Kasi Charu Chizamumara Pawuli?

Ivyo Baibolo likuyowoya

Kuti timanye apo charu chizamumalira, chingaŵa makora kuti tipulikiske dankha umo Baibolo likugwiliskira ntchito mazgu ghakuti “charu.” Lizgu la Chigiriki lakuti koʹsmos, likung’anamulika kuti “charu,” ndipo kanandi likuyowoya za ŵanthu, chomenechomene awo ŵakukhala mwambura kukolerana na fundo za Chiuta na khumbo lake. (Yohane 15:18, 19; 2 Petrosi 2:5) Nyengo zinyake, lizgu lakuti koʹsmos likwimira vyakuchita vya ŵanthu.​—1 Ŵakorinte 7:31; 1 Yohane 2:15, 16.a

Kasi “umaliro wa charu” ni vichi?

Mazgu ghakuti “umaliro wa charu,” agho ghakusangika mu Mabaibolo ghanandi, ghangalembekaso kuti “umaliro wa mgonezi.” (Mateyu 24:3; Tumbuka bible) Mazgu agha ghakung’anamura kuparanyika kwa charu cheneko panji kuparanyika kwa ŵanthu wose yayi, kweni ghakung’anamura umaliro wa vyakuchitika vya mu charu.​—1 Yohane 2:17.

Baibolo likusambizga kuti “ŵaheni ŵazamudumulika” ndipo ŵanthu ŵaŵemi ŵazamukondwa na umoyo wamuyirayira pa charu. (Salimo 37:9-11) Ŵanthu ŵaheni ŵazamuparanyika pa “suzgo yikuru,” iyo yizamulongozgera ku nkhondo ya Aramagedoni.​—Mateyu 24:21, 22; Chivumbuzi 16:14, 16.

Kasi charu chizamumara pawuli?

Yesu wakati: “Palije munthu uyo wakumanya vya zuŵa na ora ilo, nanga mbangelo ŵakuchanya, nesi Mwana, kweni Adada pera ndiwo ŵakumanya.” (Mateyu 24:36, 42) Wakayowoyaso kuti charu chizamumara mwamabuchi, pa “ora ilo mukughanaghana kuti ndilo chara.”​—Mateyu 24:44.

Nangauli tikulimanya yayi zuŵa leneko panji ora, kweni Yesu wakatipa “chimanyikwiro,” panji kuti vyakuchitika, ivyo vikutovwira kumanya nyengo ya umaliro wa charu. (Mateyu 24:3, 7-14) Baibolo likuti nyengo iyi ni “nyengo yaumaliro,” na “mazuŵa ghaumaliro.”​—Daniyeli 12:4; 2 Timote 3:1-5.

Kasi chilipo icho chizamupona para charu chazakamara?

Enya. Charu icho tikukhalamo chizamuŵa kuti chichalipo, pakuti Baibolo likuyowoya kuti “chisezgekengepo chara pa malo ghake muyirayira swii.” (Salimo 104:5) Charu chizamuzura na ŵanthu awo Baibolo likuti: “Ŵarunji ŵazamuhara charu chapasi, ndipo ŵazamukhala mwenemumo muyirayira.” (Salimo 37:29) Chiuta wazamuwezgerapo vinthu ivyo wakakhumbanga pakwamba, vinyake ni ivi:

• Paradiso.​—Yesaya 35:1; Luka 23:43.

• Chivikiliro na umoyo uwemi.​—Mika 4:4.

• Ntchito yakukondweska na yakukhorweska ku wose.​—Yesaya 65:21-23.

• Matenda na uchekuru kuzamuŵavya.​—Yobu 33:25; Yesaya 33:24.