Wovwirani Mwenenyumba Kughanaghana
1. Kasi nthowa yacandulo comene yakupharazgira njakuti wuli?
1 Kasi upharazgi uwo ungaŵa wacandulo ni ngu, kukosera pa ivyo mukuyowoya panji kovwira mwenenyumba kuti wamanye yekha uwo mbunenesko? Mpositole Paulosi wakacita nthowa yaciŵiri iyi pakuyowoya na Ŵayuda mu Tesalonika. “Pa cifukwa ici, ŵanji ŵa iwo ŵakagomezga.” (Mil. 17:2-4) Kasi tingacita wuli kuti tovwire ŵanthu kughanaghana?
2. Kasi tingamuyezga wuli Paulosi para tikupharazga makani ghawemi?
2 Manyani Maghanoghano Ghawo na Ivyo Ŵakutinkha: Kuti tovwire ŵanthu kughanaghana, tikwenera kumanya ivyo ŵanthu mu cigaŵa cithu ŵakughanaghana. Apo Paulosi wakayowoyanga na Ŵagiriki mu Areyopaga, wakazunura dankha vinthu ivyo ŵakavimanyanga na kuvigomezga. (Mil. 17:22-31) Ntheura para mukunozgekera upharazgi, ghanaghanirani ivyo ŵanthu ŵanandi ŵakugomezga na ivyo ŵakutinkha. (1 Kor. 9:19-22) Usange mwenenyumba wakususka, yowoyani fundo iyo mose mungakoleranapo kuti ndiyo mudumbirane.
3. Kasi mafumbo ghali na nchito wuli pakovwira ŵanthu kughanaghana?
3 Fumbani Mafumbo Mwaluso: Vingacitika yayi kuti tilongozge munthu nthowa kwambura kumanya dankha apo iyo wali. Ntheura pera, tingamovwira yayi mwenenyumba kuti wafike pa fundo kwambura kumanya ivyo wakughanaghana. Kanandi Yesu wakafumbanga dankha mafumbo kuti wamanye maghanoghano gha munthu, kufuma apo ndipo wakayowoyanga fundo. Mwaciyelezgero, apo munthu wakafumba Yesu kuti “nkhwenera kucitaci kuti nizakahare umoyo wamuyirayira?,” Yesu wakapempha munthu yura kuti wayowoyepo dankha maghanoghano ghake. (Luka 10:25-28) Nyengo yinyake, Petrosi wakati wafumbika fumbo wakapuvya pakuzgora, ndipo Yesu wakamufumba mafumbo kuti wamanye yekha zgoro lakwenelera. (Mat. 17:24-26) Ntheura, para mwenenyumba watifumba fumbo, panji wayowoya fundo yakubudika, mufumbani mafumbo mwakuti waghanaghanirepo na kufika pa fundo.
4. Cifukwa wuli tikwenera kuyezgayezga kovwira mwenenyumba kughanaghana?
4 Para tikovwira mwenenyumba kughanaghana, ndikuti tikuyezga Msambizgi Waluso, Yesu, na ŵapharazgi ŵanyake ŵaluso awo ŵakaŵako kale. Kweniso para tikucita nthena, tikumucindika mwenenyumba. (1 Pet. 3:15) Ntheura wanganweka kuti tikawereso.