Kasi Ŵanji Ŵakusambiraci kwa Imwe Para Ŵakuwona Ivyo Mukucita?
1. Kasi ŵasambiri ŵa Yesu ŵakasambirangaci kwa iyo apo ŵakawonanga vyakucita vyake?
1 Yesu wakati: “Jitolerani joko lane ndipo sambirani kwa ine.” (Mat. 11:29) Ici cikulongora kuti Yesu wakasambizganga ŵanthu na mazgu pera yayi, kweni wakasambizgangaso kwizira mu ivyo wakacitanga. Ghanaghanirani ivyo ŵasambiri ŵa Yesu ŵakasambira kwa iyo apo ŵakawonanga ivyo wakacitanga. Wakaŵa wakuzika, walusungu ndiposo wacitemwa. (Mat. 8:1-3; Mrk. 6:30-34) Wakaŵa wakujiyuyura nadi. (Yoh. 13:2-5) Apo ŵasambiri ŵakendanga na Yesu, ŵakawonanga kuti wakalimbikiranga uteŵeti ndipo wakasambizganga ŵanji unenesko mwakukhorweska. (Luka 8:1; 21:37, 38) Kasi ŵanji ŵakusambirako vici kwa ise para ŵakutiwona mu uteŵeti?
2. Kasi kuvwara makora ndiposo kuŵa na nkharo yiwemi mu uteŵeti vikovwira wuli awo tikuŵapharazgira?
2 Awo Tikuŵapharazgira: Awo tikuŵapharazgira vikuŵakondweska para ŵakuwona kuti tikuvwara makora, tili na nkharo yiwemi ndiposo tikulongora kuti tikuŵatemwa. (2 Kor. 6:3; Fil. 1:27) Ŵakuwona kuti kanandi tikujura Baibolo para tikuŵalongosolera fundo. Ŵanji ŵakukondwa kuti tikuŵategherezga makora para ŵakuyowoya. Manyani kuti nchakuzirwa comene kucita vinthu ivi kuti ŵanthu ŵanweke na uthenga wa Ufumu.
3. Kasi tingakhozga wuli ŵabali ŵithu?
3 Ŵabali Ŵithu: Ghanaghaniraniso umo ŵabali ŵithu ŵakujipulikira para ŵakuwona ivyo tikucita. Ŵanji ŵangatolerako mwamphu withu mu uteŵeti. Pakuti cisulo cikunora cisulo cinyake, para tanozgekera makora upharazgi withu, tikuciska ŵanji kuti nawo ŵaŵe ŵaluso. (Zinth. 27:17) Para tikuyezgayezga kulemba mazina gha ŵakunweka, na kuwelerako mwaluŵiro, tikovwira ŵanji kuti nawo ndimo ŵacitirenge. Para tikufiska mwakukwana uteŵeti withu, ŵateŵeti ŵanyithu ŵakhozgekenge comene.—2 Tim. 4:5.
4. Cifukwa wuli nyengo na nyengo tikwenera kusanda nkharo yithu?
4 Nyengo na nyengo mukwenera kusanda ivyo mukucita na ivyo mukuyowoya ndiposo ivyo ŵanji ŵakusambirako kwa imwe. Para tikulongora ciyelezgero ciwemi, tikukondweska Yehova ndipo vikutovwira kuti nase tizakayowoye nga umo mpositole Paulosi wakayowoyera, apo wakati: “Muŵe ŵakuyezga ine, umo nane niliri wakuyezga Khristu.”—1 Kor. 11:1.