Kupeleka Wovwiri mu Nyengo ya “Zinkhondo na Malumbiri gha Zinkhondo”

Mu mazuŵa ghaumaliro agha, tikukhazga kuti tipulikenge vya “zinkhondo na malumbiri gha zinkhondo.” (Mateyu 24:6) Ndipouli, usange ŵabali ŵithu ŵasangana na masuzgo chifukwa cha nkhondo izi, ŵakupokera wovwiri wakukhumbikwira. Mu Lipoti Lakufuma ku Wupu Wakulongozga la 2022 #3 mukaŵa nkhani yakukhozga chomene yakukhwaskana na ntchito yakovwira ŵabali ŵithu ŵa kumafumiro gha dazi kwa Europe, chomene awo ŵakhwaskika na nkhondo ya ku Ukraine. Kasi ŵabali ŵithu ŵakovwirana wuli nanga vingaŵa kuti nkhondo yanunkha chapafupi waka? Kasi ntchito yakovwira ŵanji yakhozga wuli ŵabali ŵithu ku Ukraine?

Ivyo Vikukhumbikwa na Umo Vikupelekekera

Pa February 24, 2022, nkhondo yikamba ku Ukraine, Komiti Yakulongozga yikazomerezga kuti ndalama zinyake zigwire ntchito pakovwira ŵabali ŵithu ku Ukraine. Mwaluŵiro ofesi ya munthavi ya Ukraine yikamba kugura vinthu mu charu chenechichi na kuvitumizga ku ŵabali mwa kugwiliskira ntchito Makomiti 27 Ghakovwira Para Kwachitika Soka agho ghali kwimikika.

Padera pa ivi, ŵabali ku Likuru la Ŵakaboni ŵa Yehova pa Charu Chose ŵakamba kusanda wovwiri uwo ukukhumbikwa ku ŵabali ŵa ku Ukraine. Komiti Yakulongozga na Yakusindikizga ya Wupu Wakulongozga yikapempha Dipatimenti Yakugura Katundu ya pa Charu Chose kuti yigwire ntchito na ŵimiliri ŵa ofesi ya munthavi ya Ukraine na Poland kuti yimanye ivyo vikukhumbikwa na kuchitapo kanthu. Ŵabali ŵa mu Dipatimenti Yakugura Katundu, Yakutumizga Katundu, na ya Vyamalango, mubali wa mu Komiti ya Munthavi ya Ukraine, na awo ŵali mu Dipatimenti Yakugura Katundu pa Charu Chose, ŵakakumananga zuŵa lililose kuti ŵadumbiskane ivyo vikukhumbikwa.

Jay Swinney, uyo ngwa mu Dipatimenti Yakugura Katundu pa Charu Chose wakati, “Chakwamba tikasandanga dankha ivyo vikukhumbikwa. Tikakhumbanga kupeleka chakurya na vinthu vyakovwira pa utozi vyakuti ŵabali ŵakaleke kusuzgika kuvizgoŵera. Ndipouli, kumanya waka ivyo vikukhumbikwa kukaŵanga kwakukwana yayi pa iko kwekha. Tikenerangaso kusanga nthowa iyo katundu uyu wamufikira ku Ukraine mwaluŵiro uku nkhondo yili mukati kweniso kuti waliyose waŵe wakuvikilirika.”

Kufika pa March 9, 2022, ŵabali ŵakamanya vinthu ivyo ŵabali ku Ukraine ŵakukhumbikwira. Ŵakapakira makatoni gha vyakurya, nga ni nyama na somba za mu tuvithini, groats, mpunga, na ntchunga, kweniso vinthu vyakovwira kuti paŵe utozi nga ni sopo na mapepara gha ku chimbuzi. Pa nyengo iyo, ŵabali ŵakasanga kuti pakukhumbikwira ndalama madola pafupifupi 65 gha ku America kuti ŵafiske kutumizga chakurya cha masabata ghanayi kwa munthu yumoza. Pakuwona kuti ŵabali masauzandi ghanandi ŵakhumbikwirenge wovwiri, Komiti Yakulongozga yikazomerezga kuti ndalama zinandi zigwire ntchito yakovwira ŵabali. Kweni kasi vinthu ivi tivitumizgenge wuli na kuwoneseska kuti pa nyengo yimozamoza umoyo wa ŵabali awo ŵamupeleka uŵe wakuvikilirika?

Pa March 13, ŵabali ŵaŵiri ŵa ku Poland ŵakayezga kwenda kufuma ku ofesi ya munthavi ya Poland kuluta ku nyumba yakusungirako katundu iyo yili kufupi na Lviv, Ukraine. Pambere ŵabali aŵa ŵandanyamuke, ŵabali ku ofesi ya munthavi ya Poland na Ukraine ŵakaŵawovwira kunozgekera ulendo uwu. Ofesi ya munthavi yikaŵalembera chikalata chakukhumbikwa kuti ŵakajumphe pa boda, chakulongosora kuti ŵamupeleka wovwiri, kuŵika vimanyikwiro pa magalimoto vyakulongora kuti zikuluta kukapeleka wovwiri, kweniso kudumbiskana na ŵabali ŵa ku Ukraine mwakuti ŵamanye nthowa zakudumura izo ŵangenda para ŵajumpha waka pa boda. Chifukwa cha kunozgekera makora kweniso na wovwiri wa Yehova, ŵabali aŵa ŵakafiska kukapeleka katundu uyu ku Makomiti Ghakovwira Para Kwachitika Soka mu maora 24 pera ku Lviv, ndipo ŵakawelera na kukafikaso makora ku Poland.

Nangauli ulendo wakwamba uwu ukenda makora chomene, ŵabali ŵakaluta waka na wovwiri wambura kukwana na 1 tani wuwo. Pakakhumbikwangaso wovwiri wakukwana pafupifupi matani 200! Kasi katundu munandi nthena wendenge wuli kuti ukafike mwaluŵiro chomene ku ŵabali awo ŵakukhumbikwa wovwiri?

“Ŵanthu Ŵako Ŵajipelekenge na Mtima Wose”

Pamanyuma pakuŵazga malipoti pa jw.org ghakuyowoya vya umo ŵabali ŵithu ŵakhwaskikira na nkhondo ku Ukraine, ŵanthu kufuma pa charu chose ŵakakhumbanga kovwirapo. Ŵanandi awo ŵali kutali ŵakapeleka wovwiri wa ndalama kwizira mu vyawanangwa vyakovwira pa ntchito ya pa charu chose ya Ŵakaboni ŵa Yehova, pakumanya kuti vyamugwira makora ntchito. Ŵanyake awo ŵakukhala mu vyaru vyapafupi ŵakajipelekenga kugwiliskira ntchito nyengo yawo, nkhongono, na katundu wawo kuti ŵawovwire ŵanji. Wonani viyelezgero vichoko waka ivi.

Ku Poland, ŵabali ŵakujipeleka ŵakapakira tumathumba tunandi twa vyakukhumbikwira ndipo ŵana ŵakalemba makadi. Bartosz Kościelniak uyo wakuteŵetera mu Dipatimenti Yakugura Katundu ku ofesi ya munthavi ya Poland wakati, “Kanandi waka naŵerengapo lemba la Salimo 110:3, ilo likuti ŵanthu ŵa Yehova ‘ŵajipelekenge na mtima wose.’ Kweni nkhati nawona umo wovwiri ukiziranga, ŵanthu ŵanandi ŵakujipeleka kovwirapo nyengo yeneyiyo, ndipo nkhawamo kuti mazgu agha ngaunenesko nadi.”

Kaboni wa Yehova munyake uyo wali na kampani ya mathiraki ndipo wakajipeleka kuti tigwiliskire ntchito mathiraki ghanyake kweniso wakajipeleka na mafuta wuwo, wakati: “Kwa ine, nkhuwona kuti ni mwaŵi wakuti nilongore chitemwa ku ŵabali ŵane kweniso Yehova. Ndine wakukondwa chomene kuti nkhawovwirapo.” Vikuwoneka kuti mafuta agho wakajipeleka ghakaŵa ghakujumpha malita 7,700, ndipo ŵabali ŵakagwiliskira ntchito nyengo yawo na nkhongono kwenda mtunda wa makilomita 48,000 kuti ŵafiske kukapeleka katundu uyu!

Chifukwa cha mtima wakujipeleka wa ŵabali na ŵadumbu kweniso chitemwa chawo, kufika pa March 28—apo pakaŵa kuti pajumpha mazuŵa 15 kufuma apo tikalutira na katundu wakwamba—tikafiska kuluta na vinthu vyakukwana matani 100, nga ni chakurya, vyakovwira kuti paŵe utozi, na munkhwala ku Ukraine! Chinyakeso ntchakuti, tikapokera vyawanangwa vinandi ndipo ŵabali na ŵadumbu ŵanandi ŵakajipeleka, ivyo vikawovwira kuti tichepeske unandi wa ndalama izo tikatenge tigwiliskire ntchito pakovwira awo ŵakukhumbikwira wovwiri. Kufika pasono, Ŵakaboni ŵa Yehova ŵatumizga vinthu vyakovwilira ŵanji vyakujumpha matani 190 ku Ukraine. Kasi vinthu ivi vyawovwira wuli ŵabali ŵithu?

“Mukaŵaso na Chitemwa Chinu!”

Katundu ukati wafika ku Lviv, Makomiti Ghakovwira Para Kwachitika Soka agho ghali mu charu chose cha Ukraine, ghakagaŵa vinthu ivi ku awo ŵakukhumbikwira wovwiri. Ŵakavitumizga mu misumba yakupambanapambana, ndipo yinyake yikuŵa pa mtunda wa makilomita ghakujumpha 1,300 kufuma ku Lviv. Nangauli ntchito yakugaŵa wovwiri iyi yikenda makora, kweni yikatora nyengo.a

Markus Reinhardt, uyo ngwa mu Komiti ya Munthavi ya Ukraine, wakati: “Mu nyengo yakusuzga iyi, ŵabali ŵanandi ŵajiwonera ŵekha chitemwa cha Yehova, kweniso uwemi uwo ukuŵapo para ŵakulutilira kupulikira ulongozgi wakufuma ku gulu lake, nanga ni apo soka lindachitike. Mwachiyelezgero, wose ŵakuchiskika kuti ŵasungenge vinthu nga ntchakurya na maji vyakukwana masabata ghanandiko mu nyumba zawo. Pa nkhani iyi, mulara munyake zina lake Anton uyo wakuteŵetera ku Kyiv wakati: ‘Gulu la Yehova latinozgekereska umo tingachitira mu nyengo zakusuzga, ndipo tikuwonga chomene. Kuŵa na chakurya, maji na wayilesi vyatovwira chomene.’ Tikuwonga chomene kuti ŵabali ŵakapulikira ulongozgi uwu chifukwa vikawovwira ofesi ya munthavi kuŵa na nyengo yakunozga wovwiri wakukhumbikwa.”

Kasi ŵabali ŵithu ŵakajipulika wuli wovwiri wati wiza? Pakuyowoya umo ŵakajipulikira, Mykola na Zinaida, awo ŵakukhala ku Kharkiv, ŵakati: “Tikuwonga chomene kuti mukutifipira mtima. Tawonga chomene chakurya na munkhwala uwo mwatipa. Ivi vyatovwira kuwona woko la Yehova.” Valentyna nayo wakukhala mu chigaŵa chenechichi. Iyo wakati: “Nkhondo yati yamba waka, ŵanthu ŵakandandanga mizere yitaliyitali kuti ŵagure vyakukhumbikwa. Chikaŵanga chipusu yayi kugura ivyo ukukhumba. Kweni Yehova wakawona ndipo wakamanya suzgo lithu. Iyo wakimika ŵabali kuti ŵagaŵe vyakukhumbikwa mu nyumba zithu, ndipo tikasanga nkhanira ivyo tikakhumbikwanga! Mu nyengo zakusuzga zanthena izi, para palije chakuti wamunthu ungachitapo, ndipo ukuwona kuti Yehova kweniso gulu lake ŵakutipwelelera mu nthowa yapadera chomene. . . . Ntchakukondweska chomene kuwona Yehova wakutovwira pa nyengo yakwenelera na kutipa nkhanira ivyo takhumbikwiranga.”

Yevhen, Iryna, na Mykyta, awo ŵali kuchimbira ku Mariupol, ŵakati: “Tikuwonga chomene wovwiri uwo muli kutipa. Kuyowoya unenesko, ukaŵa nkhanira wa panyengo yake. Pakwamba, tikawonanga nga kuti mukati mwa makatoni agha muli waka vinthu vyakukhumbikwa, kweni tikati taghajura, tikasanga kuti mukaŵaso na chitemwa chinu!”

Tikukayika yayi kuti mwajiwonera mwekha umo mzimu wa Yehova ukalongozgera ŵanthu ŵake kuti ŵafiske kupeleka wovwiri mu nyengo ya “zinkhondo na malumbiri gha zinkhondo.” Vyawanangwa vinu ivyo mukupeleka kuti viwovwire pa ntchito ya pa charu chose, ndipo vinandi mwa ivyo vikwizira pa donate.jw.org, navyo vikawovwira chomene. Tikuwonga chomene mtima winu wakupa!

Kupeleka Wovwiri Mwaluŵiro Chomene Kweni mu Nthowa Yakuvikilirika

1. 

   February 24, 2022: Komiti Yakulongozga yikazomerezga kuti ndalama zinyake zigwire ntchito pakovwira ŵabali ŵithu ku Ukraine, ndipo ivi vikawovwira kuti ofesi ya munthavi yambepo ntchito yakupeleka wovwiri

2. 

   February 24–March 8, 2022: Ofesi ya munthavi ya Ukraine yikamba kugura vinthu mu charu mwenemumo na kuvituma ku ŵabali kwizira mu Makomiti Ghakovwira Para Kwachitika Soka. Ofesi yikambaso kunozgekera kupokelera katundu kufuma ku Poland na kuwugaŵa ku ŵabali

3. 

   March 9, 2022: Komiti Yakulongozga yazomerezga kuti wovwiri ulute ku Ukraine

4. 

   March 10–12, 2022: Kupanga mapulani ghakuti ŵayezge kuluta na chakurya kweniso wovwiri unyake kufuma ku Poland kuya ku Lviv, Ukraine

5. 

   March 13, 2022: Ŵafiska kuyezga kuluta na chakurya na wovwiri unyake kufuma ku Poland kuya ku Lviv, Ukraine

6. 

   March 14–16, 2022: Pa Holo yakuchitiramo maungano ghakurughakuru kufupi na Poznan, Poland, Ŵabali ŵakujipeleka ŵa mu Dipatimenti vya Mapulani na Kuzenga ŵakunozgekera kuti ŵapakire chakurya na vinthu vyakovwira kuti paŵe utozi

7. 

   March 17, 2022: Pamanyuma pa mazuŵa ghanayi ŵati ŵawerako ku ulendo wakuyezga dankha, wovwiri wakukwana matani 13 ukamba kuluta ku boda ya Ukraine

8. 

   March 21–27, 2022: Kuyana na umo ŵakachitira pakwamba, wovwiri uwo ukakhalako nawo ŵakawupakira ku Poland na kuwutumizga ku Ukraine ndipo ukatumizgika mu vigaŵa ivyo ukakhumbikwanga mu maora 24 pera

9. 

   March 28, 2022: Mu mazuŵa waka 20 kufuma apo ŵakazomerezgekera, vinthu vyakukwana matani 100, nga chakurya, vinthu vyakovwira kuti paŵe utozi, na munkhwala vikatumizgika ku Ukraine

Kufika pasono, Ŵakaboni ŵa Yehova ŵafiska kutumizga wovwiri wakujumpha matani 190 ku Ukraine.