Kasi Ŵakaboni ŵa Yehova Ŵakuwuwona Wuli Mwambo wa Nyifwa?
Tikugomezga ivyo Baibolo likuyowoya pa nkhani ya nyifwa. Vinyake ni ivi:
Ntchiheni yayi kulira para mubali withu wafwa. Ŵasambiri ŵa Yesu ŵakaliranga para munthu uyo ŵakamutemwanga wafwa. (Yohane 11:33-35, 38; Milimo 8:2; 9:39) Lekani tikuwona kuti nyifwa ni nyengo ya chikondwelero yayi. (Mupharazgi 3:1, 4; 7:1-4) M’malo mwake, tikuwona kuti ni nyengo ya chitima.—Ŵaroma 12:15.
Ŵakufwa ŵakumanya kanthu yayi. Nangauli tili ŵamitundu na mitheto yakupambana, tikuchitako yayi mitheto yinyake iyo yikususkana na ivyo Baibolo likuyowoya. Chifukwa cha mitheto yinyake iyo yikuchitika pa nyifwa, ŵanthu ŵakugomezga kuti ŵakufwa ŵakumanya ivyo vikuchitika ndipo ŵangapweteka panji kovwira ŵamoyo. (Mupharazgi 9:5, 6, 10) Mitheto yinyake iyo tikuchitako yayi nkhugona pa nyifwa, kuvumba, kuphyera, kupeleka sembe ku ŵakufwa, kuthetelera ŵakufwa, na kuziŵizga. Tikuchitako yayi mitheto yose iyi chifukwa tikupulikira ivyo Baibolo likuyowoya kuti: “Fumanipo pakati pawo, ndipo. . . lekani kukhwaska chinthu chaukazuzi.”—2 Ŵakorinte 6:17.
Ŵakufwa ŵazamuwuka. Baibolo likuti ŵakufwa ŵazamuwuka ndipo nyifwa yizamuŵakoso yayi. (Milimo 24:15; Chivumbuzi 21:4) Pakuti tikugomezga kuti ŵakufwa ŵazamuwuka, tikulira mwakujumphizga yayi. Ŵakhristu ŵakale nawo ndimo ŵakachitiranga.—1 Ŵatesalonika 4:13.
Baibolo likuti tikwenera kujiyuyura. (Zintharika 11:2) Tikugomezga kuti pa nyifwa mphakulongolera ivyo tili navyo yayi, kwali ni ndalama panji masambiro. (1 Yohane 2:16) Iyi ni nyengo yakuti ŵanthu ŵakondwe yayi. Tikugura bokosi lakudura chomene yayi panji kuvwara malaya ghakuti ŵanthu ŵatiwone.
Tikuchichizga ŵanthu yayi kuti ŵalondezge ivyo tikuchita pa nyifwa. Tikulondezga fundo yakuti: “Chiuta wazamweruzga waliyose wa ise kuyana na ntchito zake.” (Ŵaroma 14:12) Ndipouli, para ŵanthu ŵatifumba ivyo tikugomezga, tikuŵalongosolera “mwakuzika ndiposo na ntchindi zikuru.”—1 Petrosi 3:15.
Kasi pa nyifwa ya Ŵakaboni ŵa Yehova pakuchitika vichi?
Malo: Ŵabali ŵa uyo wafwa ŵangasankha kuti nkhani ya nyifwa yikayowoyekere ku Nyumba ya Ufumu, ku nyumba kwawo, uko ŵakotchera thupi panji ku malaro.
Chisopo: Pakuyowoyeka nkhani iyo yikupembuzga awo ŵaferwa ndipo yikulongosora ivyo Baibolo likuyowoya pa nkhani ya nyifwa na chiwuka. (Yohane 11:25; Ŵaroma 5:12; 2 Petrosi 3:13) Ŵakuyowoyapo viwemi ivyo munthu uyo wafwa wakachitanga na ivyo ŵangasambirako.—2 Samuyeli 1:17-27.
Ŵangimba sumu izo fundo zake zikufuma mu Malemba. (Ŵakolose 3:16) Paumaliro ŵakupemphera.—Ŵafilipi 4:6, 7.
Vyakupeleka: Uyo wayowoya nkhani ya mu Baibolo tikumulipira yayi, kwali mphanyifwa panji kunyake. Kweniso pa maungano ghithu tikwendeska mbale ya zithero yayi.—Mateyu 10:8.
Awo ŵangiza: Awo Mbakaboni ŵa Yehova yayi ŵangiza ku Nyumba ya Ufumu kuzakaŵapo pa nkhani ya nyifwa. Vikuyana waka na umo tikuchitira pakusopa, waliyose ni mwanangwa kwiza.
Kasi Ŵakaboni ŵa Yehova ŵakuŵapo para muliska wa chisopa chinyake wakupharazga pa nyifwa?
Kaboni wa Yehova waliyose wakujisankhira yekha kuyana na njuŵi yake. (1 Timote 1:19) Kweni tikuchitako yayi vinyake ivyo tawona kuti vikupambana na Baibolo.—2 Ŵakorinte 6:14-17.