Umo Tingawovwilirapo Para Kwachitika Soka

Mazuŵa ghano masoka ghachilengiwa ghazara chomene. Para kwachitika soka, tikuŵikapo mtima kuchita vinthu mwakukolerana kuti tipeleke wovwiri. Ntheura Wupu Wakulongozga uli kunozga kuti pa ofesi ya munthavi yiliyose paŵe Dipatimenti Yakovwira Para Kwachitika Soka.

Para ŵabali ŵa mu dipatimenti iyi ŵapulika kuti kwachitika soka, nyengo yeneyiyo ŵakufumba ŵalara ŵa mipingo iyo yakhwaskika kuti ŵamanye wovwiri uwo ŵabali na ŵadumbu ŵakukhumbikwira. Para suzgo ndikuru ndipo ndakuti ŵapharazgi ŵangamarana nalo yayi paŵekha, ofesi ya munthavi yikutuma ŵabali ŵakwenelera kuti ŵakadangilire pa mulimo wakupeleka wovwiri. Ŵabali aŵa ŵangapempha ŵabali ŵakujipeleka kuti ŵakawovwirepo, ŵangapempha ŵapharazgi kuti ŵapeleke vinthu vinyake ivyo vikukhumbikwa panji ŵangagura waka vinthu na kugaŵira ŵabali na ŵadumbu awo ŵakhwaskika.

Pakuŵa mauwemi ghanandi para vinthu vikuchitika munthowa iyi. Vikovwira kuti ntchito yileke kuŵa yinandi, paleke kuŵa nthimbanizgo, kweniso kuti paleke kusakazika vyakupeleka. Vyanthena vingachitika para ŵabali ku mpingo ŵangachita waka vinthu paŵekha.

Ŵabali awo ŵatumika na ofesi ya munthavi ndiwo ŵangamanya unandi wa ndalama izo zikukhumbikwa kweniso unandi wa ŵanthu ŵakujipeleka awo ŵangakhumbikwa pakupeleka wovwiri. Kweniso ŵangakumana na ŵantchito za boma panji mafumu awo ŵangawovwira kuti mulimo wakupeleka wovwiri wende mwaluŵiro. Ntheura ŵanthu ŵakwenera yayi kutolera ndalama paŵekha na kutumizga vinthu uko kwachitika soka, panji kuluta ku malo uko kwachitika soka. Ŵangachita ivi pekha para ŵapempheka kuchita nthena.

Ndipouli para soka lachitika tikukhumbisiska kuti tovwirepo. (Heb 13:16) Pakuti tikuŵatemwa ŵabali na ŵadumbu ŵithu, kasi tingachita wuli kuti tovwirepo? Chakuzirwa chomene icho tingachita nkhuŵalombera ŵabali na ŵadumbu awo ŵakhwaskika kweniso awo ŵakupeleka wovwiri. Tingapelekaso vyakupeleka vithu ku mulimo wa pa charu chose. Chifukwa cha ulongozgi wakufuma ku Wupu Wakulongozga, ofesi ya munthavi ndiyo yikumanya makora uko vyakupeleka ivi vingawovwira chomene. Ndipo usange nase tikukhumba kuti tovwirepo pa mulimo uwu, tingalongora kuti tili ŵakunozgeka, para tingasayina fomu ya DC-50.

WONELERANI VIDIYO YA MUTU WAKUTI, MAJI GHAKUTUTUKA GHASAKAZA VINTHU KU BRAZIL, NDIPO PAMANYUMA ZGORANI FUMBO LAKULONDEZGAPO ILI:

Kasi ntchivichi chamukhorweskani na umo Ŵakaboni ŵa Yehova ŵakawovwilirapo apo maji ghakatutuka ku Brazil mu 2020?