Munyamata wakuwona ŵanthu ŵakunjira mu Nyumba ya Ufumu

IVYO ŴACHINYAMATA ŴAKUFUMBA

Chifukwa Wuli Mukwenera Kuluta ku Nyumba ya Ufumu?

Ŵakaboni ŵa Yehova ŵakuŵa na maungano kaŵiri sabata yiliyose pa malo ghakusoperapo agho tikughachema kuti Nyumba ya Ufumu. Kasi pa Nyumba ya Ufumu pakuchitika vichi, ndipo mungasanga chandulo wuli para mungalutako?

Kasi pa Nyumba ya Ufumu pakuchitika vichi?

Pa Nyumba ya Ufumu tikusambira vinandi vya Yehova kwizira mu Baibolo. Maungano agho ghakuchitika pa Nyumba ya Ufumu ghangamovwirani kuti:

musambire unenesko wakukhwaskana na Chiuta.
mupulikiske ng’anamuro la vinthu ivyo vikuchitika mazuŵa ghano.
muŵe munthu muwemi.
kuti musange ŵabwezi ŵawemi.

Kasi mukumanya? Malo agho Ŵakaboni ŵa Yehova ŵakusoperako ghakuchemeka Nyumba ya Ufumu chifukwa ndiko kanandi ŵakudumbiskana vya Ufumu wa Chiuta.—Mateyu 6:9, 10; 24:14; Luka 4:43.

Chifukwa wuli mukwenera kuluta ku Nyumba ya Ufumu?

Tikusambira fundo izo zingamovwirani. Fundo za mu Baibolo izo tikusambira pa maungano gha Ŵakaboni ŵa Yehova zingamovwirani kuti ‘musange vinjeru.’ (Zintharika 4:5) Ivi vikung’anamura kuti Baibolo ndilo lingamovwirani kuti musankhenge makora vinthu pa umoyo winu. Lingamovwirani kuti musange mazgoro gha mafumbo ghakuzirwa agho mungajifumba nga ghakuti:

Pasi apa pali mitu yichoko waka ya nkhani izo tikusambira pa maungano ghithu kuumaliro wa Sabata:

Chifukwa Wuli Baibolo Ndilo Likwenera Kutilongozga?
Ni Nkhu Uko Mungasangako Wovwiri pa Nyengo ya Suzgo?
Ivyo Ufumu wa Chiuta Ukuchitira Sono.

“Zuŵa linyake munyane uyo tili mu kilasi lumoza wakiza ku maungano ghithu. Wakakhala pamoza na mbumba yithu, ndipo tikawonanga lumoza mabuku. Paumaliro wa maungano, wakaniphalira kuti wakakondwa chomene na fundo izo ŵanthu ŵakayowoyanga. Wakatiso ku tchalitchi kwawo ŵakusambira nthena yayi.”—Brenda.

Kasi mukumanya? Waliyose ngwakupokelereka ku Nyumba ya Ufumu, nakuti kulije zithero.

Mungakasanga ŵabwezi awo ŵangamukhozgani. Baibolo likuti chifukwa chimoza icho Ŵakhristu ŵakuwungana pamoza ntchakuti ‘ŵakhwimiskanenge.’ (Ŵahebere 10:24, 25) Tikukhala mu charu icho ŵanthu ŵakujighanaghanira waka ŵekha, ntheura tikukhozgeka chomene para tili na ŵabwezi awo ŵakutemwa Chiuta na kuleka kujighanaghanira ŵekha.

“Nyengo zinyake nkhukhuŵara ndipo nkhuvuka chomene, kweni para nafika pa Nyumba ya Ufumu nkhukhozgeka chomene na ŵanthu awo nkhuchezga nawo. Ndipo para maungano ghamara nkhuŵa wakukondwa kweniso wa nkhongono.”—Elisa.

Kasi mukumanya? Pa charu chose chapasi, pali mipingo ya Ŵakaboni ŵa Yehova yakujumpha 120,000, ndipo ŵakuwungana mu malo ghakujumpha 60,000. Pa avereji, chaka chilichose pakwenera kuzengeka Nyumba za Ufumu pafupifupi 1,500.a

Ivyo ŵanyinu ŵakuyowoya

“Apo nkhaŵa ku sekondare, munyane uyo tikaŵa kilasi limoza nkhamuchemera ku maungano, wakakondwa chomene kuwona kuti mu Nyumba ya Ufumu mukaŵa ŵanthu ŵa misinkhu yakupambanapambana ŵakusopera pamoza. Sonosono apa abwana ŵane ŵakiza ku Nyumba ya Ufumu, ŵakazizwa chomene kuwona kuti vinandi ivyo tikadumbiskananga vikafumanga mu Baibolo. Ŵakanikhozga chomene ndipo nkhamba kuwona kuti maungano ngakuzirwa chomene!”—Jessica.

“Nkhawona kuti maungano ghakunovwira kuti nileke kwenjerwa chomene na masuzgo gha zuŵa na zuŵa. Tikusambira umo tingaŵira ŵakukondwa, umo tingaŵira ŵanthu ŵawemi, na vinyake vinandi. Nyengo zose nkhukhozgeka na kusamphuskika para nkhufuma ku Nyumba ya Ufumu.”—Timothy.

“Mwanalume munyake uyo nkhamuchemera ku maungano wakati: ‘Nkhaluta ku maungano ghinu kuti nkhamupanikizgirani waka kuti ivyo mukugomezga ni vyautesi. Kweni paumaliro nkhawona kuti ivyo ine nkhugomezga ndivyo ni vyautesi!’ Wakakondwa chomene chifukwa chakuti Ŵakaboni ŵa Yehova ŵakaŵa ŵakufwatuka chomene. Wakati: ‘Nangauli takumana waka sono, kweni ivyo mwanichitira vikuŵa nga tikamanyana nikale chomene!’”—Jacob.

“Nyengo zinyake nkhatenge, ‘para maungano ghakumara waka, mbwe nkhuwera.’ Kweni para maungano ghali mukati, maghanoghano ghose agha ghakumara. Ndipo para maungano ghamara waka, mbwe nkhwamba kuchezga na ŵanthu, nkhujiluwira vyose ivyo naghanaghananga pakwamba. Kuŵavyenge maungano, mphanyi nilije ŵabwezi ŵawemi nthena.”—Madison.

a Kuti musange malo ghakuwunganako, lutani pa jw.org, “Maungano gha Mpingo gha Ŵakaboni ŵa Yehova” na kudofya pa “Malo Ghakufupi na Kwinu.”