Kasi pa Ulendo Wakwamba Mukulongora Ŵanthu Umo Sambiro la Baibolo Likucitikira?
Para ŵanthu taŵaphalira kuti tisambire nawo Baibolo, ŵanji ŵakuti ŵakukhumba yayi panji ŵakuti ŵakusambira kale ku chalichi kwawo. Pakuti ŵanthu ŵakupambaniska yayi umo ise tikusambilira Baibolo na umo ŵakusambilira ku machalichi ghawo, ŵakumanya yayi kuti lingaŵangweruska kweniso kuti likunozga comene. Ntheura, m’malo mwa kuyowoya waka kuti tikusambira na ŵanthu Baibolo, mwalekeraci kuti pa ulendo wakwamba mumulongore umo sambiro la Baibolo likucitikira? Mwaciyelezgero, para munthu tamuphalira kuti tikumanya kuphika makora cakurya, tikuzakamuceteska nyengo yinyake yayi, kweni tikumupirathu kuti wacete ivyo taphika. Wonani umo mungacitira mwakulondezga masacizgo agho ghali mu Uteŵeti Withu wa Ufumu wa Janyuwale 2006 pa peji 6:
“Kasi mukughanaghana kuti zuŵa linyake mazgu agha ghazamufiskika? [Ŵazgani Yesaya 33:24, ndipo mulekani wazgore.] Nkhukhumba kuti nimulongorani cinthu cinyake cakukondweska pa nkhani iyi.” Mupani buku la Baibolo Likusambizgaci? ndipo mulongorani pa peji 36 ndime 22. Ŵazgani fumbo ilo lili musi pa peji ilo, ndipo mupemphani kuti wasange zgoro para mukuŵazga ndime. Fumbaniso fumbo ndipo tegherezgani apo wakuzgora. Ŵazgirani lumoza lemba linyake. Fumbani fumbo lakuti muzakazgore pa ulendo wakulondezgapo ndipo mungatondekanga yayi kukaweraso. Apa ndikuti mwambiska sambiro la Baibolo.