Mukhozganenge na Uyo Mwenda Nayo
1. Kasi tingamuyezga wuli Paulosi para tili mu uteŵeti?
1 Para wali na ŵabali, mpositole Paulosi wakawonanga kuti ni mwaŵi wa “kukhwimiskana” yumoza na munyake. (Rom. 1:12) Usange tanjira na munyithu mu uteŵeti, kasi tikusangirapo mwaŵi kuti timukhozge na kumovwira? M’malo mwa kukhala waka cete, cingaŵa ciwemi kumuphalirako ivyo vikumovwirani kuti muŵe mupharazgi waluso.
2. Kasi tingamovwira wuli uyo tenda nayo kuti waleke kujikayikira, ndipo cifukwa wuli nchakuzirwa kucita nthena?
2 Movwirani Kuti Waleke Kujikayikira: Ŵapharazgi ŵanyake ŵakujikayikira. Ivi vingawoneka pa cisko na umo ŵakuyowoyera. Tingaŵawovwira kuti ŵaleke kujikayikira para tikuŵalumba kufumira pasi pamtima. Kasi tingacitaso vici kuti ŵaleke kujikayikira? Mulaŵiliri munyake wa dera wakuphalira uyo wenda nayo ivyo wakopa para wakupharazga. Wakumuphaliraso kuti wakulomba wovwiri nyengo zose kuti waleke kopa. Kuti waleke kujikayikira mubali munyake wakati: ‘Para nkhukhumba kuyowoya na munthu nkhumwemwetera dankha. Kweni nyengo zinyake nkhwenera kulomba kuti nimwemwetere.’ Kasi pali cinthu cinyake ico cikamovwirani kuti muleke kujikayikira mu uteŵeti? Para ni nthena, phaliraniko uyo mwenda nayo.
3. Kasi tingamuphalirako vici uyo tenda nayo ivyo vingamovwira kuti waŵe waluso mu uteŵeti?
3 Muphaliraniko Umo Mukupharazgira: Kasi muli kusanga nthowa yipusu yakwambira kudumbiskana na ŵanthu? Lingaŵa fumbo panji cinthu cinyake ico cacitika mwasonosono uko mukukhala. Pa masacizgo agho ghakuŵa mu Uteŵeti Withu wa Ufumu, kasi mukusazgirako fundo yinyake iyo mukuwona kuti njakovwira mu uteŵeti? Usange ni nthena, phaliraniko munyinu uyo mwenda nayo. (Zinth. 27:17) Para mukuwelerako kwa munthu, mungamuphalira uyo mwenda nayo ivyo mwamucita na ivyo mwanozgekera kukayowoya. Para mwamara kusambira Baibolo na munthu, mungalongosora cifukwa ico mwanguyowoyera fundo yinyake panji lemba ilo mwanguŵazga kuti movwire uyo mukusambira nayo.
4. Cifukwa wuli tikwenera kovwira awo tikupharazga nawo?
4 Ŵakhristu ŵakwambilira ŵakawovwiranga ŵanthu ŵakuwaro pera yayi. Kweni ŵakawonangaso kuti cikaŵa cakukhumbikwa kukhwimiskana na kukhozgana. (Mil. 11:23; 15:32) Mpositole Paulosi wakasambizga Timote ndipo wakamuciska kuti nayo waphalirengeko ŵanji ivyo wasambira. (2 Tim. 2:2) Para tikucitira viwemi Ŵakhristu ŵanyithu mu uteŵeti, ŵaŵenge ŵakukondwa ndiposo ŵapharazgenge mwaluso. Kweniso, tikondweskenge Ŵadada ŵithu ŵakucanya.—Heb. 13:15, 16.