Kasi Ŵakaboni ŵa Yehova Ŵakovwirapo Para Kwachitika Masoka?

Enya. Kanandi para kwachitika masoka, Ŵakaboni ŵa Yehova ŵakovwirapo. Tikovwira Ŵakaboni ŵanyithu kweniso ŵanthu ŵanyake. Ndivyo Baibolo likuyowoya pa Ŵagalatiya 6:10, likuti: ‘Tiyeni tichite icho ntchiwemi kwa wose, kweni chomenechomene kwa awo mbamoza na ise mu chipulikano.’ Tikuŵawovwiraso mwauzimu kweniso kuti ŵaleke kufipa mtima chomene.—2 Ŵakorinte 1:3, 4.

Umo Vikwendera

Para soka lachitika, ŵalara ŵa mipingo iyo yakhwaskika ŵakuyowoya na ŵabali na ŵadumbu kuti ŵamanye makora suzgo ilo lilipo, na wovwiri uwo ukukhumbikwa. Para ŵamanya, ŵakupeleka lipoti ku ofesi ya Ŵakaboni ŵa Yehova mu charu chawo panji charu chapafupi.

Para suzgo ndikuru chomene, Wupu Wakulongozga wa Ŵakaboni ŵa Yehova ukovwirapo. Ndimo ŵakachitira Ŵakhristu ŵakale apo kukaŵa njara. (1 Ŵakorinte 16:1-4) Ofesi ya Ŵakaboni ŵa Yehova mu charu icho mwawa suzgo yikusankha komiti yakulaŵilira ntchito yakupeleka wovwiri uwo wafuma ku likuru. Ŵakaboni ŵa Yehova ŵakufuma mu vyaru vinyake nawo ŵakovwirapo.—Zintharika 17:17.

Umo ndalama zikugwilira ntchito

Ndalama izo ŵanthu ŵakupeleka ku ofesi ya Ŵakaboni ŵa Yehova zikugwira ntchito zinandi. Yimoza yake nkhovwira pa nyengo ya suzgo. (Milimo 11:27-30; 2 Ŵakorinte 8:13-15) Awo ŵakovwira ŵanyawo pa nyengo ya suzgo ŵakulipirika yayi. Ntheura ndalama zikovwira pa ivyo vikukhumbikwa pera.—2 Ŵakorinte 8:20.