Wovwiri wa pa Charu Chose mu Nyengo ya Muliri Uwo Wakhwaska Charu Chose

Kufuma mu March 2020, apo Wupu Wakuwona vya Umoyo pa Charu Chose (World Health Organization) ukati COVID-19 ni muliri, ŵanandi ŵakamanyanga yayi kuti muliri uwu ungalutilira m’paka kufikaso mu chaka chinyake. Ŵanthu ŵanandi, na Ŵakaboni ŵa Yehova ŵanyake, ŵasangana na masuzgo ghakupambanapambana chifukwa cha muliri uwu. Kasi Ŵakaboni ŵa Yehova ŵachita wuli kuti ŵawovwire ŵanthu mu nyengo yakusuzga iyi?

Wovwiri ku Awo Ŵakakhumbikwiranga Nadi Kovwirika

Komiti Yakulongozga ya Wupu Wakulongozga wa Ŵakaboni ŵa Yehova, yikapeleka ulongozgi wakuti pimikike Makomiti Ghakovwira Para Kwachitika Soka, ndipo pasono pali makomiti ghakujumpha 950 agho ghakovwira ŵanthu awo ŵakhwaskika na muliri uwu wa COVID-19. Mu vigaŵa vinyake, ŵabali ŵakupanga ndondomeko ya kovwirana ŵekha mu chigaŵa chawo, ndipo kunyake ŵakovwirika na boma. Makomiti agha ghawovwiraso ŵanthu ŵanandi chomene awo ŵakakhumbikwiranga wovwiri.

Mwachiyelezgero, wonani umo vinthu vikaŵira ku Paraguay. Nyuzipepara yinyake yikati “ŵanthu ŵanandi ku Paraguay ŵakugona na njara ndipo ŵalije pakukora,” chifukwa cha muliri uwo wapangiska kuti vyachuma vinjire pasi. Kweni Komiti Yakovwira Para Kwachitika Soka ya ku Paraguay yikaŵa kuti yamba kale kugaŵa tumathumba uto mukaŵanga vyakurya vyakuti mbumba ya ŵanthu ŵanayi yingarya kwa masabata ghaŵiri, vinthu vyakutozgera malo, kweniso vyakujivikililira ku matenda. Kathumba kalikose kakakwananga madola pafupifupi 30 gha ku America.

Kasi awo ŵakovwira ŵanyawo ŵakuchita wuli kuti iwo na ŵanyawo ŵaŵe ŵakuvikilirika ku muliri wa COVID-19? Ŵakuvwara mask na kuwoneseska kuti ŵakukhala mwakutalikirana na ŵanji. Ŵakuwoneseskaso kuti makampani agho ŵakugurako vyakurya ghakupwelelera malo agho ŵakupangirako vinthu vyawo kweniso ghakuŵikapo mtima kulondezga malango ghakujivikililira. Ivi vikusazgapo kuwoneseska kuti wose awo ŵakhwaskenge katundu ŵavwara vinthu vyakovwira kujivikilira ku muliri uwu, ŵakunozga kweniso kupuputa na munkhwala magalimoto ghawo, na kusunga katundu wawo mu malo agho ghapuputika na munkhwala. Paumaliro, wose awo ŵakukapeleka katundu uyo ku ŵanthu, nawo ŵakuwoneseska kuti ŵakukhala mwakutalikirana na ŵabali awo ŵakupokera katundu.

Kugwiliskira Ntchito Mwamahara Vyawanangwa

Kufika mu January 2021, Komiti Yakulongozga yazomerezga kuti ndalama zakukwana madola ghakujumpha 25 miliyoni gha ku America, zigwiliskirike ntchito pakovwira awo ŵakhwaskika na muliri wa COVID-19. Maofesi gha munthavi na Makomiti Ghakovwira Para Kwachitika Soka, ghakuwoneseska kuti ghagwiliskira ntchito makora vyawanangwa ivi ndipo ghakuyezgeska kupempha ŵeneko ŵa makampani kuti ŵakhizgeko katundu uyo ŵakukhumba kugura. Mwachiyelezgero, ku Chile, ŵabali awo ŵakanozganga ndondomeko ya kugura vinthu vyakovwilira ŵanthu, ŵakakhumbanga kugura mphoza zakukwana makilogiramu 750. Kweni mtengo wa mphoza ukakwera chomene mu mwezi umoza pera! Pati pajumpha maora ghaŵiri kufuma apo ŵakakolerana kuti ŵagure waka pa mtengo wakudura wenewuwo, munthu uyo wakaguliskanga malonda agha wakaŵamanyiska kuti kasitomala munyake wawezga katundu uyo wakakhumbanga kugura. Ntheura m’malo mwa kutchaja mtengo wakukwera wura ŵakakolerana pakwamba, munthu uyu wakazomera kuŵaguliska ŵabali pa mtengo wa kukhira wa nyengo zose!

Ndipouli, apo ŵabali ŵithu ŵakalutanga kukatora katundu uyo ŵakapangana kugura, munthu uyu wakamba kukana kuti ŵatore pa mtengo uwo ŵakapangana, ndipo wakatenge ŵabali ŵithu ŵakuchita makora yayi pa kugaŵa chakurya, nga umo ghakuchitira mawupu ghanyake. Mubali munyake wati walomba lurombo lufupi chamumtima, wakamulongosolera munthu uyu kuti ŵachita kale kafukufuku mu mipingo kuti ŵamanye awo ŵakukhumbikwira nadi wovwiri. Ŵabali ŵakalongosoraso kuti chifukwa cha kupambana mitheto kwa ŵanthu awo ŵamupokera wovwiri uwo, ŵamupakira vyakurya kuyana na ivyo mbumba iyo yamupokera yikutemwa kweniso vyamuŵa vyakuti vingakayiwovwira nadi. Paumaliro, ŵakamusimikizgira munthu uyu kuti ndalama zose izo Ŵakaboni ŵa Yehova ŵakugwiliskira ntchito ni zakuti ŵanthu ŵakupeleka mwakukhumba kwawo. Munthu uyu wakakhorwa na ivyo wakaphalirika. Wakazomera kuŵaguliska pa mtengo wakukhira kweniso wakasazgapo makilogiramu 400 gha mphoza pa ulendo wachiŵiri uwo ŵabali ŵakaguraso katundu kwa iyo.

“Chilongolero cha Chitemwa Chanadi”

Lusu, uyo ni muchekuru kweniso chokoro ku Liberia, wakukhala na ŵachibali ŵake 5. Mulenji unyake apo ŵakaryanga chakurya cha mulenji na kudumbiskana lemba la zuŵa, muzukuru wake wa vyaka 7, wakamanya kuti mu nyumba mulijirethu chakurya. Iyo wakamufumba kuti, “Kasi tiryengechi?” Lusu wakamuphalira mwakusimikizga kuti walomba kale wovwiri ndipo wakaŵa na chigomezgo chose kuti Yehova waŵawovwirenge. Mise yeneyira, Lusu wakapokera foni kufuma kwa ŵabali ŵalara awo ŵakamuchema kuti wakatore chakurya. Iyo wakuti: “Muzukuru wane wakuti sono wamanya kuti Yehova wakupulika na kuzgora malurombo chifukwa wakazgora lurombo lwane.”

Mwanakazi munyake ku Democratic Republic of Congo wakukhala pafupi na banja ilo nda Ŵakaboni ŵa Yehova. Wakati wawona banja ili lapokera chakurya kufuma ku ŵabali na ŵadumbu, wakati, “Para muliri wamara, nase tizamuŵa Ŵakaboni ŵa Yehova chifukwa ŵalongora kuti ŵakughanaghanira ŵanyawo mu nyengo yakusuzga iyi.” Mfumu wa mwanakazi uyu wakamufumba kuti, “Kasi uzamuŵa Kaboni wa Yehova chifukwa waka cha thumba la mpunga?” Iyo wakazgora kuti, “Yayi, kweni thumba la mpunga ili lalongora waka kuti ŵanthu aŵa ŵakutemwana zanadi.”

Ŵakaboni ŵa Yehova ŵakuchitapo kanthu mwaluŵiro kuti ŵawovwire ŵabali na ŵadumbu awo ŵakukhumbikwira wovwiri mu nyengo ya muliri iyi chifukwa cha vyawanangwa ivyo mukupeleka. Tikumuwongani chomene chifukwa cha vyawanangwa ivyo mukupeleka kwizira pa nthowa zakupambanapambana izo zili pa donate.jw.org.