Umo Mungazizipizgira Para Munyinu wa mu Nthengwa Wamwenderani Mphiska

MAGARITA na mfumu wake Rauli, ŵakacita uteŵeti wanyengozose kwa vilimika vinandi.a Kweni mwana wawo wakwamba wakati wababika waka, Rauli wakamba kuwelera nyuma mwauzimu. Paumaliro, Rauli wakamba nkharo ziheni ndipo wakasezgeka mu mpingo. Magarita wakati: “Apo vyose ivi vikacitikanga, nkhawona kuti kulijeso ico cakhalako pa umoyo wane. Mtima wane ukasweka, ndipo mahara ghakanimalira.”

Jeni wakati watengwa waka, mfumu wake wakamba kumwendera mphiska. Wakamba kumutimba. Jeni wakati: “Apo wakanitimba kakwamba, nkhazizikika comene, soni zikanikora, ndipo nkhayuyulika. Wakamba kaluso kakuti para wanitimba wakatenge nimugowokere. Pakuti ndine Mkhristu nkhawona kuti nchakwenelera kugowoka na kusulako. Nkhawonangaso kuti para ningaphalira waliyose suzgo lithu, nanga ŵangaŵa ŵalara mu mpingo mbwenu nilongorenge kuti ndine wambura kugomezgeka. Kwa vilimika vinandi wakanitimbanga ndipo nkhalutilira kumugowokera. Pa nyengo iyi, nkhapenjerezganga ico ningacita kuti mfumu wane wanitemwenge. Wakati wanileka pamoza na mwana, nkhawona kuti nili wakutondeka, mahara gha umo ningavikililira nthengwa ghakanimalira.”

Para mfumu winu wamwenderani mphiska, nga ni Magarita na Jeni, namwe mungasuzgika maghanoghano, mungasoŵa ndalama, ndiposo umoyo winu wauzimu ungatimbanizgika. Para ndimwe mfumu, namwe mungasuzgika maghanoghano cifukwa cakuti muwoli winu wamwenderani mphiska. Nga umo Baibolo likuyowoyera, tingasuska yayi kuti tikukhala mu “nyengo zinonono na zakusuzga.” Ucimi uwu ukulongora kuti mu “mazuŵa ghaumaliro,” mbumba zizamusweka, ndipo citemwa cizamusoŵerathu. Ŵanji ŵazamuyowoya waka pa mulomo kuti ŵakuteŵetera Ciuta. (2 Tim. 3:1-5) Ŵakhristu ŵaunenesko nawo masuzgo agha ghakuŵawira. Kweni kasi nchivici cingamovwirani kuzizipizga para munyinu wa mu nthengwa wamwenderani mphiska?

Jiwonani Nga Umo Yehova Wakumuwonerani

Pakwamba cingamuŵirani cinonono kupulikiska kuti munthu uyo mukumutemwa wamucitirani vinthu viheni. Nyengo zinyake mungamba kujipa mulandu cifukwa ca viheni ivyo munyinu wa mu nthengwa wamucitirani.

Kweni kumbukani kuti nanga ni munthu wakufikapo, Yesu, uyo wakamwendera mphiska wakaŵa munthu wakuti wakamugomezganga na kumutemwa. Yesu wakasora ŵabwezi ŵake, panji kuti ŵapositole pamanyuma pa kulomba. Pa nyengo iyi, wose 12 ŵakaŵa ŵateŵeti ŵakugomezgeka ŵa Yehova. Nchakuwonekerathu kuti Yesu wakakwenyelera comene Yudasi wakati wazgoka “wakumwendera mphiska.” (Luka 6:12-16) Kweni Yehova wakawona kuti ivyo Yudasi wakacita, likaŵa suzgo la Yesu yayi.

Mbunenesko kuti palije muwoli panji mfumu uyo ngwakufikapo. Ŵakutorana wose ŵakupuvya. Wamasalmo munyake wakalemba kuti: “Usange Imwe, A Yehova, muŵanikenge maubendezi, kasi ndinjani wangima?” (Sal. 130:3) Para ŵakutorana ŵabudirana, ŵakwenera kugowokerana nga umo Yehova wakucitira.—1 Pet. 4:8.

Ndipouli, “waliyose wa ise wazamujipatawulira iyomwene kwa Ciuta.” (Rom. 14:12) Mu nthengwa, uyo wakuyowoya panji kucita mwamsinjiro wazamujipatawulira yekha kwa Yehova. Yehova wakutinkha nkhaza na mazgu ghamsinjiro, ntheura palije cifukwa cilicose ca kucitira munyithu wa mu nthengwa nkhaza panji msinjiro. (Sal. 11:5; Efe. 5:33; Kol. 3:6-8) Nakuti usange Mkhristu wakukalipa mwakuwerezgawerezga ndipo wakuwonekerathu kuti wasinthenge yayi, wakwenera kusezgeka mu mpingo. (Gal. 5:19-21; 2 Yoh. 9, 10) Para muwoli panji mfumu waphalira ŵalara nkhani iyi, waleke kuwona kuti wananga. Nakuti Yehova wakucitira citima awo ŵacitirika nkhaza.

Para yumoza mu nthengwa wacita uleŵi, wabudira munyake pera yayi, kweniso Yehova. (Mat. 19:4-9; Heb. 13:4) Usange uyo wabudilika wakulondezga fundo za mu Baibolo, waleke kujipa mulandu cifukwa cakuti munyake wamwendera mphiska mwa kucita uleŵi.

Kumbukani kuti Yehova wakumanya umo mukujipulikira. Wakujilongosora kuŵa mfumu wa mtundu wa Israyeli, ndipo Mazgu ghake ghakulongora kuti vikamuŵinyanga para mtundu wa Israyeli wacita uleŵi wauzimu. (Yes. 54:5, 6; Yer. 3:1, 6-10) Manyani kuti Yehova wakumanya makora comene citima ico mukuŵa naco para munyinu wa mu nthengwa wamwenderani mphiska. (Mal. 2:13, 14) Wakumanya kuti mukukhumbikwira cipembuzgo.

Umo Yehova Wakupembuzgira

Mpingo Wacikhristu ni malo ghamoza agho Yehova wakupelekerako cipembuzgo. Ndiko Jeni wakasanga cipembuzgo. Jeni wakati: “Mulaŵiliri wa dera wakiza pa nyengo iyo nkhasuzgikanga comene maghanoghano. Wakamanya kuti nkhakweŵekanga mtima cifukwa cakuti mfumu wane wakatora cisamoni ca kumazgira nthengwa. Mulaŵiliri wa dera wakaniphalira kuti nighanaghanirepo pa malemba nga ni 1 Ŵakorinte 7:15. Baibolo ndiposo ivyo wakayowoya vikanipembuzga mwakuti nkhasanga mtende wa mu mtima.”b

Magarita, uyo wazunulika pakwamba pa nkhani iyi, nayo wakawona kuti Yehova wakovwira kwizira mu mpingo Wacikhristu. Magarita wakati: “Nkhati nawona kuti mfumu wane wasinthenge yayi, nkhatora ŵana ŵane na kusamira ku msumba unyake. Nkhasanga nyumba ya renti ya vipinda viŵiri. Zuŵa lakulondezgapo apo nkhapanguluranga katundu wane mu vikwama uku nili na citima, nkhapulika kukhung’uska pa cijaro. Nkhaghanaghananga kuti mbeneko ŵa nyumba. Kweni nkhazizwa kuwona kuti ni mudumbu uyo wakasambizga Baibolo amama na kovwira mbumba yakwithu kumanya unenesko. Wakaghanaghanangako yayi kuti wangakumana nane, cifukwa wakapukwa ŵeneko ŵa nyumba kuti wasambire nawo Baibolo. Nkhapembuzgika comene. Nkhamulongosolera nkhani yose, ndipo tose tikamba kulira. Zuŵa leneliro wakatovwira kuti tilute ku maungano. Mpingo ukatipokelera makora, ndipo ŵalara ŵakanovwira kuti nipwelelere ŵana ŵane mwauzimu.”

Kasi Ŵanji Ŵangawovwira Wuli?

Pali nthowa zinandi izo ŵabali na ŵadumbu mu mpingo ŵangawovwilirapo. Mwaciyelezgero, pa nyengo iyi Magarita wakeneranga kusanga nchito. Mbumba yinyake mu mpingo yikajipeleka kuti yovwirenge ŵana ŵake para ŵawera ku sukulu usange ŵangakhumba wovwiri.

Magarita wakati: “Nkhuwonga comene para ŵabali na ŵadumbu ŵakwenda nane mu uteŵeti pamoza na ŵana ŵane.” Para ŵabali na ŵadumbu ŵakucita nthena, ŵakovwirana “kuyegherana vizito” ndipo ŵakufiska “dango la Khristu.”—Gal. 6:2.

Awo ŵakusuzgika cifukwa ca maubudi gha ŵanyawo ŵakuwonga comene wovwiri uwu. Monika, uyo mfumu wake wakamujowora na kumulekera waka $15,000 na ŵana ŵanayi, wakati: “Ŵabali na ŵadumbu ŵauzimu ŵakatovwira comene. Nkhumanya yayi ico cikatenge cicitikenge ŵalekenge kutovwira. Nkhuwona kuti Yehova wali kupeleka ŵabali ŵawemi comene, awo ŵawovwira ŵana ŵane. Ndine wakukondwa comene cifukwa ŵana ŵane mbakukhwima mwauzimu cifukwa ca wovwiri wa ŵabali. Para nakhumba ulongozgi, ŵalara ŵakanovwiranga. Para nakhumba kupungura vyakusingo, ŵakanitegherezganga.”—Mrk. 10:29, 30.

Mbunenesko kuti pakuŵa nyengo iyo mubwezi wakuwona kuti nchiwemi yayi kukumbuska vinthu vyacitima ivyo vyacitikira munyake. (Muph. 3:7) Magarita wakati: “Kanandi nkhatemwanga kuyowoya na ŵadumbu ŵa mu mpingo wane uphya nkhani zakukhwaskana na upharazgi, masambiro gha Baibolo, ŵana ŵithu, na vinyake vyantheura kupatulako za masuzgo ghane. Nkhuwonga comene cifukwa cakuti ŵakanikumbuskanga vinthu vyakale yayi, kweni ŵakanovwira kwamba umoyo uphya.”

Kuwezgera Cara

Nyengo zinyake, m’malo mwa kujipa mulandu cifukwa ca kwananga kwa munyinu wa mu nthengwa, mungamba kughanaghana za kuwezgera cifukwa cakuti mukusuzgika na ivyo wacita. Para maghanoghano agha mungaghalekelera, paumaliro ghangananga ubwezi winu na Yehova. Mwaciyelezgero, mungamba kupenja nthowa za kuwezgera cifukwa cakuti wamwenderani mphiska.

Usange mukuwona kuti mu mtima winu mwamba kwiza maghanoghano ghakuwezgera, cingaŵa ciwemi kukumbuka umo Joshua na Kalebi ŵakacitira. Ŵanalume ŵakugomezgeka aŵa ŵakaŵika umoyo wawo pa ngozi apo ŵakakapaciranga Caru ca Layizgano. Mphaci zinyake zikaŵavya cipulikano ndipo zikacitiska ŵanthu kuti ŵaleke kupulikira Yehova. Nakuti Ŵaisrayeli ŵanji ŵakakhumbanga kudinya Joshua na Kalebi apo ŵakaŵaciskanga kuti ŵalutilire kugomezgeka kwa Yehova. (Maŵa. 13:25–14:10) Joshua na Kalebi ŵakacicizgika kukhala mu mapopa kwa vilimika 40, cifukwa ca kwananga kwawo yayi, kweni cifukwa ca ivyo Ŵaisrayeli ŵanji ŵakacita.

Nangauli Joshua na Kalebi ŵakwenera kuti ŵakakhuŵara, kweni ŵakaŵavya maghanoghano gha kuwezgera ŵabali ŵawo. M’malo mwake, ŵakaŵika mtima wawo wose pa kuteŵetera Yehova. Paumaliro wa vilimika 40 ivyo ŵakaŵira mu mapopa, Joshua na Kalebi pamoza na Ŵalevi ŵakapona na kunjira mu Caru ca Layizgano, nangauli ŵa muwiro wawo ŵakamalira mu mapopa.—Maŵa. 14:28-30; Josh. 14:6-12.

Viheni ivyo munyinu wa mu nthengwa wacita mungasuzgika navyo kwa nyengo yitali. Nthengwa yingamara, mungasuzgika maghanoghano, ndipo ndalama zingamusoŵani. Ndipouli, m’malo mwa kudodoliska waka pa viheni ivyo vyacitika, kumbukani kuti Yehova wakumanya makora umo wangacitira na munthu uyo wakuyuyura malango ghake, ndipo ivyo vikacitikira Ŵaisrayeli ŵambura kugomezgeka vikulongora makora fundo iyi.—Heb. 10:30, 31; 13:4.

Mungazizipizga

M’malo mwa kukweŵeka na viheni ivyo vyacitika, zuzgani maghanoghano ghinu na vinthu vyauzimu. Jeni wakati: “Nkhawona kuti kutegherezga matepi gha Gongwe la Mulinda na Galamukani! kukanovwira kuti nizizipizge. Maungano naghoso ghakanikhozga comene. Kuzgorapo mwakukwana pa maungano kukanovwira kuti nileke kughanaghanira comene masuzgo ghane. Kupharazga nako kukanovwira. Apo nkhawovwiranga ŵanji kuti ŵamanye Yehova, cipulikano cane cikakhoranga. Kweniso kovwira ŵasambiri ŵa Baibolo kukanovwira kuti niŵike mtima pa vinthu vyakuzirwa comene.”

Monika, uyo wazunulika mu nkhani iyi, wakati: “Kuluta ku maungano nyengo zose ndiposo kupharazga mwakukwana, kwanovwira kuti nizizipizge. Ine na ŵana ŵane tikutemwana comene kweniso tikutemwana na ŵabali na ŵadumbu mu mpingo. Masuzgo ghane ghanovwira kumanya ivyo nkhutondeka. Nayezgeka, kweni Yehova wanovwira kuti nizizipizge.”

Namwe mungazizipizga viyezgo vyakuyana waka. Nangauli vingamuŵinyani comene para munyinu wa mu nthengwa wamwenderani mphiska, fwiliranipo kulondezga ulongozgi wa Paulosi wakuti: “Tingagongowanga cara pakucita ico nchiwemi, cifukwa mu nyengo yakwenelera tizamuvuna usange tikuvuka cara.”—Gal. 6:9.

[Mazgu ghamusi]

[Cithuzithuzi pa peji 31]

Awo ŵajoworeka na munyawo wa mu nthengwa, ŵakuwonga comene awo ŵakuŵawovwira mu uteŵeti