Kasi Nkhondo ya Aramagedoni Yizamwambira ku Israyeli?—Kasi Baibolo Likuti Wuli?

Baibolo likulongosora kuti nkhondo ya Aramagedoni yizamuchitikira mu chigaŵa chimoza yayi, kweni yizamuŵa nkhondo ya pa charu chose iyo yizamuchitika pakati pa maboma gha ŵanthu na Chiuta.

• “Mazgu gha viŵanda . . . ghakuluta ku mathemba gha charu chose, kuŵawunganyira wose pamoza ku nkhondo ya zuŵa likuru la Chiuta Wankhongonozose. . . . ghakaŵawunganyira wose pamoza ku malo agho mu Chihebere ghakuchemeka Aramagedoni.”—Chivumbuzi 16:14, 16.

Lizgu lakuti “Aramagedoni” lili kufuma ku lizgu Lachihebere lakuti Har Meghid·dohnʹ, ilo likung’anamura “Phiri la Megido.” Megido ukaŵa msumba uwo ukaŵako mu nyengo ya Ŵaisrayeli. Pa chifukwa ichi ŵanthu ŵanyake ŵakugomezga kuti nkhondo ya Aramagedoni yamuchitikira ku Israyeli. Kweni chigaŵa cha Megiddo panji malo ghaliyose ku Middle East ngakukwana yayi kuti “mathemba gha charu chose” na ŵasilikari ŵawo ŵawunganeko pamoza.

Buku la Chivumbuzi likalembeka mu “vimanyikwiro.” (Chivumbuzi 1:1) Aramagedoni ni zina la malo gheneko yayi, kweni ni ivyo vizamuchitika apo mitundu yose pa charu chapasi yizamuwungana kaumaliro kuti yilimbane na Chiuta.—Chivumbuzi 19:11-16, 19-21.