Salimo 23 ni sumu iyo yikulongora kuti munthu wakugomezga kuti Yehova wakumutemwa kweniso kumupwelelera. Davide, uyo wakalemba salimo ili, wakalongosora za ubwezi wakukhora uwo ukaŵa pakati pa iyo na Yehova, uyo wakati ni Muliska wake. Davide wakajiwonanga kuti ngwakuvikilirika chifukwa wakazomerezga kuti Yehova ndiyo wamulongozgenge, ndipo wakamugomezganga chomene. Wakamanya kuti Yehova walekengepo yayi kumulongora chitemwa umoyo wake wose. Chifukwa wuli wakagomezganga nthena? Davide wakawonanga kuti Yehova wakumupwelelera chifukwa chakuti nyengo zose wakamupanga ivyo wakakhumbikwiranga. Wakamanyangaso kuti Yehova ni mubwezi wake ndipo wakumutemwa. Lekani wakaŵa wakusimikizga kuti visuzge viti wuli, Yehova walutilirenge kumupa vyose ivyo wakukhumbikwira. Chifukwa chakuti Davide wakagomezganga kuti Yehova wakumutemwa na kumupwelelera, vikamovwira kuti waleke kwenjerwa, kweni wakondwenge na kuŵa wakukhorwa.—Sal. 16:11. w24.01 29 ¶12-13

Kufuma waka apo Nkhondo Yachiŵiri ya pa Charu Chose yikamalira, mu vyaru vinandi, ŵanthu ŵa Yehova ŵali pa mtende ndipo ŵali na wanangwa wakuchita ntchito yakupharazga. Nakuti ntchito iyi yikuluta panthazi chomene. Mazuŵa ghano, ŵabali ŵa mu Wupu Wakulongozga ŵakulutilira kulondezga ulongozgi wakufuma kwa Khristu. Ŵakukhumba kuti ulongozgi uwo ŵakupeleka ku ŵabali na ŵadumbu ukoleranenge na ivyo Yehova wakukhumba. Ŵakugwiliskira ntchito ŵalaŵiliri ŵa dera kweniso ŵalara kuti ŵapeleke ulongozgi ku mipingo. Ŵalara ŵakuphakazgika, kweniso ŵalara ŵanyake wose mu mpingo, ŵali mu ‘woko lamalyero’ la Khristu. (Chivu. 2:1) Ŵalara aŵa mbarunji yayi, ndipo nawo ŵakubudiska. Nga umo vikaŵira na ŵapositole, Mozesi na Joshuwa, nawo ŵakabudiskanga. (Maŵa. 20:12; Josh. 9:​14, 15; Rom. 3:23) M’paka sono, Khristu wakulongozga muzga wakugomezgeka na ŵalara, ndipo walutilirenge kuchita nthena. Ntheura tili na vifukwa vyakukwana vyakugomezgera ulongozgi uwo wakutipa kwizira mu ŵanthu awo ŵali kwimikika kulongozga. w24.02 23-24 ¶13-14

Mazuŵa ghano napo, tingamukondweska Yehova para tikuyowoya vyakukhwaskana na iyo munthowa yakulongora kuti tikumuwonga chomene kweniso kumutemwa. Para tili mu uteŵeti, tikumbukenge kuti chilato chithu chikuru nkhovwira ŵanthu kusendelera kwa Yehova, na kwamba kuŵawona Adada ŵithu ŵakuchanya nga umo ise tikuŵawonera. (Yak. 4:8) Tikukondwa kulongora ŵanthu umo Baibolo likumulongosolera Yehova, kuvumbura mikhaliro yake nga ntchitemwa, urunji, vinjeru, nkhongono, na mikhaliro yinyake yakukondweska. Tikulumbaso Yehova na kumukondweska para tikufwilirapo kumuyezga. Para tichitenge nthena, ŵanthu ŵawonenge kuti tikupambana chomene na ŵanthu ŵa mu charu chiheni ichi. (Mat. 5:​14-16) Ndipo apo tikuchita nawo vinthu vinyake vya zuŵa na zuŵa, tingaŵalongosolera chifukwa icho tikuchita vinthu mwakupambana na ŵanthu ŵanandi mu charu ichi. Ntheura ivi vikovwira ŵanthu ŵamitima yiwemi kusendelera kwa Chiuta. Para tikulumba Yehova munthowa izi, tikukondweska mtima wake.—1 Tim. 2:​3, 4. w24.02 10 ¶7