Chifukwa Wuli Ŵanthu Ŵakutinkhana Chomene?—Kasi Baibolo Likuti Wuli?

Mazuŵa ghano mu manyuzipepara mukuzura waka malipoti gha vinthu viheni ivyo ŵanthu ŵakuyowoya kweniso vinthu vyankhaza ivyo ŵanthu ŵakuchitira ŵanyawo chifukwa cha sankho.

• “Pasono ndipo ŵanthu ŵakuyowoyerana vinthu viheni chomene mu manyuzipepara kweniso pa intaneti chifukwa cha nkhondo iyo yikuchitika pakati pa Israel na Gaza, kweniso ivi vikuchitika chifukwa chakuti ŵanthu ndiwo ŵakuchochozera panji kusongerezga viwawa na thinkho.”—The New York Times, November 15, 2023.

• “Pa November 3, 2023, Dennis Francis uyo ni pulezidenti wa United Nations General Assembly wakayowoya kuti: “Kufuma waka pa 7 October ŵanthu ŵakuyowoyerana mazgu ghaheni chomene kweniso kuchitirana nkhaza chifukwa chakuti sankho yasazgikira chomene kuluska kumanyuma kose.”

Mazgu gha thinkho, nkhaza na nkhondo ni vyachilendo yayi. Mwakuti Baibolo likulongosorapo za ŵanthu awo “ŵakudinika mazgu ghawo ghankhaza nga ni mivi” na kukhuŵilizga nkhondo na vinthu vyankhaza. (Salimo 64:3; 120:7; 140:1) Kweni Baibolo likutiphalira kuti thinkho ilo tikuliwona mazuŵa ghano likwimira chinthu chinyake.

Thinkho Ntchimanyikwiro cha Mazuŵa Ghaumaliro

Baibolo likuzunura vifukwa viŵiri ivyo thinkho lazalira chomene mazuŵa ghano.

1. 1. Likayowoyerathu kuti mu mazuŵa ghaumaliro “chitemwa cha ŵanandi chizamuzizima.” (Mateyu 24:12) Ndipo m’malo mwakulongorana chitemwa, ŵanthu ŵakupanga vinthu ivyo vikupangiska ŵanthu kutinkhana.—2 Timote 3:1-5.

2. 2. Thinkho lazara chomene mazuŵa ghano chifukwa cha Satana Dyabulosi uyo wakukhuŵilizga chomene vinthu ivi. Baibolo likuyowoya kuti “charu chose chikugona mu nkhongono za muheni.”—1 Yohane 5:19; Chivumbuzi 12:9, 12.

Nangauli vili nthena, Baibolo likuyowoya kuti Chiuta wazamuwuskapo vyose ivyo vikwambiska thinkho. Kweniso chakuzirwa chomene ntchakuti wazamuwuskapo masuzgo ghose agho ghali kwiza chifukwa cha thinkho. Baibolo likulayizga kuti:

• Chiuta “wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya. Vinthu vyakale vyafumapo.”—Chivumbuzi 21:4.