Umo Ŵakaboni ŵa Yehova Ŵakugwiliskira Ntchito Vyawanangwa Ivyo Ŵakupokera
Tikugwiliskira ntchito vyawanangwa ivi pa mulimo wakupharazga kweniso ntchito zinyake izo zikuchitika mu gulu lithu. Chilato chithu chikuru nkhovwira ŵanthu kuti ŵaŵe ŵasambiri ŵa Yesu Khristu.—Mateyu 28:19, 20.
Tikugwiliskira ntchito vyawanangwa ivi kuti tisambazge munthu yayi. Ise tilije ŵalara ŵa mpingo panji ŵaliska awo ŵakupokera malipiro ndipo Kaboni wa Yehova waliyose wakulipirika ndalama yayi chifukwa cha kupharazga nyumba na nyumba. Kweniso awo ŵakuteŵetera ku maofesi yithu gha minthavi na awo ŵakuteŵetera ku likuru lithu la pa charu chose, kusazgapo na ŵa mu Wupu Wakulongozga, wakupokera malipiro yayi.
Ntchito Zinyake Izo Tikuchita
Kupanga Mabuku: Chaka chilichose tikung’anamura, kupulinta, kutumizga, na kugaŵa Mabaibolo mamiliyoni ghanandi, ndipo palije uyo wakulipira kuti wapokere vinthu ivi. Kweniso vinthu ivyo vikusangika pa webusayiti yithu ya jw.org na pa JW Library app ni vya ulere ndipo tikusaskapo malonda yayi.
Kuzenga na Kunozga Malo Ghakusoperapo: Tikuzenga kweniso kunozga malo ghakusoperapo pa charu chose kuti ŵabali na ŵadumbu ŵithu ŵawe na malo ghawemi ghakuwunganapo kuti ŵalumbe Chiuta. Tikuzengaso maofesi ghithu kweniso ghakung’anamulirako mabuku. Ntchito yikuru yikuchitika na ŵateŵeti ŵakujipeleka, ndipo ivi vikovwira kuti tileke kunanga ndalama zinandi.
Umo Ntchito Yithu Yikwendera: Vyawanangwa ivyo ŵanthu ŵakupeleka mwakukhumba kwawo vikovwira pa ntchito izo zikuchitika ku likuru lithu la pa charu chose, ku maofesi gha minthavi, maofesi ghakung’anamulirako mabuku, kweniso ntchito zinyake izo ŵakuchita ŵateŵeti ŵanyake.
Kupharazga: Ŵakaboni ŵa Yehova wakupokera ndalama yiliyose yayi para ŵakupharazga uthenga uwemi panji para ŵakusambizga ŵanthu “mazgu gha Chiuta.” (2 Ŵakorinte 2:17) Ndipouli, nga umo vikaŵira na Ŵakhristu ŵakwambilira, ŵateŵeti ŵanyake ŵachoko waka awo ŵasambizgika ntchito zapadera, ndipo ŵakumalira nyengo yawo yinandi pakuchita ntchito yakupharazga, ŵakupika ndalama yichoko waka yakulipira nyumba yakuti ŵakhalengemo kweniso kulipilira vinthu vinyake vyakukhumbikwa pa umoyo.—Ŵafilipi 4:16, 17; 1 Timote 5:17, 18.
Kusambizga: Vyawanangwa ivyo ŵanthu ŵakupeleka mwakukhumba kwawo, vikovwiraso pakunozga maungano gha chigaŵa na gha dera. Mwakusazgirapo, tikupangaso vinthu vya kutegherezga waka kweniso mavidiyo gha nkhani za mu Baibolo. Kweniso tikuŵa na masukulu ghakusambizga ŵalara na ŵateŵeti ŵanyengozose kuti ŵachitenge makora milimo yawo.
Kovwira Para Kwachitika Masoka: Tikupeleka chakurya, maji, na malo ghakukhala kwa ŵabali na ŵadumbu awo ŵasangana na masoka. Vinthu ivi tikuchitira “awo mbamoza na ise mu chipulikano” pera yayi, kweni tikuchitiraso na awo Mbakaboni ŵa Yehova yayi.—Ŵagalatiya 6:10.