Sambizgani Ŵana Ŵinu Kuti Ŵaŵe Ŵapharazgi
1. Kasi lemba la Salmo 148:12, 13 likuŵaciskaci ŵapapi Ŵacikhristu?
1 Yehova wakucema ŵawukirano kuti ŵamulumbenge. (Sal. 148:12, 13) Ntheura, ŵapapi Ŵacikhristu ŵakucita vinandi padera pa kuŵasambizga unenesko wa mu Baibolo ndiposo malango gha Ciuta. Ŵakuŵasambizgaso kuti ŵaŵe ŵapharazgi ŵa makani ghawemi. Kasi mungacita wuli ici pacokopacoko?
2. Kasi vinthu viwemi ivyo mupapi wakucita vingakhwaska wuli ŵana ŵake?
2 Muŵe Ciyelezgero Ciwemi: Mweruzgi Gidiyoni wakaphalira ŵanalume ŵake 300 kuti: “Ndilaŵiskani.” (Ŵeru. 7:17) Mwakawiro ŵana ŵakulaŵiska na kulondezga ivyo ŵapapi ŵawo ŵakucita. Dada munyake uyo wakugwira nchito nausiku, para pa Cisulo mulenji wawera ku nchito, m’malo mwakuti wagone, wakutora ŵana ŵake kuluta nawo mu uteŵeti nangauli wakuŵa kuti wavuka. Mwambura kuyowoya mazgu, wakuŵasambizga kuti uteŵeti nchinthu cakwamba. (Mat. 6:33) Kasi ŵana ŵinu ŵakuwona kuti mukucita mwakusangwa vinthu vyakukhwaskana na kusopa nga, nkhulomba, kuŵazga Baibolo, kuzgora pa maungano, ndiposo kupharazga? Mbunenesko kuti mungacita vyose mwakufikapo yayi. Kweni ŵana ŵinu ŵangalondezga makora ivyo mukuŵasambizga pa nkhani ya kusopa Yehova para ŵakumuwonani imwe mukufwilirapo kumuteŵetera.—Dute. 6:6, 7; Rom. 2:21, 22.
3. Kasi ni vilato wuli viwemi ivyo ŵapapi ŵangawovwira ŵana ŵawo kuti ŵajiŵikire na kuvifiska?
3 Vilato Viwemi: Ŵapapi ŵakuvuka yayi kusambizga ŵana ŵawo kwenda, kuyowoya, kuvwara ŵekha, na vinyake vyantheura. Para ŵana ŵakukura, ŵakuŵa na vilato viphya. Para ŵapapi Mbakhristu, ŵakuŵawovwiraso kuti ŵajiŵikire vilato vyauzimu ndiposo kuti ŵavifiske mwakuyana na msinkhu wawo ndiposo luso lawo. (1 Kor. 9:26) Kasi mukusambizga ŵana ŵinu kuti ŵazgorenge pa maungano mu mazgu ghawo na ghawo ndiposo kuti ŵanozgekerenge ŵekha nkhani za mu Sukulu ya Uteŵeti wa Ciuta? (Sal. 35:18) Kasi mukuŵasambizga kuti ŵacitenge maupharazgi ghakupambanapambana? Kasi mukuŵawovwira kuti ŵaŵe na cilato cakuti ŵabapatizike ndiposo kucita uteŵeti wanyengozose? Kasi mukuŵawovwira kuti ŵacezgenge na ŵapharazgi awo mbacimwemwe ndiposo ŵamwamphu pakupharazga, awo ŵangaŵakhozga?—Zinth. 13:20.
4. Kasi ŵana ŵakusanga candulo wuli para ŵali na ŵapapi awo ŵakuŵasambizga uteŵeti ŵacali ŵanici?
4 Wamasalmo wakati: “A Ciuta, mwandisambizga kwamba ku wanici wane, ndipo ndicari kupharazga milimo yinu yakuzizwiska.” (Sal. 71:17) Yambani kusambizga ŵana ŵinu ŵacali ŵanici kuti ŵaŵe ŵapharazgi. Vinthu vyauzimu ivyo muŵasambizgenge viŵawovwirenge mpaka ku ulara wawo.—Zinth. 22:6.