Ivyo Vingatovwira Kuti Tiŵe Ŵaluso mu Uteŵeti—Umo Tingazgolera Para Munthu Wakukana Kumupharazgira

Cifukwa Wuli Nchakuzirwa? Tiyelezgere kuti mwamanya kuti kucitikenge soka la cilengiwa, ndipo kwakhala pacoko waka kuti licitike. Ŵanthu ŵafwenge para ŵangaleka kucimbira. Mukuluta kwa mzengezgani winu kuti mukamuphalire, kweni wakumudumulizgani, wakuti ngwakutangwanika. Kasi mulekenge kumovwira? Ŵanthu ŵanandi ŵakukana para tikuŵapharazgira cifukwa ŵakumanya yayi kuzirwa kwa uthenga withu. Panyake ŵakuŵa ŵakutangwanika panyengo iyo tizira. (Mat. 24:37-39) Panji ŵakutitinkha waka cifukwa ca mautesi agho ŵakupulika. (Mat. 11:18, 19) Ŵangaghanaghana kuti ndise nchimi zitesi. (2 Pet. 2:1, 2) Tingagongowanga luŵiro yayi para munthu ngwambura kunweka.