Ghanaghanirani Uwemi wa Gulu la Yehova
‘Tikhorwenge na uwemi wa nyumba yinu, tempele linu lakupatulika.’—SALMO 65:4.
1, 2. (a) Kasi ndondomeko ya kuŵa na tempele yikenera kuŵakhwaska wuli ŵanthu ŵa Ciuta? (b) Kasi Davide wakapeleka vici vyakovwira pakuzenga tempele?
DAVIDE uyo wakaŵako mu Israyeli, njumoza mwa ŵanthu ŵapadera comene awo ŵakuzunurika mu Malemba gha Cihebere. Munthu uyu, mweneuyo wakaŵa muliska, mwimbi, nchimi, na fumu wakagomezga comene Yehova Ciuta. Pakuti Davide wakamutemwa comene Yehova, wakakhumba kumuzengera nyumba. Nyumba iyi, panji tempele, yikenera kuŵa cinyina ca kusopa kwaunenesko mu Israyeli. Davide wakamanya kuti ŵanthu ŵa Ciuta ŵaŵenge ŵakukondwa ndipo ŵatumbikikenge cifukwa ca tempele kweniso mulimo uwo ucitikirengepo. Ntheura Davide wakimba kuti: ‘Ngwamwaŵi mweneuyo mukumusankha na kumusendezgera kwa Imwe kuti wakhale mu maluwugha ghinu! Tikhorwenge na uwemi wa nyumba yinu, tempele linu lakupatulika.’—Salmo 65:4.
2 Davide wakazomerezgeka yayi kulaŵilira nchito ya kuzenga nyumba ya Yehova. Mwaŵi uwu ukasidikira mwana wake Solomoni. Kweni Davide wakadandaura yayi cifukwa cakuti mulimo uwo iyo wakawudoka comene ukapika kwa munthu munyake. Iyo wakawona kuti cakuzirwa comene nchakuti tempele lizengeke. Na mtima wose, wakakhozgera nchito ya kuzenga iyi mwa kupeleka kwa Solomoni cakuwonerapo ca umo nyumba yikenera kuŵira ico Yehova wakamupa. Kweniso, Davide wakawunganya Ŵalevi mu magulu kuyana na uteŵeti wawo ndipo wakapeleka golide na siliva linandi kuti viwovwire pakuzenga tempele.—1 Midauko 17:1, 4, 11, 12; 23:3-6; 28:11, 12; 29:1-5.
3. Kasi ŵanthu ŵa Ciuta ŵali na mtima wuli kulazga ku ndondomeko ya kusopa kwaunenesko?
3 Ŵaisrayeli ŵakugomezgeka ŵakakhozgera ndondomeko iyo yikaŵikika yakukhwaskana na kusopa kwaunenesko pa nyumba ya Ciuta. Pakuti ndise ŵateŵeti ŵa Yehova ŵa mazuŵa ghano, nase tikukhozgera mulimo wa kusopa mu cigaŵa ca pa caru capasi ca gulu la Yehova. Ntheura tikulongora kuti tili na mtima wakuyana na wa Davide. Ise tili na mtima wa kudandaura yayi. Kweni tikughanaghanira uwemi wa gulu la Ciuta. Kasi muli kughanaghanirapo za vinthu viwemi vinandi ivyo tikwenera kuŵira ŵakuwonga? Tiyeni tiwonepo vinyake mwa ivyo.
Kuwonga Cifukwa ca Awo Ŵakulongozga
4, 5. (a) Kasi “muzga wa magomezgeko na wa vinjeru” wakukwaniska wuli nchito yake? (b) Kasi Ŵakaboni ŵanyake ŵajipulika wuli na cakurya cauzimu ico ŵakupokera?
4 Tili na vifukwa vyakupulikikwa vyakuwongera “muzga wa magomezgeko na wa vinjeru” uyo Yesu Khristu wamwimika pa vinthu vyake pa caru capasi. Gulu la muzga la Ŵakhristu ŵakuphakazgika likulongozga pa kupharazga makani ghawemi, likunozga maungano, na kupanga mabuku ghakulongosora Baibolo mu viyowoyero vyakujumpha 400. Ŵanthu ŵanandi comene pa caru cose ŵakurya cakurya cauzimu ici mu “nyengo yakwenelera.” (Mateyu 24:45-47) Palije nadi cifukwa cakudinginyikira.
5 Elfi, yumoza wa Ŵakaboni ŵa Yehova uyo ni mucekuru wapembuzgika na kovwirika vilimika vinandi cifukwa ca kulondezga fundo za mu Malemba izo zikusangika mu mabuku ghakupelekeka na gulu la muzga. Pakukhumba kuwonga, Elfi wakalemba kuti: “Mphanyi nkhuti wuli ine kuŵavyenge gulu la Yehova?” Peter na Irmgard nawoso ŵateŵetera Ciuta vilimika vinandi. Irmgard wakuwonga cifukwa ca vyose ivyo “gulu la Yehova ilo ndacitemwa na lakupwelelera” likupeleka. Ghanyake mwa mabuku agha ghali kunozgekera awo ŵali na masuzgo ghapadera, nga mbacibulumutira panji ŵakumangwa.
6, 7. (a) Kasi mipingo yikulongozgeka wuli pa caru cose? (b) Kasi ŵanji ŵayowoyaci vya cigaŵa ca pa caru capasi ca gulu la Yehova?
6 Wupu Wakulongozga wa Ŵakaboni ŵa Yehova, gulu licoko la ŵanalume ŵakuphakazgika na mzimu ilo likukhala ku maofesi ghakuru gha Ŵakaboni ŵa Yehova ku Brooklyn, New York, ndiwo ukuyimira “muzga wa magomezgeko.” Wupu Wakulongozga ukwimika ŵateŵeti ŵa Yehova awo mbakukhwima mwauzimu kuteŵetera mu minthavi iyo yikulaŵilira mipingo yakujumpha 98,000 pa caru cose. Ŵanalume awo ŵakufiska ivyo Baibolo likuyowoya ŵakwimikika kuŵa ŵalara na ŵateŵeti ŵakovwira mu mipingo iyi. (1 Timote 3:1-9, 12, 13) Ŵalara ŵakudangilira ndipo ŵakuliska mwacitemwa mskambo wa Ciuta uwo uli mwa iwo. Ni thumbiko likuru comene kuŵa mu mskambo uwu na kusangwa na citemwa kweniso umoza uwo ulipo pakati pa ŵabali wose.—1 Petros 2:17; 5:2, 3.
7 M’malo mwa kudandaura, waliyose wakuwonga cifukwa ca ulongozgi wauzimu uwo wakupokera kufuma ku ŵalara. Mwaciyelezgero, pulikani vya Birgit, mama wa vilimika vya m’ma 30. Apo wakaŵa mwali, wakamba kwendezgana na ŵanthu ŵambura kulongosoka ndipo wakakhala pacoko waka kuti wawire mu kwananga. Kweni ŵalara ŵakati ŵamulongozga na fundo za mu Baibolo kweniso Ŵakhristu ŵanyake ŵakati ŵamovwira wakapona ku ulwani. Kasi Birgit wakujipulika wuli sono? Iyo wakuti: “Nili wakuwonga comene kuti nicali mu gulu liwemi la Yehova.” Munyamata wa vilimika 17 zina lake Andreas wakuti: “Ili ni gulu la Yehova nadi, gulu liwemi kwakuluska mu caru.” Asi nase tikwenera kuwonga cifukwa ca uwemi wa cigaŵa ca pa caru capasi ca gulu la Yehova?
Awo Ŵakulongozga Mbambura Kufikapo
8, 9. Kasi ŵanyake mwa ŵabwezi ŵa Davide ŵakacita wuli, ndipo iyo wakacita wuli ŵakati ŵamucitira nthena?
8 Unenesko ngwakuti awo ŵakwimikika kuti ŵadangilirenge pakusopa kwaunenesko mbambura kufikapo. Wose ŵakubudiska, ndipo ŵanji ŵakutondeka kucita makora pa vinyake ndipo ŵakulimbikira kuti ŵacite makora. Kasi ivi vikwenera kutikwenyerezga? Yayi. Nanga mbanthu awo kale ŵakapika milimo yinandi mu Israyeli ŵakabudiska vikuru comene. Mwaciyelezgero, apo Davide wakaŵa musepuka, wakapempheka kuti wakimbirenge sumu Fumu Sauli kuyituniska mtima wake. Nyengo yikati yajumphapo, Sauli wakakhumba kukoma Davide, ndipo iyo wakacimbira kuthaska umoyo wake.—1 Samuel 16:14-23; 18:10-12; 19:18; 20:32,33; 22:1-5.
9 Ŵaisrayeli ŵanyake ŵakacita mwaupusikizgi. Mwaciyelezgero, Joabu mulara wa nkhondo wa Davide wakakoma Abner mbali wa Sauli. Abisalomu wakawukira ŵawiske Davide, kuti wapoke ufumu. Ndipo Ahitofeli, uyo wakaŵa wakugomezgeka pakupeleka fundo kwa Davide wakamwendera mphiska. (2 Samuel 3:22-30; 15:1-17, 31; 16:15, 21) Ndipouli, Davide wakadinginyika yayi; nesi kuleka kusopa kwaunenesko. M’malo mwa kugongowa, vipakalara ivi vikamovwira Davide kuti wademelere kwa Yehova ndipo wakalutilira na mtima uwemi uwo wakaŵa nawo pakwamba apo wakacimbiranga Sauli. Pa nyengo yira, Davide wakimba kuti: “Ndicitirani lusungu, A Ciuta, ndicitirani lusungu, pakuti mzimu wane ukudinganya mwa Imwe; mu mfwiri wa mapapindo ghinu ndimo muli ciphokwero visuke vijumphe vipakalara ivi.”—Salmo 57:1.
10, 11. Nchivici cikamucitikira Gertrud apo wakaŵa muwukirano, ndipo wakayowoyaci za maubudi gha Ŵakhristu ŵanyake?
10 Lero palije cifukwa cakuti tidandaulire na upusikizgi mu gulu la Ciuta. Palije uyo wangazomerezga ŵapusikizgi panji ŵanthu ŵaheni mu mpingo, kwali ni Yehova nesi ŵangelo nanga mbaliska ŵauzimu. Ndipouli, tose tikusuzgika na kuwura urunji kwithu panji kwa ŵateŵeti ŵanyithu.
11 Apo Gertrud uyo wakateŵetera Yehova nyengo yitali wakaŵa muwukirano, ŵakamupusikizgira kuti wakaŵa mupusikizgi ndipo kuti wakaŵa mupharazgi wa nyengo zose wa Ufumu cara. Kasi iyo wakacita wuli? Kasi Gertrud wakasinginika cifukwa ca ivyo ŵakamuyowoyera? Yayi. Pambere wandafwe mu 2003 apo wakaŵa na vilimika 91, wakaghanaghana za umoyo wake ndipo wakati: “Ivi na vinyake ivyo vikanicitikira mu umoyo wane vikanisambizga kuti nangauli ŵanthu ŵakubudiska, kweni Yehova wakulongozga mulimo wake wakuzirwa, ndipo wakutuma ise ŵanthu ŵambura kufikapo kuwucita.” Para wasuzgika cifukwa ca maubudi gha ŵateŵeti ŵanyake, Gertrud wakalombanga Yehova kufumira pasi pa mtima.
12. (a) Kasi Ŵakhristu ŵanyake ŵakwambilira ŵakalongora nkharo wuli yiheni? (b) Kasi tikwenera kughanaghanira vici?
12 Pakuti nanga Mbakhristu awo mbakugomezgeka na ŵakujipeleka comene mbambura kufikapo, ipo para muteŵeti wakwimikika wabudiska, tiyeni tilutilire kucita “vyose kwambura kunyunyuta.” (Ŵafilipi 2:14) Cingaŵa cacitima comene usange tingatolera mtima uheni wa Ŵakhristu ŵacoko waka mu mpingo wakwambilira wa Ŵakhristu. Musambiri Yuda wakayowoya kuti ŵasambizgi ŵatesi mu nyengo yira ‘ŵakayuyura ufumu, na kutuka maucindami.’ Kweniso, ŵanthu ŵaheni aŵa ŵakaŵa ‘ŵakudinginyika, ŵakunyunyuta, ŵakudandaura na makhumbiro ghawo.’ (Yuda 8, 16) Mphanyi takana kulondezga ivyo ŵanthu ŵakudinginyika aŵa ŵakacita ndipo tighanaghanenge vinthu viwemi ivyo tikupokera kwizira mwa “muzga wa magomezgeko.” Tiyeni tighanaghanire uwemi wa gulu la Yehova ndipo ticitenge “vyose kwambura kunyunyuta.”
“Mazgu Agha Nganonono”
13. Kasi ŵanji ŵakacita wuli na visambizgo vinyake vya Yesu Khristu?
13 Peneapo ŵanji mu nyengo yakale ŵakadinginyikira ŵateŵeti ŵakwimikika, ŵanyake ŵakadinginyikanga na visambizgo vya Yesu. Umo pali kulembekera pa Yohane 6:48-69, Yesu wakati: “Uyo wakurya thupi lane na kumwa ndopa zane, ndiyo wali na umoyo wa muyirayira.” Ŵakati ŵapulika mazgu agha, “ŵasambiri ŵake ŵanandi, . . . ŵakati, Mazgu agha nganonono; ndi njani wamanya kughapulika?” Yesu wakamanya kuti “ŵasambiri ŵake ŵakadinginyikanga.” Nakuti pa cifukwa ici “ŵanandi ŵakawelera kumanyuma, ndipo kuti ŵakenderanangaso nayo cara.” Kweni kuti mbasambiri wose cara awo ŵakadinginyika. Wonani ivyo vikacitika apo Yesu wakafumba ŵapositole khumi na ŵaŵiri kuti: “Imwe namwe kasi mukukhumba kuluta?” Mpositole Petrosi wakazgora kuti: “Fumu, tilute tiye kwa njani? ndimwe muli nagho mazgu gha umoyo wa muyirayira. Ndipo ise tapulikana ndipo tikumanya kuti Imwe ndimwe Mutuŵa wa Ciuta.”
14, 15. (a) Cifukwa wuli ŵanthu ŵacoko waka ŵakuleka kukhorwa na visambizgo vinyake vya Cikhristu? (b) Kasi tingasambiraci kwa munthu zina lake Emanuel?
14 Mazuŵa ghano, mbacoko comene pakati pa ŵanthu ŵa Ciuta awo ŵaleka kukhorwa na visambizgo vinyake vya Cikhristu ndipo ŵadinginyikira cigaŵa ca pa caru capasi ca gulu la Yehova. Cifukwa wuli ivi vikucitika? Kanandi ŵanthu ŵakwamba kudinginyika cifukwa ca kutondeka kupulikiska umo Ciuta wakwendeskera vinthu. Mlengi wakuvumbura unenesko ku ŵanthu ŵake pacokopacoko. Ntheura, nyengo na nyengo paŵenge kusintha pa umo tikupulikiskira Malemba. Ŵanthu ŵa Yehova ŵanandi ŵakukondwa para vyaŵa nthena. Mbacoko waka awo ‘ŵakujumphizga kuŵa ŵarunji’ ndipo ŵakukhwizuka para vinthu vyasintha. (Mupharazgi 7:16) Cinyake ico cingacitiska munthu kudinginyika nkhujitemwa, ndipo ŵanyake ŵawira mu cipingo ca ukajilange. Kwali tikudinginyika pa cifukwa wuli, kweni nchakofya kucita nthena, cifukwa tingawelera ku caru na nthowa zake.
15 Mwaciyelezgero, Emanuel wakaŵa Kaboni uyo wakasanga kafukwa na vinthu vinyake ivyo wakaŵazga mu mabuku gha “muzga wa magomezgeko na wa vinjeru.” (Mateyu 24:45) Wakaleka kuŵazga mabuku ghithu ndipo paumaliro wakaphalira ŵalara mu mpingo wake kuti wakukhumbaso cara kuŵa yumoza wa Ŵakaboni ŵa Yehova. Ndipouli, mu nyengo yicoko waka, Emanuel wakawamo kuti visambizgo vya gulu la Yehova ni vyaunenesko nadi. Wakakumana na Ŵakaboni, na kuzomera kuti wakabuda, ndipo wakawezgekeramo kuŵa yumoza wa Ŵakaboni ŵa Yehova. Ntheura wakaŵaso wakukondwa.
16. Nchivici cingatovwira kuti tileke kukayikira visambizgo vinyake vya Cikhristu?
16 Wuli usange tikudinginyika cifukwa ca kukayikira visambizgo vinyake ivyo ŵanthu ŵa Yehova ŵakugomezga? Ipo nchiwemi tizikire. “Muzga wa magomezgeko” wangazakalongosora makora kuti watingweruske na kumazga nkhayiko. Nchamahara kulomba wovwiri ku ŵalara ŵa mpingo. (Yuda 22, 23) Lurombo, sambiro la taŵene, ndiposo kucezga na ŵabali awo ŵakutemwa vinthu vyauzimu vingatovwira kuti tileke kukayika, nakuti tingawonga unenesko wakukhozga wa mu Baibolo uwo tasambira kwizira mu nthowa iyo Yehova wakuyowoyera nase.
Lutilirani Kuŵa na Mtima wa Uzengi
17, 18. M’malo mwa kunyunyuta, kasi tikwenera kuŵa na mtima wuli, ndipo cifukwa wuli?
17 Unenesko ngwakuti, taŵanthu ŵambura kufikapo tili kubabika na khumbiro la kwananga, ndipo ŵanyake ŵangaŵa na mtima wa kudandaura pa vilivyose. (Genesis 8:21; Ŵaroma 5:12) Kweni usange tingaŵa na cizgoŵi ca kunyunyuta, ndikuti tikunanga ubwezi withu na Yehova Ciuta. Ntheura, tikwenera kuwuskamo mtima wose wa kunyunyuta uwo tingaŵa nawo.
18 M’malo mwa kunyunyuta na umo vinthu vikwendera mu mpingo, tingacita makora kulutilira kuŵa na mtima wa uzengi na kutangwanika na vinthu ivyo vikutipa cimwemwe, vyakuzirwa, vyakwenelera, kweniso kuŵa ŵakukhora mu cipulikano. (1 Ŵakorinte 15:58; Tito 2:1-5) Yehova ndiyo wakwendeska vyose mu gulu lake, ndipo Yesu wakumanya vyose ivyo vikucitika mu mpingo uliwose, nga umo wakacitiranga mu nyengo yakale. (Civumbuzi 1:10, 11) Imwe lindilirani waka zikiti kwa Ciuta na Khristu, Mutu wa mpingo. Ŵaliska ŵakwimikika ŵangatumika kunozga vinthu ivyo vingakhumbikwira kusintha.—Salmo 43:5; Ŵakolose 1:18; Tito 1:5.
19. Pambere Ufumu undayambe kuwusa, kasi tikwenera kuŵika mtima pa vici?
19 Sonosono apa mgonezi uheni uwu umalenge, ndipo Ufumu wa Mesiya uzamwendeska vinthu vyose pa caru capasi. Ipo nchakuzirwa kuti apo tikulindilira ivi, tilutilire kuŵa na mtima wa uzengi. Ici citovwirenge kumanya uwemi wa ŵasopi ŵanyithu, m’malo mwa kuŵapenja vifukwa. Tiŵenge ŵakukondwa para tikughanaghanira wunthu wawo uwemi. M’malo mwa kukweŵeka cifukwa ca kusinginika, tikhwimenge na kukhozgeka mwauzimu.
20. Kasi mtima wa uzengi utovwirenge kusanga vitumbiko wuli?
20 Mtima wa uzengi utovwirengeso kukumbuka vitumbiko vinandi ivyo tikusanga cifukwa ca kukolerana na cigaŵa ca pa caru capasi ca gulu la Yehova. Ni gulu ili pera mu caru ilo ndakugomezgeka kwa Fumu ya cilengiwa cose. Kasi mukujipulika wuli na fundo iyi ndiposo mwaŵi wa kusopa Yehova, Ciuta mweneco yekha? Mphanyi mwaŵa nga ni Davide uyo wakimba kuti: ‘Mwa ŵakupulika malurombo ‘mwe ŵamoyo wose ŵizenge kwa Imwe, ngwamwaŵi mweneuyo mukumusankha na kumusendezgera kwa Imwe kuti wakhale mu maluwugha ghinu! Tikhorwenge na uwemi wa nyumba yinu, tempele linu lakupatulika.’—Salmo 65:2, 4.
Kasi Mukukumbuka?
• Cifukwa wuli tikwenera kuwonga cifukwa ca awo ŵakulongozga mu mpingo?
• Kasi tikwenera kucita wuli para ŵabali ŵakwimikika ŵabudiska?
• Kasi tikwenera kuviwona wuli ivyo vikusintha pa kapulikiskiro ka Malemba?
• Nchivici cingawovwira Mkhristu kumazga nkhayiko?
[Cithuzithuzi pa peji 14]
Davide wakamupa Solomoni cakuwonerapo ca umo tempele likenera kuŵira ndipo wakakhozgera kusopa kwaunenesko na mtima wose
[Cithuzithuzi pa peji 17]
Ŵalara ŵa mpingo mbakukondwa kovwira mwauzimu