Ivyo Vingatovwira Kuti Tiŵe Ŵaluso mu Uteŵeti—Sambizgani Ŵaphya Kupharazga

Chifukwa Wuli Nkhwakuzirwa? Ŵasambiri ŵaphya ŵa Yesu ŵakwenera kusambira kuti ŵasungilire “vinthu vyose” ivyo wakayowoya kuti ŵasambizgenge ŵanthu unenesko. (Mat. 28:19, 20) Ŵaphya ŵanandi ŵali kwamba kale kuyowoya nkhani mu Sukulu ya Uteŵeti wa Chiuta. Ndipo ŵanyake ŵakupharazga apo m’pata wasangika ku ŵamumbumba yawo panji ŵabwezi ŵawo. Ŵakupharazga chifukwa chakuti ŵakulondezga ivyo ŵakusambira. Ndiposo ŵakumanya makora khumbo la Yehova lakuti ŵanthu wose ŵapulike makani ghawemi. (Rom. 10:13, 14) Para ŵaphya ŵazomerezgeka kuti ŵaŵe ŵapharazgi ŵambura kubatizika, ŵakwenera kusambizgika makora kuti ŵaŵe ŵakukhora apo ŵakukura mwauzimu.—Luka 6:40.

Umo Tingachitira:

Mupharazgi muphya mupani mabuku ghakupharazgira na ghakusambizgira. Mulongorani umo mukuŵikira mabuku mu chikwama chinu. Mulongosolerani chilato cha buku lililose ilo mwanyamura.
Sankhirani lumoza chiyelezgero mu Uteŵeti Withu wa Ufumu. Yezgelerani umo mungapharazgira munthu na kumusambizga. Muphalirani mupharazgi muphya kuti waleke kusungilira waka mazgu pa mtima. Yezgelerani masachizgo agho ghali mu buku la Sukulu ya Uteŵeti pa peji 82, agho ghakukolerana na chigaŵa chinu. Didimizganipo uwemi wa kuvwara mwantchindi na kujitozga mwakwenelera.—2 Kor. 6:3, 4.
Lutilirani kumusambizga. Mulongorani mafomu gha chigaŵa cha kupharazgako. Musambizgani umo wangagwiliskira ntchito jw.org mu uteŵeti, kweniso umo wangalembera pa fomu yakuti, Cholembapo cha Kunyumba ndi Nyumba. Mulongorani umo wangalembera ŵanthu ŵakunweka. Musambizgani umo wangapharazgira na kabuku kakuti Makani Ghawemi ku Ŵanthu ŵa Mitundu Yose. Movwirani umo wangachitira para wasanga munthu wakunweka.—1 Kor. 3:6.
Zikirani ndipo muwongani (Zinth. 25:11) Ŵani chiyelezgero chiwemi. Para mukulimbikira kovwira muphya vingawovwira kuti wazakachite makora kunthazi.

Yezgani Sachizgo Ili Mwezi Uno:

Pharazgani lumoza na msambiri winu ku nyumba na nyumba. Lutirani lumoza ku maulendo ghakuwelerako panji ku sambiro. Para mulije msambiri, pemphani mupharazgi muphya kuti mwendere lumoza.