Kasi Mazgu gha Chiuta Ghali na Nkhongono pa Umoyo Winu wa Zuŵa na Zuŵa?

Kuŵazga Baibolo zuŵa lililose kungatovwira kuti ‘tijinthe misisi’ na ‘kukhazikika mu chipulikano.’ (Kol. 2:6, 7) Kweni kuti Mazgu gha Yehova ghaŵe na nkhongono pa umoyo withu, tikwenera kughanaghanirapo ivyo taŵazga na kulondezga fundo zake. (Heb. 4:12; Yak. 1:22-25) Lemba la Joshuwa 1:8 likuyowoya vinthu vitatu ivyo tikwenera kuchita para tikuŵazga Baibolo: (1) Kuŵazga Mazgu gha Chiuta “muhanya na usiku.” (2) Kuŵazga na ‘kughanaghanirapo.’ Tikwenera kuŵazga Baibolo mwambura kuchimbilira kuti tighanaghanirengepo na kumanya nkhani yose na ivyo vikachitika. (3) Kulondezga kufumira pasi pa mtima ‘vyose ivyo vili kulembekamo.’ ‘Vinthu vitenderenge makora’ ndiposo ‘tichitenge vinthu mwavinjeru’ para tilondezgenge masachizgo agha.