IVYO ŴACHINYAMATA ŴAKUFUMBA
Chifukwa Wuli Nyengo Zose Nkhuyowoya Makora Yayi?
“Nyengo zinyake nkhuyowoya makora, kweni nyengo zinyake nkhuyowoya waka bwekakuko!”—James.
“Para nakhuŵara nkhuyowoya kwambura kughanaghanirapo, para nakondwa nkhuyowoya vinthu vyakuti ndivyo cha. Kuyowoya unenesko, palipose nkhubudiska waka.”—Marie.
Baibolo likuti: “Lulimi . . . ni moto” ndipo “kamoto kachoko waka kakubuska nkholongo yikuru!” (Yakobe 3:5, 6) Kasi kanandi ivyo ukuyowoya vikukuziyamo? Usange ni nthena, nkhani iyi yikovwirenge.
Chifukwa wuli nyengo zinyake nkhuyowoya makora yayi?
Ndise ŵakwananga. Baibolo likuti: “Tose tikukhuŵara nyengo zinandi. Usange munyake wakuleka kukhuŵara mu mazgu, uyu ni munthu wakufikapo.” (Yakobe 3:2) Ndise ŵakwananga lekani tikukhuŵara para tikwenda na kubudiska para tikuyowoya.
“Maghanoghano ghane ngakwananga, lulimi lwane nalo ndakwananga ntheura ntchipusu yayi kuleka kubudiska para nkhuyowoya.”—Anna.
Kuyowoya vinthu vinandi. Baibolo likuti: “Para mazgu nganandi, pakutondeka chara kuŵa ubudi.” (Zintharika 10:19) Kanandi munthu uyo wakuyowoya chomene chikuŵa chakusuzga kuti wategherezge para ŵanyake ŵakuyowoya, ndipo ivi vikupangiska kuti waleke kuyowoya makora kweniso wakukhuŵazga ŵanyake.
“Kanandi ŵanthu awo ŵakutemwa twakuyowoyayowoya pa gulu ndikuti ŵakumanya vinthu yayi. Yesu ni munthu muwemi chomene ndipo palije uyo wangayana nayo, kweni nyengo zinyake wakakhalanga chete.”—Julia.
Kuyowoya mazgu ghamsinjiro. Baibolo likuti: “Kayowoyero kawakawaka kali nga nkhulasa kwa lupanga.” (Zintharika 12:18) Mazgu ghamsinjiro ghakuŵinya chomene, ndipo ghakupangiska ŵanji kujipulika ŵawakawaka. Ŵanthu awo ŵakuyowoyera ŵanyawo msinjiro, ŵakutemwa kuyowoya kuti, “Nkhuchezgapo waka!” Para munthu wakuyowoyera ŵanyake msinjiro, tikwenera kuseka yayi. Baibolo likuti wuskaniko “kayowoyero kaheni, pamoza na uheni wose.”—Ŵaefeso 4:31.
“Nyengo zinyake nkhuchita vinthu mwamawara, nkhutemwa kusekeska ŵanthu ndipo kanandi vikunipangiska kuti niyowoyere msinjiro ŵanyane, nakuti paumaliro nkhujiziyamo.”—Oksana.
Kuyowoya vinthu viheni ivyo pamanyuma ukuzakadandawura navyo vikuyana waka na korugeti, para wafuma mbwenu kwamara
Kukorako ku mulomo
Ntchipusu yayi kukorako ku mulomo pakuyowoya, kweni Baibolo lingakovwira. Wona fundo zakulondezgapo izi.
“Yowoyani mu mtima winu, . . . na kukhala chete.”—Salimo 4:4.
Nyengo zinyake ntchiwemi kukhala waka chete. Laura wakati: “Umo nkhujipulikira para nathukira vikupambana na umo nkhujipulikira para pajumpha kanyengo. Para mtima wane wazika, nkhukondwa chomene kuti nindayowoye ivyo mphanyi nanguyowoya apo nanguthukira.” Kulindilirapo masekondi ghachoko waka vikovwira kuti uleke kuyowoya vinthu viheni ivyo wate uyowoyenge.
“Asi khutu likuyezga mazgu nga umo lulimi lukuchetera chakurya?”—Yobu 12:11.
Mafumbo agha ghangakovwira kughanaghanirapo pambere undayowoye kuti uleke kujiziyamo:
Kasi ni vyaunenesko? Ningayowoya wuli mwalusungu? Kasi ni vyakuti niyowoye nadi?—Ŵaroma 14:19.
Kasi ningajipulika wuli usange munyane ndiyo waniyowoyera nthena?—Mateyu 7:12.
Kasi vingalongora kuti nkhuchindika maghanoghano gha munyane?—Ŵaroma 12:10.
Kasi nili pa malo ghawemi ghakuti ningayowoya?—Mupharazgi 3:7.
“Muŵe ŵakujiyuyura na kuwona ŵanyinu kuti ŵakumuluskani.”—Ŵafilipi 2:3.
Ulongozgi uwu ukovwirenge kuti ughanaghanirenge viwemi ŵanyako kweniso kuti ukorengeko ku mulomo na kughanaghanirapo dankha pambere undayowoye. Nangauli ungaŵa kuti wayowoya kale mazgu ghakuŵinya, para ndiwe wakujiyuyura vikovwirenge kuti uphepiske. Ukwenera kuchita nthena mwaluŵiro! (Mateyu 5:23, 24) Ndipo ukwenera kusambirapo kanthu kuti uleke kuzakawerezgaso.