Kasi Vingachitika Kuti Ŵanthu ŵa Mitundu Yose Ŵachitiranenge Vinthu Mwakuyana Waka?—Kasi Baibolo Likuti Wuli?

Ŵanthu ŵanandi ŵakuwona kuti vingachitika yayi kuti ŵanthu ŵa mitundu yakupambanapambana ŵachitirenge lumoza vinthu.

•  “Kusankhana mitundu ni suzgo la pa charu chose, likuwonekera chomene pa umo mawupu ghakuchitira vinthu, ndiposo umo ŵanthu ŵakupambana mitheto ŵakuchitira vinthu vya zuŵa na zuŵa. Kusankhana mitundu kwapangiska ŵanthu kuti ŵachitiranenge vinthu vyambura urunji.”—António Guterres, UN Secretary-General.

Kasi vingachitika kuti ŵanthu ŵakupambana mitundu ŵaŵe ŵakukolerana? Kasi Baibolo likuti wuli?

Umo Chiuta wakuwonera pa nkhani yakusankhana mitundu

Baibolo likutisambizga umo Chiuta wakuwonera ŵanthu ŵamitundu yakupambanapambana.

•  “[Chiuta] wakalenga mitundu yose ya ŵanthu kufuma mwa munthu yumoza kuti yikhale pa charu chose chapasi.”—Milimo 17:26.

•  “Chiuta wakutemwera yayi. Kweni wakupokelera munthu wa mtundu uliwose uyo wakumopa na kuchita urunji.”—Milimo 10:34, 35.

Baibolo likuyowoya kuti ŵanthu wose mphaubali, ndipo Chiuta wakupokelera ŵanthu ŵa mitundu yose.

Umo kusankhana mitundu kuzamumalira

Kusankhana mitundu kuzamuŵako yayi mu Ufumu wa Chiuta, uwo ni boma lakuchanya. Mu Ufumu uwu ŵanthu ŵazamusambizgika kuti ŵachitiranenge vinthu mwakwenelera. Ndipo ŵanthu ŵazamusambira umo ŵangamazgira maghanoghano ghaheni pa nkhani ya kusankhana mitundu.

•  ‘Awo ŵakukhala mu charu ŵazamusambira urunji.’—Yesaya 26:9.

•  “Mu urunji wenecho muzamufuma mtende, ndipo chipambi cha urunji wenecho ni bata na chimango muyirayira.”—Yesaya 32:17.

Mazuŵa ghano, ŵanthu mamiliyoni ghanandi ŵakusambira Baibolo ndipo ŵakuwona umo ŵangachitira vinthu na ŵanji mwantchindi.

•  Kuti mumanye vinandi, ŵerengani magazini gha Wukani! yakuti “Kasi Chilipo Icho Chingamazga Sankho?”

•  Ŵerengani nkhani yakuti “Kudumbiskana na Ŵana Vyakukhwaskana na Kusankhana Mitundu” na kuwona umo ŵapapi ŵangachitira kuti ŵadumbiskane nkhani iyi na ŵana ŵawo.