Chifukwa Wuli Ndyali Zikugaŵaniska Ŵanthu?—Kasi Baibolo Likuti Wuli?

Ndyali zikugaŵaniska ŵanthu pa charu chose chapasi. Lipoti linyake la Pew Research Center ilo likachitika mu 2022 mu vyaru vyakupambanapambana 19, likati “ŵanthu ŵalaraŵalara 65 pa ŵanthu 100, ŵakazomerezga kuti ndyali zikupangiska ŵanthu awo ŵakulondezga vipani vyakupambanapambana kuti ŵapindanenge na kugazgana.”

Asi namwe ndimo mukuwonera kuti uko mukukhala ŵanthu mbakugaŵikana chifukwa cha ndyali? Chifukwa wuli ŵanthu ŵakugaŵikana? Kasi pali nthowa yakumazgira suzgo ili? Wonani ivyo Baibolo likuyowoya.

Ivyo vikupangiska ŵanthu kugaŵikana

Baibolo likayowoyerathu kuti mu nyengo yithu yino, iyo yikumanyikwa kuti “mazuŵa ghaumaliro,” ŵanthu ŵanandi ŵazamulongora nkharo izo zikupangiska kuti chiŵe chakusuzga kukolerana.

•  “Mu mazuŵa ghaumaliro kuzamuŵa nyengo zinonono na zakusuzga. Pakuti ŵanthu ŵazamuŵa ŵakujitemwa, . . . ŵakujiŵikamo.”—2 Timote 3:1-3.

Nangauli ŵanthu ŵanandi ŵakuyezgayezga kuti maboma ghendeskenge makora vinthu, kweni ivi ndivyo vikuchitika yayi. Ŵanthu awo ŵakuŵa ku chigaŵa chakususka vikuŵaŵira vyakusuzga chomene kugwilira lumoza ntchito na boma kuti ŵamazgire lumoza masuzgo. Ntheura ivyo vikuchitika ndivyo Baibolo likayowoyerathu kale chomene kumasinda.

•  “Munthu wakuwusa munyake na kumupweteka.”—Mupharazgi 8:9.

Kweni Baibolo likuyowoya ivyo vingamazga masuzgo agha. Likuyowoya za boma lakulongozgeka na munthu munyake ilo lizamumazga masuzgo agho ŵanthu ŵakukumana nagho.

Mulongozgi muwemi uyo wakupwelelera vya ŵanthu

Baibolo likuzunura vya mulongozgi muwemi uyo wazamumazga masuzgo agha, uyo ni Yesu Khristu. Yesu wali na nkhongono, mazaza, kweniso ngwakukhumbisiska kuti ŵanthu ŵaŵe ŵakukolerana kweniso pa mtende.

• “Mu mazuŵa ghake ŵarunji ŵazamutikitira, ndipo kuzamuŵa mtende wakuzara.”—Salimo 72:7.

•  “Mitundu yose yizamumuteŵetera.”—Salimo 72:11.

Yesu ni mulongozgi muwemi chifukwa wakughanaghanira waliyose ndipo ngwakukhumbisiska kovwira ŵanthu, chomenechomene awo ŵakuchitilika vinthu vyambura urunji.

• Wazamuchitira chitima wakuyuyuka na mukavu, ndipo wazamuponoska umoyo wa ŵakavu. Wazamuŵathaska ku kuyuzga na nkhaza.”—Salimo 72:12-14.

Manyani vinandi vyakukhwaskana na Ufumu wa Chiuta, boma lakuchanya ilo mulongozgi wake ni Yesu. Sambirani umo mungasangira phindu kweniso umo mungakhozgera muwuso wake.

•  Wonelerani vidiyo ya mutu wakuti, Kasi Ufumu wa Chiuta Ni Vichi?

•  Ŵerengani nkhani yakuti, “Ufumu wa Chiuta ni Boma Lambura Vimbundi.”