Kasi Ndalama Zakwendeskera Ntchito ya Ŵakaboni ŵa Yehova Zikufuma Nkhu?

Ntchito yithu yakupharazga yikwendeskeka na ndalama izo Ŵakaboni ŵa Yehova ŵakupeleka mwakukhumba kwawo.a Pa maungano ghithu pakuŵa mabokosi gha vyakupeleka, ndipo nthowa zinyake za umo tingapelekera vyawanangwa zikusangika pa webusayiti yithu pa chigaŵa chakuti Vyawanangwa. Munthu waliyose ni mwanangwa kupeleka ndalama zakovwira pa mpingo, panji pa ntchito yakupharazga iyo yikuchitika pa charu chose. Munthu wangasankhaso kupeleka ndalama zakuti zikawovwire pa ntchito zose ziŵiri.

Ŵakaboni ŵa Yehova ŵakupeleka chakhumi yayi panji kumuphalira munthu unandi wa ndalama izo wakwenera kupeleka. (2 Ŵakorinte 9:7) Pa maungano ghithu tikwendeska mbale ya zithero yayi, kulipiriska awo ŵiza pa maungano, kulipiriska kuti munthu wabatizike, pa nyifwa, pa ukwati, panji pa vyakuchitika vinyake. Kuti tisange ndalama, tikupanga bizinesi yayi, kuchita vikondwelero panji vinthu vinyake. Tikupharazga yayi mazina gha ŵanthu awo ŵapeleka vyawanangwa. (Mateyu 6:2-4) Ŵakaboni ŵa Yehova wakusaska malonda ghalighose yayi kwizira pa webusayiti panji mu mabuku ghawo.

Kuumaliro wa mwezi uliwose pa maungano, mpingo uliwose wa Ŵakaboni ŵa Yehova ukupharazga umo ndalama zikugwilira ntchito pa mpingo wawo kuti waliyose wamanye. Nyengo na nyengo ŵakuweleramo mu malipoti gha ndalama kuti ŵawoneseske kuti ndalama zikugwira ntchito mwakwenelera.—2 Ŵakorinte 8:20, 21.

Nthowa Zakupelekera Vyawanangwa

• Mabokosi gha vyawanangwa: Munthu wangapeleka ndalama panji cheki mu mabokosi gha vyawanangwa agho ghakuŵa pa Nyumba ya Ufumu, malo ghakuchitirapo Maungano kweniso kulikose uko Ŵakaboni ŵa Yehova ŵakupangira maungano.

• Kupeleka kwizira pa Intaneti: Mu vyaru vinandi mungaluta waka pa chigaŵa chakuti “Perekani ku Ŵakaboni ŵa Yehova” icho chili pa webusayiti yithu. Ndipo mungapeleka vyawanangwa vinu kwizira pa credit cards, debit cards, bank transfers, panji nthowa zinyake.b Ŵakaboni ŵanyake ‘ŵakuŵika kanthu padera’ mwezi uliwose kuti ŵakapeleke vyawanangwa vyawo kwizira pa nthowa zakupambanapambana izi.—1 Ŵakorinte 16:2.

  

• Vyawanangwa Vinyake Ivyo Mungapeleka: Nthowa zinyake zakupelekera vyawanangwa zikukhumbikwira kukumana dankha na ŵa vyamalango. Mu vyaru vinyake nthowa izi zikovwira kuti ŵaleke kuŵadumura msonkho. Nthowa izi zingawovwiraso para mwasangana na suzgo linyake nga ngozi panji nyifwa. Para mukukhumba kugwiliskira ntchito nthowa izo zili pasi apa pakupeleka vyawanangwa vinu, mungachita makora kudumbiskana na ofesi ya Ŵakaboni wa Yehova ya mu charu chinu kuti ŵamovwirani umo mungachitira:

  • maakaunti ya ku banki

  • inshuwaransi panji ndalama za penshoni

  • malo na nyumba

  • masheya

  • chuma icho chikhalenge para mwafwa

Kuti mumanye vinandi vya nthowa zakupelekera vyawanangwa izo zikusangika mu charu chinu, lutani pa webusayiti yithu pa chigaŵa chakuti, “Perekani ku Ŵakaboni ŵa Yehova.”