Umo Mungasambizgira Ŵaphya Kupharazga
1. Kasi mukajipulika wuli apo mukanjira mu uteŵeti wa m’munda zuŵa lakwamba?
1 Kasi mukukumbuka zuŵa lakwamba apo mukanjira mu uteŵeti wa m’munda? Mukwenera kuti mukaŵa na wofi comene. Para mukenda na uyo wakamusambizganinge Baibolo panji mupharazgi munyake, mwambura kukayika mukaŵa ŵakukondwa apo wakamovwiraninge. Pakuti sono mwamanya kupharazga, muli na udindo wa kusambizga ŵaphya kupharazga.
2. Kasi ŵapharazgi ŵaphya ŵakukhumbikwira kusambira vici?
2 Ŵapharazgi ŵaphya ŵakukhumbikwira kusambira umo ŵangambira kudumbiskana na munthu, umo ŵangagwiliskira nchito Baibolo, umo ŵangacitira maulendo ghakuwelerako, ndiposo kwambiska na kucitiska masambiro gha Baibolo. Ŵakweneraso kusambira umo ŵangacitira maupharazgi ghakupambanapambana nga ni kupharazga mu misewu, kweniso ku malo ghakuguliskira malonda. Mungaŵawovwira kuti ŵacitenge makora maupharazgi agha kwizira mu ivyo mukucita ndiposo kuŵapa masacizgo.
3. Kasi ŵanji ŵangawovwirika wuli para ŵakuwona umo ise tikucitira?
3 Sambizgani Kwizira mu Ivyo Mukucita: Yesu wakalongora ŵasambiri ŵake umo ŵangapharazgira. (Luka 8:1; 1 Pet. 2:21) Para mwendenge na mupharazgi muphya, nozgekerani upharazgi upusu uwo mupharazgi muphya wangalondezga. Mutepanji mungalondezga masacizgo agho ghakuŵa mu mabuku ghithu. Pamanyuma, pharazgani pa nyumba yimoza panji ziŵiri mwakuti mupharazgi muphya wawone umo mukucitira. Para mukuluta pa nyumba yinyake, mungamufumba kuti wayowoyepo umo wanguwonera upharazgi winu. Ici ciwovwirenge kuti wawone kuzirwa kwa kupharazga na ŵanji ndipo cimuŵirenge cipusu kulondezga masacizgo agho mungamupa para wapharazga.
4. Kasi mungamovwira wuli mupharazgi muphya para mwawona umo wapharazgira?
4 Ŵapani Masacizgo: Yesu wakapeleka ulongozgi wa umo ŵasambiri ŵake ŵangapharazgira. (Mat. 10:5-14) Namwe mungawovwira mupharazgi muphya mu nthowa yakuyana waka. Tegherezgani comene para wakupharazga. Para mwawukapo pa nyumba iyo, muwongani mwakufumira pasi pa mtima nanga mungawona kuti wakukhumbikwira wovwiri pa cigaŵa cinyake. Pambere mundapeleke sacizgo, mungawona dankha usange wanyolora ivyo wangubudiska pakwamba. Panji pakwamba wanguŵa waka na wofi. Kumbukaniso kuti ŵapharazgi wose ŵangaŵa na maluso ghakuyana yayi, ndipo kanandi pakuŵa nthowa zinandi zakucitira cinthu cimoza.—1 Kor. 12:4-7.
5. Kasi tingayowoyaci para tikupeleka sacizgo kwa mupharazgi muphya?
5 Nyengo zinyake mupharazgi muphya wangapempha kuti mumovwire apo wandacite makora. Kweni para wandapemphe, mungamovwira waka mwekha. Kasi mungamovwira wuli mwamahara? Ŵapharazgi ŵanyake ŵaluso ŵakuyowoya kuti, “Kasi ningayowoyapo sacizgo linyake?” panji, “Mwanguwona wuli upharazgi wura?” Panji mungayowoyaso kuti, “Apo nkhambanga waka kupharazga, cikanisuzganga nchakuti . . . , kweni ico cikanovwira nchakuti. . . . ” Nyengo zinyake nchakovwira kuwonera lumoza mu buku la Kukambitsirana. Kuti muleke kumukhuŵazga, movwirani pa cigaŵa cimoza ico wakutondeka.
6. Para tili mu uteŵeti, cisulo cikunora wuli cisulo cinyake?
6 Cisulo Cikunora Cisulo Cinyake: Timote, uyo wakaŵa mupharazgi waluso, wakakhozgekanga na Paulosi kuti walutilire kusambizga ndiposo kukura mwauzimu. (1 Tim. 4:13, 15) Nanga mungaŵa kuti mwapharazga kwa vilimika vinandi, mungalekanga yayi kusazgirako luso lwinu. Sambirani kwa ŵapharazgi awo mukwenda nawo, nanga nkhwa awo ŵamba sono kupharazga. Muŵe ŵakunozgeka kovwira ŵanji, comenecomene awo ŵamba sono kupharazga mwakuti ŵaŵe ŵaluso pakupharazga makani ghawemi.—Zinth. 27:17.