Chifukwa Wuli Yesu Wakuchemeka Mwana wa Chiuta?

Ivyo Baibolo likuyowoya

Nyengo zinandi Baibolo likuti Yesu ni “Mwana wa Chiuta.” (Yohane 1:49) Mazgu ghakuti “Mwana wa Chiuta,” ghakulongora kuti Chiuta ndiyo ni Mlengi panji kuti Chisimi cha vyamoyo vyose, kusazgapo Yesu. (Salimo 36:9; Chivumbuzi 4:11) Baibolo likuti Chiuta wakababa Yesu nga umo ŵanthu ŵakubabira ŵana yayi.

Baibolo likuti ŵangelo nawo ‘mbana ŵa Chiuta waunenesko.’ (Yobu 1:6) Likutiso munthu wakwamba, Adamu, wakaŵa “mwana wa Chiuta.” (Luka 3:38) Ndipouli, Baibolo likuti Yesu ni Mwana wakwamba wa Chiuta chifukwa ndiyo wakadankha kulengeka kweniso ndiyo yekha uyo wakalengeka mwakudunjika na Chiuta. Lekani Baibolo likuti Yesu ni Mwana wakutemweka wa Chiuta.

• Kasi Yesu wakakhalanga nadi kuchanya pambere wandize pa charu chapasi?

• Kasi Yesu wakachitanga vichi pambere wandize pa charu chapasi?

Kasi Yesu wakakhalanga nadi kuchanya pambere wandize pa charu chapasi?

Enya. Yesu wakaŵa chilengiwa chauzimu kuchanya pambere wandababike nga munthu pa charu chapasi. Yesu iyomwene wakati: “Nili kukhira kufuma kuchanya.”—Yohane 6:38; 8:23.

Chiuta wakalenga Yesu pambere wandalenge chilichose. Pakuyowoya vya Yesu, Baibolo likuti:

• “[Ngwakwamba] kubabika wa chilengiwa chose.”—Ŵakolose 1:15.

• “[Ndiyo] Chiuta wakamba kulenga.”—Chivumbuzi 3:14.

Yesu wakafiska uchimi uwo ukuyowoya vya munthu “uyo wakaŵako kufuma papo kale, mu mazuŵa ghakale chomene.”—Mika 5:2; Mateyu 2:4-6.

Kasi Yesu wakachitanga vichi pambere wandize pa charu chapasi?

Wakaŵa na udindo wapachanya chomene. Yesu wakayowoya za udindo uwu apo wakalombanga kuti: “Adada, nichindikani . . . na uchindami uwo nkhaŵa nawo pamoza na imwe pambere charu chindaŵeko.”—Yohane 17:5.

Wakawovwira adada ŵake kulenga vinthu vinyake vyose. Yesu wakagwiranga lumoza ntchito na adada ŵake “nga ni misiri.” (Zintharika 8:30) Pakuyowoya vya Yesu, Baibolo likuti: “Vinthu vinyake vyose vikalengeka kuchanya na pa charu chapasi kwizira mwa iyo.”—Ŵakolose 1:16.

Chiuta wakatuma Yesu kulenga chilichose kusazgapo ŵangelo, na vinthu vinyake ivyo viliko. (Chivumbuzi 5:11) Chiuta na Yesu ŵakachita vinthu mwakukolerana nga umo vikuŵira pakati pa munthu uyo wakulemba mapulani gha nyumba na uyo wakuzenga. Munyake wakulemba pulani ya nyumba ndipo misiri wakuyizenga.

Wakaŵa Mazgu. Baibolo likuti pambere Yesu wandaŵe munthu, wakaŵa “Mazgu.” (Yohane 1:1) Ivi vikulongora kuti Chiuta wakatumanga Yesu pakupeleka uthenga na ulongozgi ku ŵangelo.

Vikulongoraso kuti Chiuta wakatumanga Yesu kuti wayowoye na ŵanthu pa charu chapasi. Chiuta wakwenera kuti wakatumanga Yesu panji kuti Mazgu, kuti wapeleke ulongozgi kwa Adamu na Eva mu munda wa Edeni. (Genizesi 2:16, 17) Yesu wakweneraso ndiyo ni mungelo uyo wakalongozganga Ŵaisrayeli mu mapopa ndipo Ŵaisrayeli ŵakwenera kuti ŵakapulikiranga mazgu ghake.—Ekisodo 23:20-23.a