Kututuka kwa Maji uko Kukunanga Vinthu—Kasi Baibolo Likuti Wuli?

Pa charu chose ŵanthu ŵanandi ŵakusuzgika na kututuka kwa maji ndipo vinthu vinandi vikunangika. Wonani malipoti ghakulondezgapo agha:

• “Mwasonosono apa, msumba ukuru wa charu cha China ukapokera vula yikuru chomene kuluska vyaka 140 ivyo vyajumpha. Chivula chikuru chomene (mamilimita 744.8) chikamba kulokwa pa Chisulo m’paka kufika pa Chitatu.”—AP News, August 2, 2023.

• “Chimphepo chankhongono chakuchemeka Khanun chikiza na chivula chankhongono cha kumwera kwa Japan pa Chinayi ndipo chikakoma ŵanthu ŵaŵiri. . . . Chimphepo ichi chikiza na chivula chankhongono (mamita 0.6) ku chigaŵa cha mapiri ku Taiwan.”—Deutsche Welle, August 3, 2023.

• “Chivula chankhongono icho chikalokwa, chikapangiska kututuka kwa maji [ku Nova Scotia] ndipo kututuka kwa maji kwa nthena uku kundachitikepo ku chigaŵa cha Atlantic Canada kwa vyaka 50 ivyo vyajumpha.”—BBC News, July 24, 2023.

Kasi Baibolo likuti wuli pa vyakuchitika nga ni ivi?

Chimanyikwiro cha “mazuŵa ghaumaliro”

Baibolo likuti tikukhala mu nyengo iyo yikuchemeka kuti “mazuŵa ghaumaliro.” (2 Timote 3:1) Yesu wakayowoyerathu kuti mu nyengo yithu iyi “kuzamuwoneka vyakofya,” panji kuti vinthu vyakofya chomene. (Luka 21:11) Kusintha kwa nyengo ndiko kukupangiska masuzgo agha, ndipo ghakuchitika chomene kweniso pafupipafupi ndipo chikuŵa chakusuzga kumanya.

Chifukwa icho tingaŵira na chigomezgo

Baibolo likuti vinthu vinandi vyakofya ivyo vikuchitika pa charu mazuŵa ghano vikutipa chifukwa chakuŵira na chigomezgo. Chifukwa wuli? Yesu wakayowoya kuti: “Para mukuwona vinthu ivi vikuchitika, manyani kuti Ufumu wa Chiuta uli pafupi.”—Luka 21:31; Mateyu 24:3.

Ivyo vikuchitika pasono vikulongora kuti Ufumu wa Chiuta uli pafupi kunozga vinthu pa charu chapasi kusazgapo umo vula yikulokwera kuti vinthu vileke kunangika.—Yobu 36:27, 28; Salimo 107:29.

Kuti mumanye vinandi pa nkhani ya umo Ufumu wa Chiuta uzamunozgera vinthu pa charu chapasi, wonani nkhani ya mutu wakuti “Ninjani Waponoskenge Charu Ichi?”