Kasi Mkhristu Wanadi Wakuŵa Wuli?—Kasi Baibolo Likuti Wuli?

Mazuŵa ghano ŵanthu ŵanandi ŵakujichema kuti Mbakhristu kweni ŵakuchita vinthu ivyo vikupweteka ŵanji. Ŵanyake mbakujighanaghanira waka ŵekha, ŵambura kugomezgeka kweniso ŵambura lusungu. Apo ŵanji mbambura kugomezgeka kwa munyawo wa munthengwa. Nkharo yawo yikupangiska ŵanji kujifumba kuti: ‘Kasi Mkhristu wanadi wakuŵa wuli?’

Umo Mkhristu wanadi wakwenera kuŵira

Ntchipusu kwa munthu kuyowoya kuti ndine Mkhristu. Kweni ntchakukwana yayi kuyowoya waka nthena. Mwakuyana na ivyo Baibolo likuyowoya, Mkhristu ni msambiri wa Yesu. (Milimo 11:26) Nanga ni Yesu mwenecho wakayowoya kuti: “Usange mukukhalilira mu mazgu ghane, ndimwe ŵasambiri ŵane nadi.” (Yohane 8:31) Ndipouli tikumanya kuti palije uyo wangalondezga Yesu mwakufikapo. Kweni uyo ni Mkhristu wanadi wakuŵikapo mtima kulondezga ivyo Yesu wakasambizganga pa umoyo wake. Wonani viyelezgero vyakulondezgapo ivi.

Ŵakhristu ŵakutemwana

Ivyo Yesu wakayowoya: “Nkhumupani dango liphya, lakuti mutemwanenge, nga umo ine namutemwerani, ndimo namwe mutemweranenge. Usange mukutemwana, wose ŵamanyenge kuti ndimwe ŵasambiri ŵane.”—Yohane 13:34, 35.

Ivyo Yesu wakachita: Yesu wakatemwanga munthu waliyose kwambura kuwona dankha uko wakufumira, panji kasangiro kake. Wakachizganga ŵalwari, kulyeska ŵanjara, kweniso wakapeleka nanga mbumoyo wake chifukwa cha ŵanji.—Mateyu 14:14-21; 20:28.

Umo Ŵakhristu ŵakwenera kuchitira: Ŵakhristu ŵakulongora kuti ŵakutemwa ŵanji para ŵakupako ŵanji, ŵakuŵa ŵambura sankho kweniso ŵakugowoka. Ŵakovwira ŵanthu awo ŵali mu suzgo ndipo ŵakujipata na chilato chakuti ŵawovwire ŵanji.—1 Yohane 3:16.

Ŵakhristu ŵakuyowoya unenesko

Ivyo Yesu wakayowoya: “Ine ndine . . . unenesko.”—Yohane 14:6.

Ivyo Yesu wakachita: Nyengo zose Yesu wakayowoyanga unenesko. Wakayowoyanga panji kuchita vinthu mwaukhuluku yayi kuti wapusike ŵanji. Iyo wakayowoyanga unenesko nanga vingaŵa kuti unenesko uwo umwiziskirenge masuzgo.—Mateyu 22:16; 26:63-67.

Umo Ŵakhristu ŵakwenera kuchitira: Ŵakhristu ŵakwenera kuŵa ŵatesi yayi. Ŵakupeleka msonkho, ŵakwiba yayi, ndipo mbakugomezgeka pa ntchito. (Ŵaroma 13:5-7; Ŵaefeso 4:28) Ŵakupusika ŵanthu yayi kuti ŵasange chandulo, ŵakwibira mayeso yayi panji kuteta pa mapepara ghawo ghakupenjera ntchito kuti ŵaŵalembe.—Ŵahebere 13:18.

Ŵakhristu ŵakuŵa ŵalusungu

Ivyo Yesu wakayowoya: “Zani kwa ine, imwe mose mukuphyoka na kunyekezgeka, ndipo nimupumuzganinge. Yeghani joko lane ndipo sambirani kwa ine, pakuti nili wakuzika na wakujiyuyura mu mtima, ndipo muzamupumuzgika. Chifukwa joko lane ndipusu na katundu wane ngwakupepuka.”—Mateyu 11:28-30.

Ivyo Yesu wakachita: Yesu wakaŵa wakufikirika kweniso wakuzika. Wakapokeleranga ŵana, kupembuzga ŵakusuzgika ndipo wakachindikanga ŵanji.—Mariko 10:13-15; Luka 9:11.

Umo Ŵakhristu ŵakwenera kuchitira: Ŵakhristu ŵakuyowoya makora na ŵanji, ŵakuyowoya mwaganyavu yayi nesi kuyowoya munthowa yiheni. (Ŵaefeso 4:29, 31, 32) Ŵakutemwa ŵanthu na kupenjerezga nthowa za umo ŵangaŵawovwilira.—Ŵagalatiya 6:10.

Ŵakhristu ŵakuŵa ŵakugomezgeka kwa mfumu panji muwoli wawo

Ivyo Yesu wakayowoya: “Icho Chiuta wagumanya pamoza munthu waleke kupatura.”—Mariko 10:9.

Ivyo Yesu wakachita: Nangauli Yesu wakatora yayi, kweni wakachiska ŵakutorana kuti ŵaŵenge wakugomezgeka munthengwa yawo. (Mateyu 19:9) Kweniso wakachenjezga za vinthu ivyo vingapangiska kuti nthengwa yimare.—Mateyu 5:28.

Umo Ŵakhristu ŵakwenera kuchitira: Ŵakhristu ŵakwenera kugega kuchita vinthu ivyo vikuyuyura nthengwa. (Ŵahebere 13:4) Ŵakutorana ŵakwenera kutemwana na kuchindikana.—Ŵaefeso 5:28, 33.