Muŵe Movwiri Muwemi mu Uteŵeti wa m’Munda
1. Kasi pakuŵa vyandulo wuli para tikwenda na mupharazgi munyithu mu uteŵeti?
1 Nyengo yinyake Yesu wakatuma ŵasambiri ŵakukwana 70 kuti ŵakapharazge, ‘wakaŵatuma ŵaŵiriŵaŵiri.’ (Luka 10:1) Nchakuwonekerathu kuti nthowa iyi yikapangiska kuti ŵasambiri ŵake ŵawovwiranenge na kukhozgana apo ŵakapharazganga. Para taluta na mupharazgi munyithu mu uteŵeti, kasi tingamovwira wuli munyithu?
2. Para uyo tenda nayo mu upharazgi wakupharazgira munthu, kasi tikwenera kutegherezga wuli, ndipo cifukwa wuli?
2 Mwa Kutegherezga: Tegherezgani comene para munyinu wakupharazgira munthu. (Yak. 1:19) Para wakuŵazga lemba, namwe julani Baibolo linu na kwendera nayo lumoza. Laŵiskani kwa uyo wakuyowoya, kwali ni mupharazgi munyinu panji uyo mukumupharazgira. Para mahara ghose mukuŵika ku cidumbirano ico, uyo mukumupharazgira nayo ndimo wacitirenge.
3. Mphawuli apo uyo tili nayo mu upharazgi wangawonga usange tingayowoyapo?
3 Mwa Kumanya Nyengo Iyo Mungayowoyapo: Para munyithu wakupharazga, tikulongora kuti tikumucindika para tikumupa mpata kuti wayowoye. (Rom. 12:10) Tikwenera cara kumujandizga. Para waluwa ivyo wakhumbanga kuyowoya panji munthu wakumususka panji kumufumba fumbo ndipo watipempha kuti timovwireko, tikwenera kusazgirapo waka fundo zinyake pa izo wayowoya m’malo mwa kwambiska nkhani yinyake. (Zinth. 16:23; Muph. 3:1, 7) Para tikuyowoya, tikwenera kusazgirapo pa ivyo munyithu wayowoya.—1 Kor. 14:8.
4. Nchivici cizamupangiska kuti tiŵe ŵacimwemwe ndiposo kuti vinthu vitenderenge makora para tili mu upharazgi?
4 Apo ŵasambiri 70 awo ŵakagaŵika ŵaŵiriŵaŵiri ŵakawerako ku upharazgi, “ŵakawerako na cimwemwe.” (Luka 10:17) Nase tizamuŵa ŵakukondwa ndipo vinthu vizamutendera makora mu uteŵeti usange tikutegherezga na kumanya nyengo iyo tingayowoyapo para taluta na munyithu mu upharazgi.