Nyengo zinandi Yesu wakarutanga kukacezga na ŵabwezi ŵake Lazaro, Mariya, na Marita awo ŵakakhalanga ku Betaniya, “pafupi-fupi makilomita ghatatu” kuvuma kwa Yerusalemu. (Yoh. 11:1, 18, NW, futunoti; 12:1-11; Luka 10:38-42; 19:29; wonani “Cigaŵa ca Yerusalemu,” pa peji 18.) Kukati kwakhala mazuŵa ghacoko waka kuti wafwe, Yesu wakaruta ku Yerusalemu mwakwendera ku Phiri la Olive. Iŵani na cithuzithuzi mu maghanoghano ghinu kuti mukumuwona Yesu wakwimilira na kulaŵiska kuzambwe kwa msumba na kwamba kuwulirira. (Luka 19:37-44) Ivyo wakawonanga vikwenera kuti vikaŵa vyakuyana waka na ivyo mukuwona pacanya pa peji lakurondezgapo. Pamanyuma pake wakanjira mu Yerusalemu uku wakwera pa mwana wa mbunda, kwambura kukayika, wakwenera kuti wakanjilira pa cimoza mwa vipata vya kuvuma kwa msumba. Mizinda yikamurumbanga nga ndi Themba lamuntazi.—Mat. 21:9-12.

[Cithuzithuzi pa peji 31]

Umo kukawonekerang kuzambwe para muntu wali pa Phiri la Olive mu nyengo ya Yesu