Ntchito Yakupeleka Wovwiri mu 2021—Tikaŵataya Yayi Ŵabali na Ŵadumbu Ŵithu

Mu chaka cha uteŵeti cha 2021,a charu chose chikaŵa kuti chikulutilira kutambura na muliri wa COVID-19. Nga umo tikayowoyera mu nkhani ya mutu wakuti “Wovwiri wa pa Charu Chose mu Nyengo ya Muliri Uwo Wakhwaska Charu Chose,” ndalama madolab ghanandi zagwira ntchito yakovwira pa muliri uwu ndipo tapangaso Makomiti Ghakovwira Para Kwachitika Soka ghakujumpha 950.

Nadi, apo muliri ukatambuzganga chomene ŵanthu, masoka ghachilengiwa kweniso agho ghakwiza chifukwa cha ŵanthu ghakakhwaska ŵabali na ŵadumbu ŵithu pa charu chose. Kuti tovwirepo pa masoka ghakujumpha 200 agho ghakachitika, Komiti Yakulongozga ya Wupu Wakulongozga yikazomerezga kuti ndalama zakukwana madola 8 miliyoni zigwire ntchito kusazgapo kovwirapo pa muliri wa COVID-19. Wonani umo vyawanangwa vinu vikawovwilira awo ŵakakhwaskika na masoka ghaŵiri agho ghakachitika mwasonosono.

Kuphulika Kwa Phiri la Nyiragongo

Pa May 22, 2021, pa phiri la Nyiragongo, ilo lili ku Democratic Republic of the Congo pakamba kufuma vibala vyakotcha. Vibala ivi vikamba kwenda na kusakaza nyumba, masukulu na malo agho mukusungika maji. Ndipouli, chakofya chikaŵa vibala ivi pera yayi. Pati pajumpha mazuŵa kufuma apo vibala ivi vikaphulikira, chuvu chakofya icho chikafumanga mu phiri ili chikamba kung’ondokera mu msumba wa Goma kweniso kukachitikanga vindindindi vinandi vichokovichoko. Hafu ya ŵanthu awo ŵakukhala mu msumba uwu ŵakaphalirika kuti ŵasamuke dankha. Ŵanthu ŵanandi ŵakachimbira, ndipo ŵanyake ŵakachimbilira ku Rwanda.

Pa gulu la awo ŵakachimbira pakaŵa Ŵakaboni ŵa Yehova pafupifupi 5,000. Ŵanyake nyumba zawo zikasakazika na soka ili; apo ŵanji katundu wawo ukibika ŵati ŵachimbira mu nyumba zawo. Makomiti Ghakovwira Para Kwachitika Soka gha ku Rwanda na Democratic Republic of the Congo ndigho ghakalongozganga pa ntchito yakupeleka wovwiri. Pakuyowoyapo vya komiti yinyake yakovwira para kwachitika soka, ofesi ya munthavi ya Congo (Kinshasa) yikapeleka lipoti lakuti: “Nanga ni apo vinthu vikaŵa makora yayi mu msumba kweniso apo ŵanthu ŵakaŵa ŵachali ŵandaphalirike kuti ŵasamukemo, Komiti Yakovwira Para Kwachitika Soka yikaŵa kuti yamba kale kugaŵa chakurya, maji, vyakudika, na vyakuvwara.” Mu tawuni yinyake ŵabali ŵithu ŵakujumpha 2,000 ŵakawungana pamoza, Komiti Yakovwira Para Kwachitika Soka yikakhoma mathenti, kupeleka ma mask, na kulongosorapo umo ŵabali ŵithu ŵangajivikililira ku muliri wa COVID-19 na matenda gha kolera

Mu myezi yitatu pera, ŵabali ŵithu ŵakaŵa kuti ŵagaŵa mpunga wakujumpha matani 6, ufu wa ngoma wakujumpha matani 6, mafuta ghakuphikira matani ghatatu na maji matani ghatatu. Kuti ndalama zileke kusakazika, ofesi ya munthavi yikanozga vyakuti yigure chakurya mu charu chawo chenechicho m’malo mwakuchita kuchemeska chakurya kufuma kuwaro.

Mudumbu munyake uyo nyumba yake yikasakazika na vibala vyakotcha wakati “Tikagongowa chomene kweniso tikasweka mtima.” Ndipouli mbumba ya mudumbu uyu yikapokera wovwiri wakuthupi na wauzimu wuwo. Pasono mudumbu uyu wakuti: “Na wovwiri wa Yehova, tichali na ivyo tikukhumbikwira. Tikujiwonera tekha kuti Yehova wakutiyeghera vizito ndipo ivi vikupangiska kuti chitiŵireko chipusu kuzizipizga.”

Kusuzga kwa Vyachuma ku Venezuela

Charu cha Venezuela chasangana na suzgo la vyachuma kwa vyaka vinandi sono. Ŵabali ŵithu ukhaliro ukuŵasuzga, chakurya ntchakusowa kweniso uchigeŵenga wazara chomene. Ndipouli, gulu la Yehova lindaŵataye.

Mu chaka cha uteŵeti icho chajumpha, ndalama zakujumpha madola 1.5 miliyoni zikagwira ntchito pakugulira na tumizga chakurya na sopo ku mbumba izo zikukhumbikwira wovwiri. Ofesi ya munthavi ya Venezuela yikuti: “Ntchipusu yayi kutumizga matani gha chakurya 130 mwezi uliwose mu charu chithu chose na kuwoneseska kuti ŵabali awo ŵakukhumbikwira wovwiri ŵachipokera.” Kuti ŵawoneseske kuti chakurya chileke kuvunda, ŵabali ŵithu ŵakutumizganga chakurya icho chinganangika luŵiro yayi. Ofesi ya munthavi yikatiso: “Vyakurya kanandi tikugulirathu vinandi kweniso tikugura nyengo yakuvuna chifukwa ndipo chikuŵa chakutchipako. Kufuma apo tikutumizga munthowa yakuti tileke kusakaza ndalama zinandi.”

Leonel, uyo wali mu Komiti Yakovwira Para Kwachitika Soka ku Venezuela, wakuwutemwa chomene uteŵeti wake. Iyo wakuti: “Ntchito yakupeleka wovwiri njapadera. Yanikhozga chomene kufuma waka apo muwoli wane wakafwira na COVID-19. Nkhuŵa wakutangwanika ndipo nkhujiwona kuti ndine wakuzirwa ku ŵabali awo ŵakukhumbikwira wovwiri. Najiwonera nekha umo Yehova wakufiskira layizgo lake lakuti ŵanthu ŵake wazamuŵatayapo yayi.”

Mubali munyake uyo kale wakaŵa mu Komiti Yakovwira Para Kwachitika Soka ndipo pasono nayo wapokerako wovwiri wakuti: “Nane nyengo yakwana yakuti nipokere wovwiri. Tikapokera wovwiri wakuthupi pera yayi. Ŵabali ŵakatovwira ine na muwoli wane kuti mtima withu uŵe m’malo. Ŵakatipwelelera, kutipembuzga, na kutikhozga.”

Masoka ghanyake ghakuchitika mwamabuchi chomene. Ndipouli, Gulu la Yehova likusanga ivyo vingakhumbikwa na kuvitumizga mwaluŵiro, tikuti yewo chomene chifukwa cha vyawanangwa vinu ivyo mukupeleka kuti viwovwire pa ntchito ya pa charu chose. Nthowa zinyake izo mungapelekera zikulongosoreka pa donate.jw.org. Tikuwonga chomene chifukwa cha mtima winu wakupa.