Kupeleka Wovwiri ku Awo Ŵakhwaskika na Masoka

Mu chaka cha 2020 mukachitika masoka gha chilengiwa ghakupambanapambana kweniso pa charu pakabuka muliri wa COVID-19. Kasi Ŵakaboni ŵa Yehova ŵakaŵawovwira wuli awo ŵakakhwaskika?

Mu chaka cha uteŵetia cha 2020, Komiti Yakulongozga ya Wupu Wakulongozga yikazomerezga kuti ndalama zakukwana madola 28 miliyonib zigwire ntchito pakovwira awo ŵakhwaskika na masoka. Ivi vikapangiska kuti ŵanthu awo ŵakakhwaskika na masoka ghakujumpha 200, kusazgapo muliri wa COVID-19 ŵasange wovwiri. Ghanyake mwa masoka agha ni vimphepo vya nkhongono, kututuka kwa maji ku Africa, kusoŵa kwa chakurya ku Venezuela, na chilangalanga ku Zimbabwe. Vyawanangwa ivyo mukapeleka vikawovwira pakugura chakurya, maji, kusanga malo ghakukhala, vyakuvwara, wovwiri wa munkhwala, vyakukhumbikwa pakutozga malo, kunozga ivyo vyanangika, na kuzenga. Wonani viyelezgero vichoko waka vya ntchito yakupeleka wovwiri.

COVID-19. Muliri uwu ukaŵakhwaska ŵabali na ŵadumbu ŵithu pa charu chose pa chapasi, ŵanyake ŵakenjerwanga, ndipo ŵanyake ŵakasoŵanga pakukora. Kuti ŵasange wovwiri, pakapangika Makomiti Ghakovwira Para Kwachitika Soka ghakujumpha 800 pa charu chose. Makomiti agha ghakaŵa maso kupokera malipoti gha wovwiri uwo ŵabali ŵithu ŵakukhumbikwira, na kulemba mwaluŵiro malipoti agho ghakawovwiranga Komiti Yakulongozga kumanya umo yingawovwilirapo.

Mu chaka chose ichi, Makomiti Ghakovwira Para Kwachitika Soka ghawovwira ŵanandi kusanga chakurya, maji, vyakovwira pakutozga, na munkhwala. Mu vigaŵa vinyake, makomiti agha ghakagwiranga ntchito na ŵalara pakovwira ŵabali umo ŵangachitira kuti ŵasange wovwiri wakufuma ku boma.

Ŵanthu awo Mbakaboni yayi nawo ŵakawonanga mulimo withu wakovwira para kwachitika soka. Mwachiyelezgero, Field Simwinga, uyo ni DC ku Nakonde, Zambia, wakaphalira ŵabali ŵithu kuti: “Tikwenera kumuwongani chomene chifukwa imwe mwapeleka wovwiri ku awo ŵakhwaskika na soka mwaluŵiro.”

Kusoŵa kwa chakurya ku Angola. Muliri wa COVID-19 ukapangiska kuti chiŵe chakusuzga kusanga chakurya ndipo chikadura chomene. Ŵabali na ŵadumbu ŵithu ŵanandi vikaŵasuzganga chomene kuti ŵagure chakurya.

Ofesi ya munthavi ya Brazil yikapempheka kuti yitumizge wovwiri wa chakurya ku ŵabali ŵithu ku Angola. Kuti ŵagwiliskire ntchito makora vyawanangwa, ŵakachita kafukufuku mwakupwelelera chomene wa umo ŵangagulira chakurya na kuchitumizga. Chakurya ichi chikagulika chinandi nyengo yimoza. Kabokosi kalikose ka vyakurya kakagurika na kutumizgika pa mtengo wa madola 22 kweni mukaŵanga chakurya cha makilogiramu pafupifupi 20, mukati mukaŵa vyakurya nga ni mpunga, ntchunga na mafuta ghakuphikira. Kufika pasono tumabokosi twa vyakurya twakukwana 33,544 tuli kutumizgika ndipo tukukwana matani 654. Para tingasazga na chakurya icho chikasangika ku Angola tingati ŵanthu ŵakujumpha 50,000 ŵakasanga wovwiri wa chakurya!

Kasi ŵabali ŵithu ŵakajipulika wuli ŵati ŵapokera wovwiri uwu? Alexandre uyo wakukhala kuchigaŵa cha kumizi ku Angola, wakuti: “Nkhuwona ukaboni wakuti Yehova wakunitemwa ndipo nili nekha yayi. Gulu la Yehova likuniwona kuti ndine wakuzirwa!” Mariza, mama uyo wakulera yekha ŵana wakuti: “Yehova wapulika kulira kwane. Nkhumuwonga pamoza na gulu lake!”

Wovwiri mu Nyengo ya Chilangalanga ku Zimbabwe. Mu chaka cha uteŵeti cha 2020, ku Zimbabwe kukaŵa chilangalanga chikuru, icho chikapangiska ŵanthu ŵanandi kutambura na njara. Ŵakaboni ŵanandi ku Zimbabwe ŵakasoŵanga chakurya chakukwana.

Pakapangika Makomiti 5 Ghakovwira para kwachitika soka kuti ghawovwire pakupeleka chakurya ku ŵabali ŵithu. Ŵapharazgi ŵakawovwirapo pakupakira chakurya, katundu munyake na kubwerekeska magalimoto ghawo.c Mu chaka uteŵeti cha 2020, ndalama zakukwana madola 691,561 ndizo zikagwira ntchito pakugulira chakurya cha ŵanthu ŵakujumpha 22,700.

Nyengo zinyake vikachitikanga kuti ŵabali ŵamalizga waka chakurya chawo ndipo ŵakapokeranga wovwiri uwu wa chakurya. Para chakurya chafika ŵabali ŵithu ŵakalumbanga Yehova. Ŵanyake ŵakachitanga na kwimba sumu za Ufumu.

Ku chigaŵa chinyake ŵadumbu ŵaŵiri awo ŵafumu ŵawo ŵali kufwa ŵakaluta pa ungano uwo ukachitiskika na wupu unyake uwo ngwa boma yayi kuti ŵadumbiskane vya wovwiri wa chakurya. Ndipouli, ungano uwu ukamba kuŵa wandyali, ntheura ŵadumbu ŵithu ŵakakana ivyo vikakhumbikwanga kuti ŵapokere wovwiri wa chakurya. Ŵakati ŵafumapo pa ungano uwu, ŵanthu ŵakamba kuŵahoya na kuyowoya kuti, “Vyakuti muzakatipemphengeso chakurya ise cha!” Kweni, pati pajumpha waka masabata ghaŵiri, ŵabali ŵithu ŵakafika ku chigaŵa ichi na wovwiri wa chakurya ndipo ŵakaŵapa chakurya pambere wupu uwu undize nacho chakurya!

Wovwiri uwo ukupelekeka para kwachitika soka wawovwiraso pa kuchitira ukaboni ku Zimbabwe. Mwachiyelezgero, wonani nkhani ya Prisca uyo wakukhala mu muzi unyake uchoko. Nangauli chilangalanga chikiziska masuzgo ghanandi, Prisca ŵakaŵikangapo mtima kunjira mu uteŵeti sabata yiliyose pa Chitatu na pa Chinkhondi, wakachitanga ivi nanga yingaŵa nyengo ya kulima. Ŵanthu mu muzi wakwake ŵakamunenanga, ŵakatenge: “Mbumba yako yitamburenge chifukwa iwe ukusuŵilira waka kupharazga.” Prisca wakazgoranga kuti: “Yehova wandaŵatayepo ŵateŵeti ŵake.” Pakatora na nyengo yayi, mbwenu wakapokera wovwiri kufuma ku gulu lithu. Ivi vikaŵakhorweska chomene ŵazengezgani ŵake, ndipo ŵakamuphalira Prisca kuti: “Chiuta wandakutaye nadi, ntheura tikukhumba kumanya vinandi vya iyo.” Pasono ŵazengezgani ŵake 7 ŵakutegherezga maungano ghithu pa wayilesi.

Apo tikusendelera ku umaliro wa charu ichi, tilutilirenge kusangana na masoka gha chilengiwa. (Mateyu 24:3, 7) Tikumuwongani chomene chifukwa cha vyawanangwa vinu ivyo mukupeleka kwizira munthowa zakupambanapambana izo zili pa donate.jw.org. Vyawanangwa ivi vikovwira kuti awo ŵakusuzgika ŵasange wovwiri mwaluŵiro.