Umo Nyerere Zikutozgera Tumphondo Twake

Tuvibenene tukwenera kuŵa twakutowa kuti tukwaniske kuduka, kukwera pa malo ghanyake, kweniso kumanya vinthu ivyo vili pafupi nato. Mwachiyelezgero, para tumphondo twa nyerere tungaŵa twakubinkha, yingatondeka kumanya uko yikuluta, yingatondeka kuyowoyeskana na zinyake, kweniso yingatondeka kunuska vinthu. Lekani nkhwantha yinyake yakusanda vinyama zina lake Alexander yikayowoya kuti “muzamuwonapo yayi kachibenene ako nkhakubinkha. Tuvibenene tose tukumanya ivyo tukwenera kuchita kuti tuleke kuŵa twakubinkha.”

Ghanaghanirani fundo iyi: Hackmann na ŵanyake ŵakachita kafukufuku wa umo zikuchitira nyerere zinyake zakuchemeka Camponotus rufifemur kuti zitoweskenge tumphondo twake. Ndipo ŵakasanga kuti nyerere yikupindanga tumalundi twake na kukora tumphondo twake kuti yifyure ivyo vyademelera ku tumphondo twake. Tumaweya twake uto nthukulu tukovwira kuphata tunthu tukulutukulu uto twademelera ku tumphondo twake. Tunthu tuchokotuchoko uto twademelera yikutuwuskako na tumaweya twake tuchokotuchoko uto tukuwoneka nga nkhachiskaku. Ndipo tunthu tuchokotuchoko chomene, yikutuphata na tumaweya uto nthuchokotuchoko chomene.

Wonani umo nyerere yikutozgera tumphondo twake

Hackmann na ŵanyake ŵakasanga kuti ivyo nyerere zikuchita pakutoweska tumphondo twake vingawovwira chomene mu mafakitale. Mwachiyelezgero, nthowa yeneyiyi ŵangagwiliskira pakutozga vinthu ivyo vingasweka mwaluŵiro chifukwa ivyo ŵakugwiliskira ntchito vingagwira makora ntchito yake para vingaŵa vyakutowa nyengo zose.

Kasi imwe mukuwona wuli: Kasi vikachitika waka vyekha kuti nyerere yifyurenge tumphondo twake? Panji pali munyake uyo wakazilenga na luso lwa nthena?