Ŵanthu Ŵanandi Ŵaleka Kugomezga Ŵandyali—Kasi Baibolo Likuti Wuli?

Mu chaka cha 2024 mu vyaru vinandi pa charu chapasi muchitikenge mavoti. Nangauli vili nthena, kweni ŵanthu ŵanandi ŵataya chigomezgo mu ŵanthu ŵandyali.

• Kafukufuku mukuru uyo wakachitika ku America wakalongora kuti “ŵandyali ŵanandi ŵakujighanaghanira ŵekha” m’malo mwakughanaghanira ŵanthu.a—Pew Research Center, September 19, 2023.

Ŵachinyamata ŵanandi ŵakuŵagomezga yayi ŵandyali.

• “Ŵawukirano ŵanandi mazuŵa ghano ŵakuŵikapo mtima pa umo wangamazgira masuzgo agho ŵakukumana nagho. Kweni kafukufuku wakulongora kuti ŵandyali ŵakuŵikako mahara yayi ku masuzgo agho ŵawukirano aŵa ŵakusangana nagho.”—The New York Times, January 29, 2024.

• “Ŵachinyamata ŵakugomezga chomene ivyo ŵanthu ŵakuŵika pa intaneti kuluska ŵandyali.”—The Korea Times, January 22, 2024.

Kasi ŵandyali ŵangawovwira kuti kunthazi vinthu vizakaŵe makora? Kasi tikwenera kugomezga njani?

Ŵani maso na awo mungaŵagomezga

Ntchakuzirwa kuti ŵanthu ŵaŵenge maso na awo ŵakuŵagomezga. Baibolo likuti “munthu muzeleza wakugomezga mazgu ghalighose, kweni wakuchenjera wakulanguruka pa mendero ghake ghose.”—Zintharika 14:15.

• Wonani fundo izo zingamovwirani kuti mumanye usange ivyo mukuŵazga ni vyaunenesko panji yayi, ŵazgani nkhani ya mutu wakuti “Jivikilirani ku Nkhani Zautesi.”

Kweniso manyani kuti nanga ŵangaŵa ŵandyali awo ŵali na vilato viwemi, ŵangafiska yayi kuchita vyose ivyo ŵakhumbanga. Lekani Baibolo likuchenjezga kuti:

• “Ungathembanga ŵakaronga yayi panji mwana wa munthu, mweneuyo wangaponoska yayi.”—Salimo 146:3.

Mulongozgi wakugomezgeka

Baibolo likulongosora kuti Chiuta wali kwimika mulongozgi wakwenelera kweniso wakugomezgeka uyo ni Yesu Khristu. (Luka 1:32, 33) Yesu ndiyo ni Themba la Ufumu wa Chiuta, uwo ni boma ilo lizamulamulira kufuma kuchanya.—Mateyu 6:10.

• Wonani vifukwa ivyo mungagomezgera Yesu kweniso ivyo wazamuchita kuti wamazge masuzgo agho tikusangana nagho. Ŵazgani nkhani ya mutu wakuti “Kasi Fumu ya Ufumu wa Chiuta Ni Njani?” na yakuti “Kasi Ufumu wa Chiuta Uzamuchita Vichi?”