Kasi Baibolo Likuzomerezga Nthengwa za Ŵanthu Ŵakupambana Mtundu?

Ivyo Baibolo likuyowoya

Chiuta wakuzomerezga kutorana na munthu wa mtundu unyake chifukwa iyo wakuwona kuti mitundu yose yikuyana waka. Baibolo likuti: “Chiuta wakutemwera yayi . . . , wakupokelera munthu wa mtundu uliwose.”—Milimo 10:34, 35.

Wonani ivyo Baibolo likuyowoya pa nkhani ya mitundu yose kweniso kutorana na munthu wa mtundu unyake.

Mitundu yose ya ŵanthu yili kufuma kwa munthu yumoza

Ŵanthu wose ŵali kufuma kwa Adamu na muwoli wake Eva. Pakuyowoya za Eva, Baibolo likuti ndiyo ni “nyinawo wa ŵamoyo wose.” (Genizesi 3:20) Lekani Baibolo likuti Chiuta “wakalenga mitundu yose ya ŵanthu kufuma mwa munthu yumoza.” (Milimo 17:26) Nangauli ŵanthu ŵangapambana mitundu kweni wose ŵali kufuma kwa munthu yumoza. Kasi mungachita wuli usange uko mukukhala ŵanthu ŵakusankhana mtundu?

Ŵanthu ŵa vinjeru “ŵakupenja ulongozgi”

Nangauli Chiuta wakuzomerezga kutorana na munthu wa mtundu unyake, kweni ŵanthu ŵanyake ŵakukana. (Yesaya 55:8, 9) Usange mukukhumba kutorana na munthu wa mtundu unyake, wonani fundo zakulondezgapo izi:

• Kasi muchitenge wuli usange uko mukukhala panji ŵamubanja linu ŵakukana?

• Kasi ŵana ŵinu muzamuŵawovwira wuli pa nkhani ya kusankhana mtundu?

Usange ‘mupenjenge ulongozgi’ pa nkhani iyi vimovwiraninge kuti nthengwa yinu yende makora.—Zintharika 13:10; 21:5.