Pachanya kumazere: Marek M. Berezowski/Anadolu Agency via Getty Images; pasi kumazere: Halfpoint Images/Moment via Getty Images; pakati: Zhai Yujia/China News Service/VCG via Getty Images; pachanya kumalyero: Ismail Sen/Anadolu Agency via Getty Images; pasi kumalyero: E+/taseffski/via Getty Images
MUŴENGE MASO!
2023: Chaka Icho Ŵanthu Ŵasuzgika Chomene Maghanoghano—Kasi Baibolo Likuti Wuli?
Mu chaka cha 2023 icho chajumpha vyakuchitika pa charu chose vikalongolerathu kuti tili mu nyengo iyo Baibolo likuti ni “mazuŵa ghaumaliro.” (2 Timote 3:1) Wonani umo ivyo vikuchitika pasono vikufiskira ivyo Baibolo likayowoyerathu kuti vizamuchitika mu nyengo yithu iyi.
Ivyo Baibolo likuyowoya na ivyo vikuchitika pa charu chose
“Zinkhondo na malumbiri gha zinkhondo.”—Mateyu 24:6.
“Viwawa na nkhondo vikusazgikira mu malo ghanandi pa charu chose.”a
Wonani nkhani ya mutu wakuti “Ni Njani Waponoskenge Ŵanthu?” na yakuti “Vyaru Vikusakaza Ndalama Zakujumpha Madola 2 Tiliriyoni pa Nkhani ya Vyankhondo.”
“Kuzamuŵa vindindindi mu malo na malo.”—Mariko 13:8.
“Kwambira waka kukwambilira kwa chaka cha 2023, pa charu chose pachitika vindindindi vikuruvikuru 13, (ukuru wake kujumpha 7 magnitude). Aka nkhakwamba kuti mu chaka chimoza pera muchitike vindindindi vinandi nthena.”b
Wonani nkhani ya mutu wakuti “Chindindindi Chakofya Chachitika ku Turkey na Syria—Kasi Baibolo Likuti Wuli?.”
“Kuzamuwoneka vyakofya.”—Luka 21:11.
Mulembi mukuru wa UN António Guterres wakayowoya kuti: “Pasono kotcha kwafika paheni chomene kuluska umo vikaŵira kumanyuma kose uku.”c
Wonani nkhani ya mutu wakuti “Kotcha Kwafika Paheni Chomene pa Charu mu 2023—Kasi Baibolo Likuti Wuli?.”
“Kuzamuŵa njara.”—Mateyu 24:7.
“Njara mu chaka cha 2023 yangusuzga chomene ndipo changuŵa chakusuzga ku ŵanthu ŵanandi kusangira chakurya mbumba zawo.”d
Wonani nkhani ya mutu wakuti “Gwang’wang’wa Wasuzga pa Charu Chose Chifukwa cha Nkhondo kweniso Kusintha Kwanyengo.”
“Nyengo zinonono na zakusuzga.”—2 Timote 3:1.
“Pa charu chose, munthu yumoza pa ŵanthu 8 wali na suzgo la maghanoghano.”e
Wonani nkhani ya mutu wakuti “Suzgo la Kusuzgika Maghanoghano kwa Ŵachinyamata Lafika Paheni Chomene—Kasi Baibolo Likuti Wuli?.”
Kasi tikwenera kukhazga vichi mu chaka cha 2024?
Palije uyo wakumanya umo vinthu viŵirenge mu chaka cha 2024. Kweni ivyo vikuchitika pa charu chapasi vikulongora kuti sonosono apa Ufumu wa Chiuta panji kuti boma lakuchanya ndiwo unjirenge mu malo mwa maboma ghose gha ŵanthu ndipo uzamumazga vyose ivyo vikupangiska kuti ŵanthu ŵasuzgikenge.—Daniyeli 2:44; Chivumbuzi 21:4.
Kweni pa nyengo yasono para tasuzgika maghanoghano tikwenera kulaŵiska kwa Chiuta kuti watovwire. Baibolo likuti:
“Para nawopa, nkhuthemba imwe.”—Salimo 56:3.
Kasi tingalongora wuli kuti tikugomezga Chiuta? Tikumupemphani kuti mumanye vinandi pa ivyo Baibolo likulayizga kuti masuzgo kuzamuŵavya. Yezgani kosi yithu ya kusambira Baibolo kwaulere kuti mumanye umo imwe na banja linu mungasangira chandulo na ivyo Baibolo likulayizga.
a Foreign Affairs, “A World at War: What Is Behind the Global Explosion of Violent Conflict?” by Emma Beals and Peter Salisbury, October 30, 2023.
b Earthquake News, “Year 2023: Number of Major Earthquakes on Course for Record,” May, 2023.
c United Nations, “Secretary-General’s Opening Remarks at Press Conference on Climate,” July 27, 2023.
d World Food Programme, “A Global Food Crisis.”
e World Health Organization, “World Mental Health Day 2023,” October 10, 2023.