“Ŵakulutilira Kulondezga Mwanamberere”
“Aŵa ndiwo ŵakulutilira kulondezga Mwanamberere kulikose uko wakuya.”—UVU. 14:4.
1. Kasi ŵasambiri ŵanadi ŵa Yesu ŵakajipulikanga wuli cifukwa ca kumulondezga?
PAFUPIFUPI vilimika viŵiri na hafu vya uteŵeti wake, Yesu “wakasambizganga pa wumba mu Kaperenaumu.” “Ŵanandi ŵa ŵasambiri ŵake ŵakawelera ku vinthu vya kumanyuma ndipo ŵakendangaso nayo cara,” cifukwa ca kuzizikika na ivyo Yesu wakaŵaphalira. Apo Yesu wakafumba ŵapositole ŵake khumi na ŵaŵiri usange nawo ŵakakhumbanga kuleka kumulondezga, Simoni Petrosi wakamuzgora kuti: “Fumu, tilute tiye kwa njani? Imwe muli na mazgu gha umoyo wamuyirayira; ndipo tagomezga na kufika pa kumanya kuti imwe ndimwe Mutuŵa wa Ciuta.” (Yoh. 6:48, 59, 60, 66-69) Ŵasambiri ŵa Yesu ŵanadi ŵakaleka yayi kumulondezga. Ŵati ŵaphakazgika na mzimu utuŵa, ŵakalutilira kujilambika ku ulongozgi wa Yesu.—Mil. 16:7-10.
2. (a) Kasi “muzga wakugomezgeka na wakucenjera” panji kuti “muteŵeti mulara wakugomezgeka” ni njani? (b) Kasi muzga ‘wakulondezga wuli Mwanamberere’?
2 Wuli za Ŵakhristu ŵakuphakazgika na mzimu utuŵa ŵa mazuŵa ghano? Mu ucimi wake wakukhwaskana na “cimanyikwiro ca kuŵapo [kwake] na ca umaliro wa mgonezi,” Yesu wakayowoya za gulu la ŵalondezgi ŵake ŵakuphakazgika na mzimu utuŵa kuŵa “muzga wakugomezgeka na wakucenjera,” panji kuti “muteŵeti mulara wakugomezgeka.” (Mat. 24:3, 45; Luka 12:42) Pakuŵa gulu, wose pamoza ŵakulondezga na mtima wose “Mwanamberere kulikose uko wakuya.” (Ŵazgani Uvumbuzi 14:4, 5.) Ŵalondezgi ŵa Yesu aŵa, ŵakukhalilira ŵamwali mwauzimu cifukwa cakuti ŵakujikazuzga yayi na vigomezgo ndiposo maluso gha “Babuloni Mukuru,” nyinawo wa cisopa cautesi. (Uvu. 17:5) Visambizgo vyautesi ‘vikusangikamo cara mu milomo yawo,’ ndipo “mbambura kalema” kufuma ku caru ca Satana. (Yoh. 15:19) Munthazi, ŵakukhalira ŵa ŵakuphakazgika awo ŵacali pa caru capasi ‘ŵalondenge’ Mwanamberere kucanya.—Yoh. 13:36.
3. Cifukwa wuli nchakuzirwa kuti tigomezgenge gulu la muzga?
3 Yesu wali kwimika “muzga wakugomezgeka na wakucenjera” kupwelelera “ŵateŵeti ŵake ŵa pa nyumba,” ndiko kuti Mkhristu waliyose wakuphakazgika pa yekha, “kuŵapa cakurya cawo pa nyengo yakwenelera.” Wali kwimikaso muzga uyu kupwelelera “vyake vyose.” (Mat. 24:45-47) Vinthu “vyake” vikusazgapo “mzinda ukuru” wa “mberere zinyake,” uwo ukusazgikira. (Uvu. 7:9; Yoh. 10:16) Kasi Mkhristu waliyose wakuphakazgika na mzimu ndiposo ŵa “mberere zinyake” ŵakwenera kugomezga muzga uyo wimikika kuti waŵapwelelerenge? Pali vifukwa vinandi ivyo tikwenera kugomezgera gulu la muzga. Vifukwa viŵiri vyakuzirwa comene ni ivi: Cakwamba, Yehova wakugomezga gulu la muzga. Caciŵiri, Yesu nayo wakugomezga gulu la muzga. Tiyeni tiwone ukaboni uwo ukulongora kuti Yehova Ciuta na Yesu Khristu ŵakugomezga comene muzga wakugomezgeka na wakucenjera.
Yehova Wakugomezga Muzga
4. Cifukwa wuli tikwenera kugomezga cakurya cauzimu ico cikufuma kwa muzga wakugomezgeka na wakucenjera?
4 Ghanaghanirani ico cikovwira muzga wakugomezgeka na wakucenjera kupeleka cakurya ciwemi pa nyengo yakwenelera. Yehova wakayowoya kuti: “Tindikurunjikizge na kukusambizga nthowa iyo ukwenera kwendamo; tindikulongozge na jiso lane.” (Sal. 32:8) Nadi pano, Yehova ndiyo wakovwira muzga. Pa cifukwa ici, tikwenera kugomezga comene fundo za m’Malemba, kalongosolero kawemi ka Malemba na ulongozgi wa m’Malemba uwo tikupokera kwa muzga.
5. Nchivici cikulongora kuti mzimu wa Ciuta ukovwira muzga?
5 Yehova watumbikaso gulu la muzga na mzimu wake utuŵa. Nangauli mzimu wa Yehova tingawuwona yayi, kweni ivyo vikupambika mu ŵanthu awo ŵakulongozgeka nawo vikuwoneka. Awonani waka vinthu ivyo “muzga wakugomezgeka na wakucenjera” wafiska pa kupharazga za Yehova Ciuta, Mwana wake, na Ufumu pa caru cose. Ŵanthu awo ŵakusopa Yehova ŵakupharazga mwamwamphu uthenga wa Ufumu mu vyaru vyakujumpha 230 ndiposo mu virwa vinandi. Kasi uwu mbukaboni yayi wambura kususkika wakuti mzimu utuŵa ukovwira muzga? (Ŵazgani Milimo 1:8.) Kuti waphike na kupeleka cakurya cauzimu pa nyengo yakwenelera ku ŵanthu ŵa Yehova pa caru cose, muzga wakughanaghanira fundo zinandi comene. Pakulondezga ivyo wadumura, muzga wakulongora citemwa, kuzika, na vigaŵa vinyake vya cipambi ca mzimu.—Gal. 5:22, 23.
6, 7. Kasi Yehova wakugomezga wuli muzga wakugomezgeka?
6 Kuti mupulikiske kuti Yehova wakugomezga muzga wakugomezgeka, ghanaghanirani ivyo walayizga Ŵakhristu ŵakuphakazgika. Mpositole Paulosi wakalemba kuti: “Mbata yizamulira, ndipo ŵakufwa ŵazamuwuskika ŵambura kuvunda, ndipo ise tizamuzgoreka. Pakuti cakumanya kuvunda ici cikwenera kuvwara kuwura kuvunda, ndipo cakumanya kufwa ici cikwenera kuvwara kuwura kufwa.” (1 Kor. 15:52, 53) Ŵalondezgi ŵa Khristu ŵakuphakazgika, awo ŵakuteŵetera Ciuta mwakugomezgeka na kufwa mu thupi la wunthu ilo likumanya kuvunda, ŵakuwuskika mu thupi lauzimu lambura kumanya kufwa. Ŵakupika umoyo wambura kufwa na wambura kuparanyika. Nakuti ŵazamupokera mathupi agho ghangavunda yayi, ghambura kuthemba pa vilengiwa vinyake kuti ghasange nkhongono. Lemba la Uvumbuzi 4:4 likulongosora kuti ŵanthu aŵa ŵakhala pa vizumbe ndipo ŵavwara mphumphu zagolide. Ŵakhristu ŵakuphakazgika ŵazamupokera ucindami na nchindi. Kweni pali ukaboni unandi comene uwo ukulongora kuti Yehova wakugomezga muzga.
7 Lemba la Uvumbuzi Cipaturo 19:7, 8 likuti: “Nthengwa ya Mwanamberere yiza ndipo muwoli wake wanozgeka kale. Enya, iyo wazomerezgeka kuvwalikika salu yiwemi yakugabuka na yakutowa, pakuti salu yiwemi yikwimira milimo yaurunji ya ŵatuŵa.” Yehova wasora Ŵakhristu ŵakuphakazgika kuti ŵazakaŵe muwoli wa Mwana wake. Ŵakhristu aŵa ŵali kupika thupi lambura kufwa, umoyo wakuwura kufwa, kugomezgeka kweniso kuŵa ‘muwoli wa Mwanamberere,’ ivi ni vyawanangwa vyakuzizwiska comene. Vyawanangwa ivi ni ukaboni wakukhorweska wakuti Ciuta wakugomezga Ŵakhristu ŵakuphakazgika, awo “ŵakulutilira kulondezga Mwanamberere kulikose uko wakuya.”
Yesu Wakugomezga Muzga
8. Kasi Yesu walongora wuli kuti wakugomezga ŵalondezgi ŵake ŵakuphakazgika?
8 Kasi pali ukaboni wuli wakuti Yesu wakugomezga comene ŵalondezgi ŵake ŵakuphakazgika na mzimu? Pa usiku wakuti macero wafwenge, Yesu wakalayizga ŵapositole ŵake ŵakugomezgeka khumi na yumoza cinthu cinyake. Wakaŵaphalira kuti: “Imwe ndimwe mwakhala nane mu viyezgo vyane; ndipo nkhucita phangano na imwe, nga ni umo Ŵadada ŵacitira phangano na ine, la ufumu, mwakuti mukarye na kumwa pa thebulu lane mu ufumu wane, ndiposo kukhala pa vizumbe na kweruzga mafuko khumi na ghaŵiri gha Israyeli.” (Luka 22:28-30) Phangano ilo Yesu wakapangana na ŵasambiri ŵake khumi na yumoza likukhwaskaso Ŵakhristu wose ŵakuphakazgika ŵa 144,000. (Luka 12:32; Uvu. 5:9, 10; 14:1) Kuŵenge kuti Yesu wakuŵagomezga yayi, mphanyi wakapangana nawo phangano la kuzakawusira lumoza mu Ufumu?
9. Kasi vinthu “vyose” vya Khristu vikusazgapo vici?
9 Kweniso Yesu wimika muzga wakugomezgeka na wakucenjera “pa vyake vyose,” ndiko kuti pa vinthu vyose vya Ufumu vya pa caru capasi. (Mat. 24:47) Vinyake mwa vinthu ivi ni ivyo vili pa Ofesi iyo yikulaŵilira milimo ya pa caru cose ya Ŵakaboni ŵa Yehova, maofesi gha munthavi, Malo Ghakucitirapo Maungano Ghakuru, Nyumba za Ufumu pa caru cose ndiposo mulimo wa kupharazga na kuzgora ŵanthu kuŵa ŵasambiri. Kasi Yesu wangasora munthu wambura kugomezgeka kuti wapwelelerenge na kugwiliskira nchito vinthu vyakuzirwa ivi?
10. Nchivici cikulongora kuti Yesu wali na ŵalondezgi ŵake ŵakuphakazgika?
10 Apo wakaŵa pafupi kuluta kucanya, Yesu wakawonekera ku ŵasambiri ŵake ŵakugomezgeka ndipo wakaŵalayizga, wakati: “Wonani! Ine nili namwe mazuŵa ghose mpaka umaliro wa mgonezi.” (Mat. 28:20) Kasi Yesu wafiska layizgo ili? Mu vilimika 15 ivyo vyajumpha mipingo ya Ŵakaboni ŵa Yehova yasazgikira pa caru cose kufuma pa 70,000 kufika pa mipingo yakujumpha 100,000. Wuli za ŵanthu ŵaphya awo ŵakukolerana na gulu la Yehova? Ŵanthu ŵakujumpha 4,500,000 ŵakabapatizika mu vilimika 15 ivyo vyajumpha. Fundo iyi yikulongora kuti ŵanthu 800 ŵakabapatizikanga pa zuŵa. Kusazgikira uku mbukaboni wakuti Khristu wakulongozga ŵalondezgi ŵake ŵakuphakazgika pa maungano gha mpingo ndipo wakuŵawovwira kuzgora ŵanthu kuŵa ŵasambiri.
Muzga Ngwakugomezgeka Ndiposo Ngwakucenjera
11, 12. Kasi Muzga walongora wuli kuti ngwakugomezgeka ndiposo ngwakucenjera?
11 Pakuti Yehova Ciuta na Yesu Khristu ŵakugomezga comene muzga wakugomezgeka na wakucenjera, kasi ndimo nase tikwenera kucitira yayi? Ndipouli, muzga walongora kale kuti ngwakugomezgeka mu mulimo uwo wapika. Mwaciyelezgero, Gongwe la Mulinda lamara vilimika vyakujumpha 130 likupharazgika. Maungano gha mpingo, gha dera, na gha cigaŵa gha Ŵakaboni ŵa Yehova ghakulutilira kutikhozga mwauzimu.
12 Muzga wakugomezgeka ngwakucenjera cifukwa cakuti wakucita vinthu pambere wandalongozgeke na Yehova yayi, nanga nkhutondeka kulondezga ulongozgi Wake wakupulikikwa makora. Mwaciyelezgero, ŵaliska ŵa visopa wakuzomerezga panji kuwona nga palije suzgo yiliyose na ucikanamalango uwo ŵanthu ŵakucita, kweni muzga wakucenjezga za uheni uwo ukucitika mu caru ca Satana. Muzga wakupeleka ulongozgi wamahara pa nyengo yake cifukwa Yehova Ciuta na Yesu Khristu ŵakumutumbika. Pa cifukwa ici, tikwenera kumugomezga na mtima wose. Kasi tingalongora wuli kuti tikugomezga muzga wakugomezgeka na wakucenjera?
‘Lutani’ na Ŵakuphakazgika Apo Ŵakulondezga Mwanamberere
13. Kuyana na ucimi wa Zekariya, cifukwa wuli nchamacitiko kugomezga muzga wakugomezgeka na wakucenjera?
13 Buku la Zekariya likuyowoya za “ŵanthu khumi” awo ŵakaluta kwa “Muyuda” na kuyowoya kuti: “Mutizomerezge tilute tose.” (Ŵazgani Zekariya 8:23. ) Mwanalume uyo ni “Muyuda” wakwimira gulu la ŵanthu. Lero wakwimira Ŵakhristu ŵakuphakazgika awo ŵacali pano pa caru capasi, ŵeneawo nchigaŵa ca “Israyeli wa Ciuta.” (Gal. 6:16) “Ŵanthu khumi ŵa mafuko gha kayowoyero kose” ŵakwimira mzinda ukuru wa mberere zinyake. Nga umo Ŵakhristu ŵakuphakazgika ŵakulondezgera Yesu kulikose uko wakuya, mzinda ukuru nawo ‘ukuluta’ panji kulondezga muzga wakugomezgeka na wakucenjera. Ŵamzinda ukuru ŵakwenera kukhozgeka soni cara cifukwa ca kukolerana na “ŵakusangana mu nchemo yakucanya.” (Heb. 3:1) Yesu kuti wakukhozgeka soni yayi kucema ŵakuphakazgika kuti “ŵabali.”—Heb. 2:11.
14. Kasi tingawovwira wuli mwakugomezgeka ŵabali ŵa Khristu?
14 Yesu Khristu wakayowoya kuti para tikovwira ŵabali ŵake ndikuti tikovwira iyo. (Ŵazgani Mateyu 25:40.) Kasi awo ŵali na cilindizga ca kuzakakhala pa caru capasi ŵakovwira wuli ŵabali ŵa Khristu ŵakuphakazgika? Comenecomene mwa kupharazga Ufumu. (Mat. 24:14; Yoh. 14:12) Apo Ŵakhristu ŵakuphakazgika awo ŵali pa caru capasi ŵakucepa, ŵamberere zinyake ŵakusazgikira. Para awo ŵali na cilindizga ca kuzakakhala pa caru capasi ŵakucita mulimo wa kupharazga, ndikuti ŵakovwira ŵakuphakazgika kufiska mulimo wa kuzgora ŵanthu kuŵa ŵasambiri. (Mat. 28:19, 20) Tiliso na mwaŵi ukuru wa kupeleka vyawanangwa kukhozgera mulimo uwu.
15. Kasi Mkhristu waliyose payekha wakwenera kucita wuli na cakurya cauzimu ca panyengo yake na fundo izo muzga wadumura?
15 Kasi ise, waliyose payekha, tikuwona wuli cakurya cauzimu ico muzga wakugomezgeka wakupeleka kwizira mu mabuku ghakulongosora Baibolo ndiposo maungano? Kasi tikusambira na kulondezga ivyo tasambira? Kasi tikucita wuli na fundo izo muzga wadumura? Kupulikira ulongozgi uwo tapika kukulongora cipulikano cithu mwa Yehova.—Yak. 3:17.
16. Cifukwa wuli Ŵakhristu wose ŵakwenera kupulikizga ku ivyo ŵabali ŵa Khristu ŵakuyowoya?
16 Yesu wakati, “mberere zane zikupulika mazgu ghane, ndipo nkhuzimanya, ndiposo zikunilondezga.” (Yoh. 10:27) Ndimo viliri na Ŵakhristu ŵakuphakazgika. Wuli za awo ‘ŵakuluta’ nawo? Aŵa nawo ŵakwenera kupulikizga ku ivyo Yesu wakuyowoya. Kweniso ŵakwenera kupulikizga ku ivyo ŵabali ŵa Yesu ŵakuyowoya. Nakuti Ŵakhristu ŵakuphakazgika ŵali kupika mulimo ukuru wa kupwelelera umoyo wauzimu wa ŵanthu ŵa Ciuta. Kasi kupulikira ivyo ŵabali ŵa Khristu ŵakuyowoya kukusazgapo vici?
17. Kasi kupulikira gulu la muzga kukusazgapo vici?
17 Mazuŵa ghano, Wupu Wakulongozga ndiwo ukwimira muzga wakugomezgeka na wavinjeru. Wupu uwu ukulongozga mulimo wa kupharazga Ufumu pa caru cose. Awo ŵakuteŵetera mu wupu uwu ŵakumanya vinandi vyakukhwaskana na Mazgu gha Ciuta, mbalara ŵakuphakazgika na mzimu wa Ciuta. Tingayowoya kuti aŵa ndiwo “ŵakulongozga” pakati pithu. (Heb. 13:7) Ŵalaŵiliri ŵakuphakazgika aŵa ŵali na “vyakucita vinandi mu mulimo wa Fumu,” cifukwa ŵakupwelelera ŵapharazgi ŵa Ufumu ŵakujumpha 7,000,000 pa caru cose ndiposo mipingo yakujumpha 100,000. (1 Kor. 15:58) Kupulikira gulu la muzga kukung’anamura kukolerana na Wupu Wakulongozga.
Awo Ŵakupulikira Muzga Ŵakutumbikika
18, 19. (a) Kasi awo ŵakupulikira muzga wakugomezgeka na wakucenjera ŵakutumbikika wuli? (b) Kasi tikwenera kuyezgayezga kucita vici?
18 Kufuma apo wakimikika, muzga wakugomezgeka na wakucenjera wakutolera ŵanandi “ku urunji.” (Dan. 12:3) Ŵamoza ŵawo ni awo ŵali na cilindizga ca kuzakapona pharanyiko la mgonezi uheni uwu. Ni thumbiko kuŵa paubwezi na Ciuta.
19 Munthazi, para ‘msumba utuŵa, Yerusalemu Muphya [wakupangika na ŵa 144,000], wakhirenge kufuma kucanya kwa Ciuta, wakunozgeka nga ni mwali wakutozgekera mfumu wake,’ kasi awo ŵapulikira ivyo muzga wakuyowoya ŵazamuwona vici? Baibolo likuti: “Ciuta iyomwene wazamuŵa nawo. Ndipo wazamufyura sozi lililose ku maso ghawo, ndipo nyifwa yizamuŵakoso cara, nesi kutengera panji kutampha nesi vyakuŵinya vizamuŵakoso cara. Vinthu vyakale vyafumapo.” (Uvu. 21:2-4) Mphanyi tose tayezgayezga kupulikira Khristu na kugomezga ŵabali ŵake ŵakuphakazgika.
Kasi Tasambiraci?
• Kasi pali ukaboni wuli wakuti Yehova wakugomezga muzga wakugomezgeka na wakucenjera?
• Ni vici ivyo vikulongora kuti Yesu Khristu wakugomezga comene muzga?
• Cifukwa wuli tikwenera kugomezga muteŵeti mulara wakugomezgeka?
• Kasi tikulongora wuli kuti tikugomezga muzga?
[Cithuzithuzi pa peji 25]
Kasi mukumanya uyo Yehova wasora kuti wazakaŵe mwali wa Mwana wake?
[Cithuzithuzi pa peji 26]
Yesu wali kuŵikizga vinthu “vyake” kwa muzga wakugomezgeka na wakucenjera
[Cithuzithuzi pa peji 27]
Tikovwira ŵakuphakazgika para tikucita mulimo wa kupharazga