Ntchito Yakupeleka Wovwiri mu 2023—“Tajiwonera Tekha Chitemwa Icho Yehova Watilongora”

Baibolo likayowoyerathu kuti “mtundu uzamuwukirana na mtundu unyake” kweniso kuti kuzamuŵa masoka pa nyengo ya “umaliro wa charu.” (Mateyu 24:3, 7) Tajiwonera tekha kufiskika kwa mazgu gha uchimi agha mu chaka cha uteŵeti cha 2023.a Nangauli mu vyaru pafupifupi 100 mukuchitika nkhondo na masoka gha chilengiwa, kweni Ŵakaboni ŵa Yehova ŵakuyezga Yehova pa nkhani yakulongora chitemwa. Kasi ŵakuchita wuli?

Mu chaka cha uteŵeti cha 2023, ŵabali ŵithu ŵakakhwaskika na masoka ghakujumpha 200. Ghanyake mwa masoka agha ngachilengiwa apo ghanyake ghakwambiskika na ŵanthu. Mawupu ghakuzomerezgeka gha Ŵakaboni ŵa Yehova ghakagwiliskira ntchito ndalama za madola zakujumpha 10 miliyonib kufuma pa ndalama izo zikupelekeka ku mulimo wa pa charu chose. Ŵakatora ndalama izi na chilato chakuti ŵawovwire ŵanthu awo ŵakhwaskika na masoka ghachilengiwa. Ndalama izi zikaŵa zakusazgirapo pa ndalama izo ŵabali na ŵadumbu paŵekha ŵakapelekanga kuti ŵawovwire awo ŵakukhumbikwira wovwiri mu chigaŵa chawo. Wonani umo ndalama izo mukapeleka zikawovwilira ŵanthu awo ŵakakhwaskika na masoka ghaŵiri pa masoka ghanandi agho ghakakhwaska ŵabali ŵithu.

“Chitemwa Chanadi Chiliko Nadi”

Kanandi maji ghakutemwa kututuka mu vigaŵa vinyake vya ku Nigeria. Kweni kututuka kwa maji uko kukachitika mu Okutobala 2022 kukaŵa kuheni chomene kuluska uko kwachitikanga mu vyaka 10 ivyo vyajumpha. Maji ghakatutuka chomene ndipo malo ghakulimapo ghakujumpha mahekitara 676,000 ghakazura maji, ndipo ŵanthu ŵakujumpha 2 miliyoni ŵakachimbira mu vikaya vyawo. Mwaluŵiro ofesi ya munthavi ku Nigeria yikasankha Makomiti Ghakovwira Para Kwachitika Masoka kuti ghanozge zakovwira ŵanthu na kupeleka wovwiri wauzimu.

Umo Ŵabali na Ŵadumbu Ŵithu Ŵakhwaskikira

• Ŵapharazgi 7,505 ŵakachimbira mu vikaya vyawo

• Nyumba 860 zikanangika panji kunangikirathu

• Nyumba za Ufumu 90 zikazura maji kweniso Malo Ghakuchitirapo Ungano ghamoza nagho ghakazura maji

Umo Vyawanangwa Vikugwilira Ntchito

Ndalama zakujumpha $250,000 zikagwira ntchito pakovwira ŵanthu awo ŵakakhwaskika na masoka ghachilengiwa, ndalama izi ŵakagulira:

• Vyakurya nga ni mpunga, ntchunga, na noodles

• Vinthu vya pa nyumba nga ni matiresi na usikiti (neti) wakuvikilira ku nyimbo

• Kunozga panji kuzengaso nyumba izo zikanangika

Kasi ŵabali ŵakachita wuli kuwoneseska kuti ndalama izo ŵanthu ŵakapeleka zikagwira ntchito mwamahara? Nthowa yimoza yikaŵa ya kuwoneseska nyumba yiliyose kuti ŵamanye usange yinganozgeka. Usange nyumba yikaŵanga yakuti yizengekengeso makora, ŵakayizenganga munthowa yipusu mwakuyana na umo ŵakuzengera mu chigaŵa icho.

Ŵabali na ŵadumbu ŵithu awo ŵakapokera wovwiri ŵakuwonga chomene. Mudumbu munyake wakati: “Kututuka kwa maji kukatimbanizga umoyo withu chifukwa minda yithu yili kunangika ndipo tikaŵavya pakukhala. Mtima ukakhazikika apo ŵabali na ŵadumbu ŵakiza zuŵa leneliro kuti ŵatovwire na kutipa malo ghawemi ghakugona. Tikawovwirika chomene apo tikapokera vyakurya ivyo ofesi ya munthavi yikatumizga. Tikazizwa chomene kuwona umo lemba la Yohane 13:34, 35 likafiskikira pa ise. . . . Chitemwa chanadi chiliko nadi. Ine na mbumba yane yose, kufumira pasi pa mtima tikumuwongani chomene ŵabali chifukwa mukiza kuzakatovwira pa nyengo yake.”

Ŵanthu ŵanyake mu chikaya chithu ŵakawona ntchito yithu yakovwira ŵanji. Fumu yinyake mu chigaŵa cha Sabagreia, Bayelsa State, yikayowoya kuti: “Pa charu chose pali mawupu panji kuti matchalitchi ghanandi chomene, kweni Mbakaboni ŵa Yehova pera awo ŵapeleka wovwiri. . . . Gulu linu ndimoza mwa magulu ghawemi chomene pa charu chose.”

“Tikujiwonera Tekha Umo Yehova Wakutitemwera”

Mu mwezi wa February 2023, moto wakujumpha 400 ukananga chomene vinthu ku Chile. Malo ghakuru mahekitara ghakujumpha 430,000 pamoza na vinthu vinyake vyakuzirwa ku Chile vikanangika. Ŵanthu pafupifupi 8,000 ŵakasama mu nyumba zawo. Soka ili likati lachitika waka, ofesi ya munthavi yikamba kunozga vyakupeleka wovwiri.

Umo Ŵabali na Ŵadumbu Ŵithu Ŵakhwaskikira

• Ŵapharazgi 222 ŵakasama mu nyumba zawo

• Nyumba 20 zikanangikirathu

Umo Vyawanangwa Vikugwilira Ntchito

Ndalama zakujumpha $200,000 zikagwira ntchito kovwira ŵanthu awo ŵakakhwaskika na masoka ghachilengiwa, ndalama izi ŵakagulira:

• Chakurya na maji

• Mafuta, vyakutozgera, na munkhwala

• Kuzengaso nyumba izo zikanangikirathu

Banja linyake likakhuŵara chomene kuwona kuti vyose ivyo likaŵa navyo vikanangika, kusazgapo nyumba yawo na bizinesi yawo. Ivi vikapangiska kuti banja ili liŵavye pakukora. Mu mazuŵa ghakwambilira chikaŵa chakuŵinya chomene kwa mbumba iyi kuwona kuti apo pakaŵa nyumba yawo palije kalikose. Kweni ŵakati ŵawona kuti nyumba yawo yikuzengekaso, ŵakamba kujipulika makora. Kweniso ŵakati ŵawona chitemwa cha ŵabali awo ŵakajipeleka, vikaŵawovwira chomene kuti ŵazizipizge. Mbumba iyi yikakhwaskika chomene na ivyo vikachitika mwakuti nayo yikajoyina ŵabali ŵakujipeleka aŵa na kovwirapo pakuzengaso nyumba ya mubali munyake.

Ŵabali na ŵadumbu ŵithu ŵanandi ŵakakhwaskika chomene na ntchito yakovwira ŵanthu iyi. Mubali munyake wakati: “Ndondomeko iyo Yehova wali kukhazikiska kuŵika Makomiti Ghakovwira pa Soka njakuzizwiska nadi. Zuŵa lakulondezgapo soka lati lachitika waka, iwo ŵakaŵa kuti ŵafika kale pa malo kupeleka wovwiri. Ntchakukhozga chomene kuŵazga nkhani zakukhwaskana na mulimo wakupeleka wovwiri ku awo masoka ghaŵawira mu vigaŵa vinyake vya pa charu chapasi. Kweni vikuŵa vyakupambana chomene para vyamuchitikirani. Tikuzirwiska chomene ivyo gulu likuchita, umo ŵabali ŵakuyezgera mikhaliro ya Yehova, ndiposo umo ŵakukhwaskikira na kuwoneseska kuti tili na ivyo tikukhumbikwira mwakuthupi, mwauzimu, na mu maghanoghano. Tikujiwonera tekha umo Yehova wakutitemwera.”

Apo charu ichi chikuluta ku umaliro, masoka ghalutilirenge kusazgikira. (Luka 21:10, 11) Nangauli vili nthena, kwizira mu mpingo Wachikhristu, tikuwonaso kuti Themba lithu la chitemwa Khristu Yesu, lili nase “mazuŵa ghose m’paka umaliro wa charu ichi.” (Mateyu 28:20) Vinthu ivyo mukupeleka mwawanangwa pa ntchito ya pa charu chose, kwizira pa donate.jw.org na nthowa zinyake, pamoza na nyengo na nkhongono izo mukupeleka, vikulongora kuti mukukhozgera Ufumu na Themba lake lachitemwa. Tikumuwongani chomene chifukwa cha wovwiri uwo mukupeleka.