi iyo nkhadokeranga.”—Isaac, wa ku Kenya.

2 Ŵakorinte 7:1: “Tiyeni tijitozge ku ukazuzi wose wa thupi na wauzimu.”

“Mazgu agha ghakanichiska kuti nilutilire kuŵikapo mtima kutozga thupi lane na kuleka kugwiliskira ntchito munkhwala wakutimbanizga wongo kweniso vinthu ivyo vikaŵikanga umoyo wane pa ngozi.”—Rosa, wa ku Colombia.

Ŵafilipi 4:13: “Mu vinthu vyose, nkhusanga nkhongono mwa uyo wakunipa nkhongono.”

“Nkhamanya kuti panekha nkhaŵavya nkhongono zakutondera suzgo ili, ntheura nkhalomba kwa Chiuta kuti wanovwire. Iyo wakanipa nkhongono izo nkhakhumbikwiranga nadi.”—Patrizia, wa ku Italy.

Nkhani izo zikachitika nadi: Kumarana na suzgo la kugwiliskira ntchito munkhwala wakutimbanizga wongo na wovwiri wa mu Baibolo

Joseph Ehrenbogen wakakulira ku malo agho kukatemwanga kuŵa vyachiwawa ndipo wakamba kumwa moŵa chomene, kukhweŵa hona, chamba na heroin. Maulendo ghanandi waka, wakakhala pachoko kufwa. Nkhani yimoza ya mu Baibolo yikamovwira kuti wakhorwe kuti wangasintha. Ŵazgani nkhani yake ya mutu wakuti, “Nkhasambira Kuchindika Ŵanakazi Kweniso Kujichindika Nekha.”

Dmitry Korshunov wakasuzgika chomene kuti watonde suzgo lake la kumwa chomene moŵa. Wonelerani vidiyo ya mutu wakuti, ‘Nkhavuka na Nkharo Yane Yawakawaka’ kuti muwone icho chikamovwira kutonda suzgo lake.

Kasi Baibolo likukanizga kupokera wovwiri wa ku chipatala para munthu wali na suzgo ili?

Yayi. Baibolo likuti: “Ŵanthu awo ŵali makora ŵakukhumbikwira dokotala chara, kweni ŵalwari ndiwo.” (Mateyu 9:12) Mwakuyana waka, wupu wa U.S. National Institute on Drug Abuse ukuti: “Para munthu wakutondeka kukhala makora usange wandagwiliskire ntchito munkhwala wakutimbanizga wongo ni suzgo likuru, ndipo kuti munthu watonde suzgo ili wakwenera kujipata kweniso kujikora chomene.” Mbunenesko kuti wovwiri uwo Chiuta wakutipa ukuluska khumbo ilo munthu wangaŵa nalo lakuti waleke. Kweni nipera, ŵanandi awo ŵakatonda suzgo ili na ulongozgi wa mu Baibolo ŵakakhumbikwirangaso wovwiri wa ku chipatala.c Mwachiyelezgero, mwanalume munyake zina lake Allen wakuti: “Apo nkhalimbananga na suzgo la kumwa chomene moŵa, nkhapulikanga vyakuŵinya chomene. Apa ndipo nkhawamo kuti nkhwenera kupempha wovwiri wa ku chipatala padera wa wovwiri wauzimu uwo nkhasambiranga mu Baibolo.”

Kasi Baibolo likukanizga kugwiliskira ntchito munkhwala?

Yayi. Nakuti Baibolo likuyowoyapo vya kugwiliskira ntchito moŵa pa kuchizgira ulwari panji kuchepeska ulwilwi wa munthu uyo wali pafupi kufwa. (Zintharika 31:6; 1 Timote 5:23) Ndipouli, nga umo vikuŵira na moŵa, munkhwala unyake uwo ukovwira kuchepeska ulwilwi nawo ungapangiska munthu kutondeka kukhala makora para wandamwe panji kuwugwiliskra ntchito. Ntheura ntchakuzirwa chomene kuti timanyenge uheni uwo ungaŵapo para tikugwiliskira ntchito munkhwala wakuchepeska vyakuŵinya uwo ŵa chipatala ŵangatipa.—Zintharika 22:3.

a Nangauli nkhani iyi yikuyowoya chomene vya kutonda suzgo la kugwiliskira ntchito munkhwala wakutimbanizga wongo, kweni fundo za mu Baibolo izo zilimo zingawovwiraso awo ŵakulimbana na masuzgo ghanyake nga uloŵevu, kukhweŵa hona, kurya chomene, kutchova njuga, kuwonelera vyamuziro, panji kugwiliskira ntchito chomene intaneti.

b Yehova ni zina leneko la Chiuta. (Salimo 83:18) Wonani nkhani yakuti “Kasi Yehova Ni Njani?”

c Mungasanga wovwiri ku malo ghakupambanapambana, nga ku vipatala, na mawupu ghanyake agho ghakovwira ŵanthu awo ŵali na suzgo ili. Waliyose wakwenera kusanda ivyo wangachita na kusankha yekha wovwiri wa chipatala wakwenelera.—Zintharika 14:15.