Ŵasayansi Ŵaguzirako Kunthazi Nyengo Yakulongora Kuti Umaliro wa Charu Uli Pafupi—Kasi Baibolo Likuti Wuli?

Pa January 24, 2023, ŵasayansi ŵali kuguzirako kunthazi nyengo yakulongora kuti umaliro wa charu ichi uli pafupi iyo ŵakuyichema kuti Doomsday Clock.a Nyengo iyi ŵayiguzirako kunthazi kuti yifike 12 koloko usiku, kung’anamura kuti charu chapasi chakhala pachoko chomene kumara.

•  “Nyengo iyo ŵakuti ‘Doomsday Clock’ iyi yikwimira vinthu vyakofya ivyo ŵanthu ŵakupanga ndipo vingapangiska kuti ŵajiparanye ŵekha. Pa Chiŵiri, ŵasayansi ŵakayiguzira kufupi chomene nyengo iyi kuti yifike 12 koloko usiku kuluska umo yikaŵira kumanyuma kose. Ŵakachita nthena chifukwa cha vinthu ivyo vikuchitika mu charu nga ni nkhondo iyo yikuchitika ku Ukraine, kofya kwa nkhondo ya nyukiliya iyo yingachitika, kweniso chifukwa cha masuzgo gha kusintha kwa nyengo.”—AFP International Text Wire.

•  “Pa Chiŵiri, ŵasayansi ŵali kuvumbura kuti nyengo yakuchemeka ‘Doomsday Clock’ ŵali kuyiguzirakoso kunthazi mwakuti pasono kwakhala waka masekondi 90 kuti yifike 12 koloko usiku kulongora kuti ŵanthu ŵali pafupi chomene kufika pa aramagedoni.”—ABC News.

•  “Gulu la ŵasayansi lakufuma mu vyaru vyakupambanapambana likuchenjezga ŵanthu kuti umoyo wawo uli pangozi chomene kuluska kumanyuma kose uku.”—The Guardian.

Kasi umaliro wa ŵanthu na charu chapasi uli pafupi chomene? Kasi tikwenera kuchita wofi na ivyo vichitikenge munthazi? Kasi Baibolo likuti wuli?

Kasi Vinthu Viŵenge Wuli Munthazi?

Baibolo likuti: “Charu chapasi chikukhalilira muyirayira” ndipo ŵanthu “ŵazamukhala mwenemumo muyirayira.” (Mupharazgi 1:4; Salimo 37:29) Ntheura ŵanthu ŵazamuparanya yayi charu chapasi.

Ndipouli Baibolo likuyowoyapo za umaliro. Mwachiyelezgero, likuyowoya kuti “charu chikuluta.”—1 Yohane 2:17.

•  Kuti mumanye vinandi pa ivyo Baibolo likuyowoya vyakukhwaskana na umaliro wa charu, ŵerengani nkhani ya mutu wakuti: “Kasi Charu Chili Pafupi Kumara? Kasi Mazgu Ghakuti Chivumbuzi Ghakung’anamura Vichi?”

•  Kuti mumanye ivyo Baibolo likuyowoya pa nkhani ya ivyo vichitikenge munthazi, ŵazgani nkhani ya mutu wakuti, “Kasi Charu Chizamumara Pawuli?”

Lutilirani kuwona vinthu mwakwenelera

Baibolo lingatovwira kuti tiwonenge vinthu mwakwenelera nangauli pasono mu charu muli masuzgo ghanandi. Lingatovwira wuli?

•  Baibolo likutipa ulongozgi wakovwira. (2 Timote 3:16, 17) Mwachiyelezgero, ŵazgani nkhani yakuti “Ivyo Mungachita Kuti Muleke Kwenjerwa” na kuwona umo Baibolo lingamovwilirani kuti muwonenge vinthu mwakwenelera nangauli mungasangana na masuzgo.

•  Baibolo likutiphalira vinthu vyanadi ivyo vichitikenge munthazi. (Ŵaroma 15:4) Likulongosora makora ivyo vikuchitika sono kweniso munthazi ndipo vingatovwira kuti tilutilire kuwona vinthu mwakwenelera nangauli mu charu mukuchitika viheni vinandi.

Kuti mumanye vinandi kufuma mu Baibolo, tikumupemphani kuti mwambe kosi yakusambira Baibolo kwaulere.