MUŴENGE MASO!

Nkhaza za Kulasana na Futi Zazara Chomene pa Charu Chose—Kasi Baibolo Likutipo Wuli?

YASONO: April 27, 2023

Nkhani za kulasana na futi zikulutilira kuchitika mu vyaru vinandi pa charu chose. Wonani ivyo manyuzipepara ghalemba mwasonosono apa.

“Ku US chiŵelengero chakukomana chikukwera chomene chaka chilichose, mwakuti sabata yiliyose pakuŵa nkhani yakuti munthu munyake walasika na futi.”—April 21, 2023, The Guardian.
“Ŵanthu 10 ŵa mu banja limoza ŵakakomeka panyengo yimoza mwakulasika na futi ku South Africa. Pa ŵanthu aŵa, 7 ŵakaŵa ŵanakazi ndipo munyake wakaŵa munyamata wa vyaka 13.”—April 21, 2023, AP News.
“Munthu uyo wakaŵa na futi ku Germany wakakoma ŵanthu 6 pa Nyumba ya Ufumu ya Ŵakaboni ŵa Yehova ku Hamburg. Ndipo pamanyuma munthu uyu wakajikoma yekha.”—March 10, 2023, Reuters.

Baibolo likupembuzga awo ŵakusuzgika chifukwa cha masuzgo nga ni agha. Kuti muwone vyakuchitika vyanadi, wonelerani vidiyo ya mutu wakuti, DeJanerio Brown: Wakafyenyeka Kweni Wakasoŵerathu Pakukora Yayi.

Kweniso Baibolo likutovwira kumanya chifukwa icho pakuchitikira masuzgo ghanadi. Kuti mumanye vinandi pa nkhani iyi wonelerani vidiyo ya mutu wakuti Chifukwa Wuli Chiuta Walekelera Uheni na Suzgo?

Mu mwezi wa July 2022, nkhaza za kulasana na futi zikachitika mu vyaru vinandi chomene:

“Nkhani ya kukomeka kwa wa ndyali wakumanyikwa chomene ku Japan [Shinzo Abe, uyo wakaŵa Nduna Yakale] yikazizika ŵanthu ŵanandi chomene pa charu chose. Vili nthena chifukwa chakuti charu cha Japan chili kuŵika malango ghakukhwima chomene pa nkhani yakuŵa na futi, ndipo ni viŵi yayi kuti ŵanthu ŵapalamurenge milandu yanthena iyi.”—July 10, 2022, The Japan Times.
“Ŵanthu ŵa ku Denmark ŵakazizwa chomene kupulika nkhani yakuti munthu walasa na kukoma ŵanthu ŵatatu mu sitoro yinyake yakuchemeka Copenhagen shopping mall.”—July 4, 2022, Reuters.
“Ku South Africa: Kagulu ka ŵanthu kakaluta pa malo ghanyake ghakumwera moŵa mu tawuni ya Soweto na kwamba kulasa ŵanthu na futi ndipo ŵanthu 15 ŵakafwa.”—July 10, 2022, The Guardian.
“Ŵanthu ŵakujumpha 220 ŵakomeka ku United States, pa chiŵembu cha kulasana na futi icho chikachitika pa nyengo iyo ŵanthu ŵakondweleranga holide pa July 4.”—July 5, 2022, CBS News.

Kasi pali chigomezgo chakuti nkhaza za kulasana na futi zizamumara? Kasi Baibolo likuti wuli?

Nkhaza Zizamumara

Baibolo likuti tikukhala mu “mazuŵa ghaumaliro,” nyengo iyo ŵanthu ŵazamuŵa ŵakofya, ŵankhaza, na ŵa mtima wauchinyama. (2 Timote 3:1, 3) Vinthu vyankhaza ivyo vikuchitika vikupangiska kuti ŵanthu ŵakhalenge mwawofi. (Luka 21:11) Kweni Baibolo likulayizga kuti sonosono apa nkhaza zimarenge ndipo ŵanthu “ŵakhalenge mu malo gha mtende, mu malo gha bata na malo gha chimango.” (Yesaya 32:18) Kasi nkhaza zizamumara wuli?

Chiuta wazamuwuskapo ŵanthu ŵaheni na kuparanya vyankhondo vyose.

“Ŵaheni ŵadumulikenge mu charu chapasi.”—Zintharika 2:22.
“[Chiuta] wakulekeska nkhondo pa charu chose chapasi. Wakuphyora uta na kuswa mkondo. Wakotcha na moto magileta ghankhondo.”—Salimo 46:9.

Chiuta wazamusambizga ŵanthu umo ŵangakhalira mwamtende ndipo ivi vizamumazga nkhaza zose.

“Vizamupwetekana chara panji kuparanyana mu phiri lane lose lituŵa, chifukwa charu chapasi chizamuzura na kumanya Yehova nga umo maji ghakuzuzgira nyanja.”—Yesaya 11:9.
Nanga ni sono nthena, Chiuta wakusambizga ŵanthu pa charu chose kuti ŵaleke kuchitako nkhaza na kugwiliskira ntchito vilwero. Wakuchita nthena pakuŵasambizga kuti ‘ŵaskane malupanga ghawo kuŵa vyakulimira, na mikondo yawo kuŵa vyakuphatilira makuni.’—Mika 4:3.

Kuti mumanye vinandi vyakukhwaskana na ivyo Baibolo likulayizga pa nkhani ya nyengo iyo tizamukhalanga kwambura wofi mu charu, ŵerengani nkhani yakuti, “Kodi N’zotheka Kukhala Mopanda Mantha?”

Kuti mumanye vinandi pa nkhani ya icho chizamovwira kuti nkhaza zimalirethu pa charu, ŵerengani nkhani yakuti, “Mtendere Udzabweradi Padziko Lapansi!”