Sambirani ku Ŵapharazgi Ŵaluso

Ŵapharazgi ŵaluso mbakukhumbikwa chomene mu mpingo. Ŵanyake ŵateŵetera Yehova kwa vyaka vinandi, apo ŵanyake ŵamba sonosono. Ŵapharazgi aŵa ŵawona umo Yesu wakulongozgera mpingo mu mazuŵa ghaumaliro agha, apo wakovwira pa mulimo wakupharazga na kupanga ŵasambiri. (Mat. 28:19, 20) Yehova wakupeleka “nkhongono zakuluska zakawiro” ku ŵateŵeti ŵake para ŵakumana na masuzgo kweniso viyezgo. (2 Kor. 4:7) Pali vinthu vinandi ivyo tingasambira ku ŵapharazgi ŵaluso. Kweniso iwo ŵakukondwa kusambizga ŵapharazgi ŵanyawo ivyo ŵali kusambira. (Sal. 71:18) Ntheura tikwenera kuyezgayezga kuti tisambireko kwa iwo. Kasi tingasambirako wuli?

Mu Upharazgi. Tikwenera kuŵawovwira ŵapharazgi ŵaphya kuti ŵapharazgenge mwaluso. Ŵapharazgi ŵaphya ŵakwenera kuwona umo ŵapharazgi ŵaluso ŵakupharazgira. (Wonani nkhani yakuti “Limbikirani Kupharazga” mu Gongwe la Mulinda la Febuluwale 15, 2015, pa peji 15, pa kamutu kachoko kakuti “Kovwira Ŵapharazgi Ŵaphya,” ndime yachitatu.) Kasi ŵapharazgi ŵaluso ŵamovwirani wuli?

Kasi mungapempha mupharazgi waluso kuti mwendere lumoza mu upharazgi? Para wangakwaniska yayi kwenda chifukwa cha uchekuru panji ni mulwarilwari, nyengo zinyake mungakachitiskira sambiro linu kunyumba kwake. Para mwamara kusambira, mufumbani kuti wayowoyepo ivyo wawona.

Muchezgenge Nawo: Mungaŵamanya makora ŵapharazgi aŵa para mukuchezga nawo. Mungachema yumoza wa ŵapharazgi aŵa kuti muzakaŵire lumoza pa nyengo yinu yakusopera ya mbumba. Para ni mulwarilwari panji muchekuru, mungachita makora kukasopera ku nyumba kwake. Mufumbani umo wakasambilira unenesko. Kasi watumbikika wuli? Kasi mpingo wakura wuli? Kasi ni vinthu wuli ivyo vikumukondweska chomene apo wakuteŵetera Yehova?

Manyani kuti nawo ŵakutondeka vinthu vinyake. Nga ni umo tose tiliri, ŵapharazgi awo ŵakhala nyengo yitali mu unenesko nawo ŵali na vyawanangwa vyakupambana. (Rom. 12:6-8) Ŵanyake mbachekuru chomene ndipo ŵangaŵa na nyengo yichoko yakuchezgera nase. Ndipouli, tingasambirako vinandi kwa iwo chifukwa ŵateŵetera Yehova mwakugomezgeka kwa nyengo yitali.