Masacizgo

Umo Mungambiskira Masambiro gha Baibolo pa Cisulo Cakwamba mu Seputembala

“Ŵanthu ŵanandi ŵakugomezga kuti dazi linyake Ciuta wazamweruzga ŵanthu kuyana na milimo yawo. Kasi imwe mukughanaghana kuti Zuŵa la Ceruzgo ndakofya panji ndiwemi? [Mulekani wazgore.] Wonani ivyo nkhani iyi yikuyowoya.” Mupani Gongwe la Mulinda la Seputembala 1, na kudumbiskana kamutu kakwamba pa peji 16. Ŵazganipo lemba. Mulekerani magazini na kupangana kuti mukawereso kuzakazgora fumbo lakulondezgapo.

Gongwe la Mulinda Seputembala 1

“Mu vigaŵa vinandi pa caru capasi ŵanakazi ŵakuŵasura na kuŵacitira nkhaza. Cacitima nchakuti vigomezgo vya visopa navyo vikusazgirako suzgo ili. Kasi mukughanaghana kuti Ciuta wakuŵikako Mahara ku ŵanakazi? [Mulekani wazgore.] Wonani ivyo Baibolo likuphalira ŵafumu kuti ŵacitirenge ŵawoli ŵawo. [Ŵazgani Ŵaefeso 5:28, 29.] Magazini iyi yikulongosora umo Yehova wakuwonera ŵanakazi.”

Galamukani! Seputembala

“Ŵanandi ŵakughanaghana kuti caru cizamumara zuŵa limoza na mabomba gha nyukiliya panji masoka gha cilengiwa, nga nkhusintha kwa nyengo. Kasi mukughanaghana kuti uwu mbunenesko, panji ni maghanoghano waka? [Mulekani wazgore.] Baibolo likutipembuzga na layizgo ili. [Ŵazgani Salmo 37:29.] Magazini iyi yikulongosora ivyo ŵanthu ŵanandi ŵakughanaghana pa nkhani ya umaliro wa caru na ivyo Baibolo likuyowoya.”