Ivyo Vingatovwira Kuti Tiŵe Ŵaluso mu Uteŵeti—Kovwira Uyo Tenda Nayo

Cifukwa Wuli Nkhwakuzirwa? Yesu wakamanyanga uwemi wakwenda ŵaŵiri mu uteŵeti. Lekani apo wakatumanga ŵasambiri ŵake 70, wakaŵagaŵa ŵaŵiriŵaŵiri. (Luka 10:1) Munyithu uyo tenda nayo wangatovwira para munthu watifumba fumbo lakusuzga panji para vyatisuzga mu nthowa yinyake. (Muph. 4:9, 10) Wangatiphalirako ivyo wakumanya na masacizgo agho ghangatovwira kuti tipharazgenge mwaluso. (Zinth. 27:17) Kweniso wangatikhozga para tikwenda kufuma panyumba yinyake kuluta pa yinyake.—Fil. 4:8.

Umo Mungacitira:

Mutegherezgenge para munyinu wakupharazga. (Yak. 1:19) Para munyinu panji munthu uyo mukumupharazgira wakuŵazga Baibolo, mulondezgenge mu Baibolo linu. Ivi vingamovwirani kuti muyowoyepo apo mphakukhumbikwa.
Citani mwamahara kuti mumanye usange nchakwenelera kuzgorapo kweniso apo mungacitira nthena. (Zinth. 25:11) Para mwapelekezga munyinu ku sambiro, wangawonga usange mungayowoyapo mwa apo na apo. Kweni para mukupharazga kunyumba na nyumba, munyinu wangatemwa kuti wayowoye yekha usange ni nyengo yake kupharazga. Ndipouli, usange wamba waka sono kupharazga panji wakumanya makora yayi umo wangazgolera fumbo panji mwakumana na munthu wakususka, wangawonga usange mungamovwira. Kweni kwali mukupharazga kunyumba na nyumba, kuwelerako, panji muli pa sambiro, lekani kumudumulizga munyinu, kulutilizga cidumbirano panji kwambiska nkhani yinyake.
Muphaliraniko ivyo mukumanya. Usange mwawona kuti pali fundo yinyake iyo yingamovwira uyo mwenda nayo kuti wapharazgenge mwaluso, kukhalapo waka cete yayi. (Zinth. 3:27) Para mphakwenelera, mungayowoya kuti: “Kasi mukuwona kuti vyanguŵa makora?” panji “Kasi ningayowoyapo maghanoghano ghane?” panji “Ine nkhucita nthe.” Manyani kuti ŵanji ŵangawonga para mukuyowoyapo masacizgo ghinu, kweni ŵangagongowa usange mukuŵaphalira cilicose ico ŵabudiska.

Yezgani Sacizgo Ili Mwezi Wuno:

Para mukuwera, mulumbani munyinu pa ivyo wanguyowoya panji kucita ivyo mukuwona kuti vyamovwirani.