Uthenga Uwo Tikwenera Kupharazga

“MOPANI CIUTA WAUNENESKO NA KUSUNGA MARANGO GHAKE”

KALE pambere Cikristu cindayambe, Yehova wakaphalira muntu wakugomezgeka Abrahamu za manozgero ghakuti “mitundu yose ya caru” yitumbikike. (Gen. 22:18) Iye wakafunyiliraso Solomon kuti walembe za cintu cakukhumbikwa comene ku ŵantu wose: ‘Kopa Ciuta waunenesko, na kusunga marango ghake. Pakuti uwu ndiwo mlimo wose wa muntu.’ (Muph. 12:13) Kweni kasi ŵantu mu vyaru vyose ŵangasambira wuli vintu ivi?

Nangauli nyengo zose paŵa ŵantu ŵanyake awo ŵakugomezga Mazgu gha Ciuta, Baibolo likurongora kuti makani ghaweme agho ghapharazgikenge mu vyaru vyose ghakasungikira “zuŵa la Fumu.” Zuŵa ili likamba mu 1914. (Civ. 1:10) Kwakuyana na zuŵa ili, lemba la Civumbuzi 14:6, 7 likayowoyerathu kuti na covwiro ca ŵangelo, makani ghaweme ghazamupharazgika “ku mtundu wose na fuko na lulimi na ŵantu.” Iwo ŵazamuciskika kuti ‘Wopani Ciuta, ndipo mupani ncindi, pakuti liza ora la ceruzgo cake, ndipo mulambirani mweneuyo wakalenga kucanya na caru capasi na nyanja na visimi vya maji.’ Khumbo la Ciuta ndakuti uthenga uwu upharazgike. Tili na mwaŵi ukuru wa kunjizgikamo mu ncito iyi.

“Ciuta Waunenesko.” Apo Yehova wakayowoya kuti “ndimwe ŵakaboni ŵane,” yikaŵa nyengo iyo nkani ya muwuso wa Ciuta yikayowoyekanga. (Yes. 43:10) Uthenga uwo tikwenera kupharazga ngwakuti ŵantu ŵaŵe waka na cisopo na kugomezga waka mwa Ciuta cara. Mumalo mwake, ŵakwenera kupika mwaŵi wakuti ŵasambire kuti Mlengi wa kucanya na caru capasi ni Ciuta yekha waunenesko. (Yes. 45:5, 18, 21, 22; Yoh. 17:3) Ni Ciuta yekha waunenesko uyo wangamanya kuyowoyerathu vya muntazi kwambura kuteta. Ni mwaŵi withu kuyowoya kuti kukwaniriskika kwa mazgu gha Yehova munyengo ya kunyuma kukutipa cigomezgo cakuti vyose ivyo wali kulayizga vizamukwaniriskika.—Josh. 23:14; Yes. 55:10, 11.

Mbunenesko kuti ŵantu ŵanandi awo tikuŵapharazgira ŵakusopa ŵaciuta ŵanyake, panji ŵakuyowoya kuti ŵakusopa ciuta waliyose yayi. Mwanteura kuti ŵapulikizge uthenga withu, tikwenera kuyowoya danka vintu ivyo ŵakuvimanya na kuvigomezga. Tingasanga candulo na ciyerezgero ico cili pa Milimo 17:22-31. Manyani kuti nangauli mpostole Paulos wakaŵa na luso, kweni wakayowoya mwakupulikwika makora za umo ŵantu wose ŵaliri ŵakuzirwa kwa Ciuta uyo ni Mlengi wa kucanya na caru capasi.

Pharazgani Zina la Ciuta. Mungalekanga cara kupharazga zina la Ciuta waunenesko. Yehova wakulitemwa comene zina lake. (Ex. 3:15; Yes. 42:8) Iye wakukhumba kuti ŵantu ŵalimanye. Iye wakapangiska kuti zina lake lituŵa lilembeke mu Baibolo kwa nyengo zakujumpa 7,000. Ni udindo withu kovwira ŵantu kuti ŵamanye zina ili.—Dute. 4:35.

Muntazi muweme mwa ŵantu wose mukuthemba pa kumanya Yehova na kucema pa zina lake na cigomezgo. (Joel 2:32; Mal. 3:16; 2 Tes. 1:8) Kweni ŵantu ŵanandi ŵakumumanya yayi Yehova. Ici cikusazgapo ŵantu ŵanandi awo ŵakuti ŵakusopa Ciuta uyo wali kulembeka mu Baibolo. Nanga kungaŵa kwakuti Baibolo ŵali nalo ndipo ŵakuliŵazga, iwo ŵakutondeka nipera kumanya zina la Ciuta cifukwa zina ili ŵalikuwuskamo mu Mabaibolo ghanandi. Ŵanandi ŵakulimanya zina la Yehova kweni ŵarongozgi ŵawo ŵa cisopo ŵakuŵaphalira kuti ŵaleke kuligwiriskira ncito.

Ni mwauli umo tingacitira kuti ŵantu ŵamanye na kugwiriskira ncito zina la Ciuta? Palije ntowa yinyake yiweme kuruska kuŵarongora zina ilo mu Baibolo—kuŵarongora mu Baibolo lawo usange ŵali nalo. Mu Mabaibolo ghanyake, zina ili likusangika mu malo ghanandi comene. Mu Mabaibolo ghanyake, likusangika kwekha pa Masalmo 83:18 panji pa Exodus 6:3-6, ndipo nyengo zinyake likusangika musi mwa lemba la Exodus 3:14, 15, panji 6:3. Mu Mabaibolo ghanandi, ŵalikuwuskamo zina la Ciuta na kuŵikamo mazgu ghakuti “Fumu” panji “Ciuta.” Kumalo uko ŵakung’anamura Baibolo, ŵali kuwuskiramothu zina la Ciuta mu Baibolo, mukwenera kugwiriskira ncito Baibolo lakale mwakuti murongore ŵantu ivyo vyacitikira zina la Ciuta. Mu vyaru vinyake mungarongora zina la Ciuta mu sumu izo ŵavisopo ŵakwimba panji pa viphambano vya masitolo.

Nanga nkhwa ŵantu awo ŵakusopa ŵaciuta ŵanyake, lemba la Yeremiya 10:10-13 lingagwiriskirika ncito mwakukora mtima usange mungagwiriskira ncito Baibolo la New World Translation. Ilo kuti likuyowoya zina la Ciuta pera cara kweni likuyowoyaso mwakupulikwika makora za mikhaliro yake.

Tileke kubenekerera zina la Yehova na tumazina twa nga ni “Ciuta” na “Fumu” nga ni umo vikucitira visopo vya Caru. Ici cikung’anamura kuti zina la Ciuta likwenera kugwiriskirika ncito kukwambilira kwa cidumbirano cilicose cara. Cifukwa ca kutinka zina ili, ŵantu ŵanyake ŵangakana kudumbiskana nawo. Kweni pamanyuma pakuti cidumbirano cinu caya pantazi, lekani kupanga soni kugwiriskira ncito zina la Ciuta.

Ncakukondweska kumanya kuti Baibolo likugwiriskira ncito comene zina la Ciuta kuruska mazina gha nga ni “Fumu” panji “Ciuta.” Nangauli vili ntena, ŵalembi ŵa Baibolo kuti ŵakaŵika zina la Ciuta pa ndime yiliyose cara. Iwo ŵakaŵika pamalo apo mpakwenelera, mwambura kucicizgika, mwa kulipa ncindi. Ici nciyerezgero ciweme cakuti ticirondezge.

Muntu Wakumanyikwa na Zina. Nangauli fundo yakuti Ciuta wali na zina njaunenesko comene, kweni ici nciyambi waka.

Kuti ŵantu ŵatemwe Yehova na kucema pa zina lake na cigomezgo, ŵakwenera kumanya mikhaliro yake. Panyengo iyo Yehova wakaphaliranga Moses zina lake pa phiri la Sinai, Iye wakacita vinandi kuruska kuyowoya waka mwakuwerezgawerezga mazgu ghakuti “Yehova.” Iye wakayowoya yinyake mwa mikhaliro Yake yapacanya. (Ex. 34:6, 7) Ici nciyerezgero ciweme cakuti ticirondezge.

Kwali mukupharazgira ŵantu ŵakukondwelera panji mukuyowoya nkani pa mpingo, usange mukuyowoya za vitumbiko ivyo vizenge na Ufumu wa Ciuta, mungayowoya ivyo vitumbiko ivi vikutiphalira pakuyowoya za Ciuta uyo wali kulayizga vintu ivyo. Usange mukuyowoya za marango ghake, didimizgani umo ghakurongolera mahara ghake na citemwa cake. Yowoyani mwakupulikwika makora kuti khumbo la Ciuta pa kutipa marango ndakuti tisuzgikenge nagho cara, mumalo mwake, wali kutipa kuti tandule nagho. (Yes. 48:17, 18; Mika 6:8) Rongorani umo nkongono za Yehova zikuvumbulira mukhaliro wake, vipimo vyake, na khumbo lake. Yowoyani umo Yehova wakugwiriskira ncito mwamahara mikhaliro yake. Ŵantu ŵakwenera kumanya umo imwe mukughanaghanira pakuyowoya za Yehova. Kutemwa kwinu Yehova kungawovwira kuti ŵanji ŵaŵeso na citemwa cakuyana waka.

Uthenga uwo tikupharazga mwaluŵiro mazuŵa ghano ngwa kuciska ŵantu wose kuti wope Ciuta. Kwizira mu ivyo tikuyowoya, tikwenera kuyezgayezga kupangiska ŵantu kuti ŵamope nadi Ciuta. Wofi uwu tikuyowoya apa ngwakwenerera, kumopa Yehova, kumupa ncindi. (Sal. 89:7) Iwo ukusazgapo kumanya kuti Yehova ni mweruzgi mukuru nakuti muntazi mwithu mukuthemba pa kuŵa paubwezi uwemi na iye. (Luka 12:5; Rom. 14:12) Mwanteura, wofi uwu ukusazgapo kuŵa na citemwa pa iye, ndipo pamanyuma, kuŵa na khumbiro la kumukondweska. (Dute. 10:12,13) Kopa Ciuta kukutipangiskaso kuti titinke ico nciheni, tirondezge marango gha Ciuta, na kumuteŵetera na mtima wose. (Dute. 5:29; 1 Mid. 28:9; Zinth. 8:13) Kopa Yehova kukutipangiska kuti titceŵe kuteŵetera iye na kutemwaso vintu vyacaru.—1 Yoh. 2:15-17.

Zina la Ciuta—‘Gongwe Lakukhora.’ Ŵantu awo ŵakumumanya Yehova ŵakukondwa na civikiliro ico wakuŵapa. Ici kuti ncifukwa cakuti ŵakugwiriskira ncito zina lake panji kuyowoya waka yinyake mwa mikhaliro yake cara. Kweni ncifukwa cakuti ŵakumugomezga comene Yehova. Pakuyowoya za ŵantu aŵa lemba la Zintharika 18:10 likuyowoya kuti: “Zina la Yehova ndi cigongwe cakukhora, murunji wakucimbirira kwenekuko na kuphokwa.”

Gwiriskirani ncito mwakukwana mwaŵi uwu kuti mukhuŵirizge ŵanji kuti ŵagomezgenge mwa Yehova. (Sal. 37:3; Zinth. 3:5, 6) Cigomezgo ca mtundu uwu cikurongora kuti muntu wali na cipulikano mwa Yehova na vilayizgo vyake. (Heb. 11:6) Para ŵantu ‘ŵacemenge pa zina la Yehova’ cifukwa cakuti ŵamanya makora kuti iye ni Muwusi wa Caru cose, kutemwa ntowa zake, na kugomezga kuti ciponosko ceneco cingafumira kwa iye pera, apo ndipo Mazgu gha Ciuta ghakutisimikizgira kuti iwo ŵazamuponoskeka. (Rom. 10:13, 14) Para mukusambizga ŵanji, ŵawovwirani kuti ŵaŵe na cigomezgo ca mtundu uwu mu umoyo wawo.

Ŵantu ŵanandi ŵakukumana na vyakumara mahara vinandi comene. Ŵakutondeka kumanya umo ŵangavimazgira. Ŵaciskani kuti ŵasambire ntowa za Yehova, ŵamugomezge na kugwiriskira ncito ivyo ŵakusambira. (Sal. 25:5) Ŵakhuŵirizgani kuti ŵarombenge covwiro kwa Yehova, mwakufumira pasi pa mtima na kumuwonga cifukwa ca vitumbiko ivyo wakuŵapa. (Fil. 4:6, 7) Usange ŵamanya Yehova, kumumanya mwakuŵazga waka za iye mu Baibolo yayi kweni mwa kuwona kukwaniskika kwa vilayizgo vyake mu umoyo wawo, iwo ŵazamwamba kukondwa na civikiliro ico cikwiza usange muntu wamanya ivyo zina la Yehova likuyimira.—Sal. 34:8; Yer. 17:7, 8.

Gwiriskirani ncito mpata wuliwose kuti movwire ŵantu kuti ŵamanye uwemi wa kopa Ciuta waunenesko, Yehova, na kusunga marango ghake.

“KUCITIRA UKABONI YESU”

PAMANYUMA pa kuwuka kwake ndiposo pambere wandakwere kucanya, Yesu Kristu wakapereka urongozgi ku ŵasambiri ŵake, kuti: “Muti muŵenge ŵapanikizgi ŵane . . . na ku vigoti vya caru wuwo.” (Mil. 1:8) Ŵateŵeti ŵakugomezgeka ŵa Ciuta mazuŵa ghano ŵakumanyikwa kuŵa ŵantu awo ‘ŵakukoreska cipanikizgo ca Yesu.’ (Civ. 12:17) Kasi imwe muli na mwampu pa kucitira ukaboni za iye?

Ŵantu ŵanandi awo ŵakuti ŵakugomezga Yesu, ŵakumanya yayi kuti iye wakaŵako kale pambere wandize pa caru capasi. Ŵakukayikira kuti panyengo iyo wakiza pa caru capasi wakaŵa muntu nadi. Ŵakumanya yayi ivyo kuŵa kwake Mwana wa Ciuta kukung’anamura. Ŵakumanya tuntu tucoko waka twakukhwaskana na ncito yake mu kukwaniskika kwa khumbo la Ciuta. Ŵakumanya yayi ivyo Yesu wakucita panyengo yasono, na umo umoyo wawo uzamukhwaskikira na ivyo wazamucita muntazi. Mutepanji ŵangaghanaghana uheni kuti Ŵakaboni ŵa Yehova ŵakugomezga mwa Yesu yayi. Ni mwaŵi withu kuti tiyezgeyezge kuŵaphalira unenesko wa nkani izi.

Paliso ŵanyake awo ŵakugomezga yayi kuti ŵantu awo ŵali kuzunurika mu Baibolo nga ni Yesu, ŵakaŵako nadi. Ŵanyake ŵakughanaghana kuti Yesu wakaŵa waka muntu wakumanyikwa comene. Ŵanandi ŵakukana kuti ni Mwana wa Ciuta. ‘Kupanikizgira za Yesu’ ku ŵantu ŵa nga ni aŵa kukukhumba kuyezgayezga, kuzizipizga, ndiposo luso.

Mwambura kupwererako kantu za umo ŵapulikizgi ŵinu ŵakuwonera, iwo ŵakukhumbikwira kumanya Yesu Kristu usange ŵakukhumba kuzakasanga umoyo wamuyirayira. (Yoh. 17:3) Khumbo la Ciuta ndakuti ŵantu wose ‘ŵazomerezge kuti Yesu Kristu ndi Fumu’ na kujilambika ku muwuso wake. (Fil. 2:9-11) Mwanteura, usange takumana na ŵantu awo ŵali na maghanoghano ghankongono kweni ghautesi panji awo ŵali na thinko tingazerezganga cara kudumbiskana nawo. Peneapo ku ŵantu ŵanyake tingayowoya mwakufwatuka za Yesu Kristu nanga pangaŵa pa ulendo wakwamba, ku ŵantu ŵanyakeso, tingakhumbikwira kuyowoya mwakucenjera fundo izo zingawovwira ŵapulikizgi ŵithu kuti ŵasinte maghanoghano ghawo. Tingakhumbikwiraso kughanaghanira ntowa za umo tingazakayowoyera fundo zakusazgikira pa maulendo gha muntazi. Ndipouli, usange muntu tingamba nayo sambiro la Baibolo la panyumba, apo ndipo tingakwaniska kumuphalira vintu vinandi.—1 Tim. 2:3-7.

Ncito ya Yesu Pakufiska Khumbo la Ciuta. Tikwenera kovwira ŵantu kuti ŵamanye kuti, Yesu ndiyo ni “ntowa” ndipo ‘palije muntu wakwiza ku Ŵawiske kweni kwizira mwa iye,’ ncambura macitiko kuŵa paubwezi na Ciuta kwambura kuŵa danka na cigomezgo mwa Yesu Kristu. (Yoh. 14:6) Kwekha usange muntu wangamanya ncito iyo Yehova wali kupereka kwa Mwana wake wakwamba, mbwenu wangapulikiska Baibolo. Cifukwa wuli? Cifukwa ncakuti Yehova wakapanga mwana uyu kuŵa movwiri mukuru pa kufiska vilato vyake vyose. (Kol. 1:17-20) Ucimi wakuzikika mu Baibolo ukukhozgera fundo iyi. (Civ. 19:10) Yesu Kristu ndiyo wazamumazga masuzgo agho ghakiza na ucigaruka wa Satana na kwananga kwa Adamu.—Heb. 2:5-9, 14, 15.

Kuti muntu wapulikiske ncito ya Kristu pa kufiska khumbo la Ciuta, wakwenera kumanya kuti ŵantu ŵali mu ukhaliro wakusuzga uwo pa iwo ŵekha ŵangajiwuskamo yayi. Tose tili kubabika ŵakwananga. Ndipo kwananga uku kungakhwaska umoyo withu muntowa zakupambana-pambana. Ndipouli, nga ncakufumapo cake, kwananga uku kukwiziska nyifwa. (Rom. 3:23; 5:12) Dumbiskanani fundo izi na awo mukuŵapharazgira. Ndipo ŵaphalirani kuti kwizira mu sembe ya Yesu Kristu, Yehova wapanga manozgero gha kuwombora ŵantu ku kwananga na nyifwa awo ŵakurongora cigomezgo mu sembe ya Yesu. (Mrk. 10:45; Heb. 2:9) Ici cikuŵajulira ntowa ya kukondwa na umoyo wamuyirayira mu ukhaliro wa urunji. (Yoh. 3:16, 36) Palije ntowa yinyake yakuti ŵantu ŵangaponoskekera kwakuruska iyi. (Mil. 4:12) Nga ni musambizgi, kwali muli kwamwekha panji pa mpingo, citani vinandi kuruska kuyowoya waka fundo izi. Mwacitemwa na mwakufwasa, wovwirani ŵapulikizgi ŵinu kuti ŵamanye cigaŵa ico Kristu wali naco nga ni Muwomboli withu. Kuwongera manozgero agha kungakhwaska maghanoghano ghithu, ukhaliro, na vintu ivyo tikukhumba kuzakacita muntazi.—2 Kor. 5:14, 15.

Mbunenesko kuti Yesu wakapereka umoyo wake kamoza pera kuŵa sembe. (Heb. 9:28) Ndipouli, iye panyengo yasono wakuteŵetera nga ni Musofi Mukuru. Wovwirani ŵanji kuti ŵamanye ng’anamuro la ici. Kasi iwo mbakufipa mtima, mbakwenjerwa, mbakusuzgika, panji ŵali na vyakumara mahara cifukwa ca nkaza za ŵantu awo ŵakukhara nawo? Panyengo iyo Yesu wakaŵa muntu pa caru capasi, nayo wakakumana na masuzgo ghose agha. Mwanteura wakumanya makora masuzgo ghithu. Pakuti tili ŵantu ŵambura urunji, kasi tikumanya kukhumbikwa kwa lusungu lwa Ciuta? Usange tikupempa cigowokero kwa Ciuta kwizira mu sembe ya Yesu, iye ni “Nkoswe kwa Ŵawiske.” Ndipo mwacitemwa “wakutiŵeyerera ise.” (1 Yoh. 2:1, 2; Rom. 8:34) Pa malufura gha sembe ya Yesu ndiposo kwizira mu ncito yake nga ni Musofi Mukuru, tingafika ku “cizumbe ca ucizi” wa Yehova mwakuti watovwire panyengo yakwenelera. (Heb. 4:15, 16) Nangauli tili ŵantu ŵambura urunji, wovwiri uwo Yesu wakupereka nga ni Musofi Mukuru ungatipangiska kuti titeŵetere Ciuta na njuŵi yiweme.—Heb. 9:13, 14.

Mwakusazgirapo, Yesu wali na mazaza ghakuru pakuti Ciuta wali kumuŵika kuŵa Mutu wa mpingo Wacikristu. (Mat. 28:18; Efe. 1:22, 23) Mwanteura, wakupereka urongozgi wakukhumbikwa mwakukorerana na khumbo la Ciuta. Para mukusambizga ŵanji, ŵawovwirani kuti ŵapulikiske kuti Yesu Kristu ndiyo ni mutu wa mpingo, muntu cara. (Mat. 23:10) Kwamba waka pa zuŵa lakwamba ilo mukudumbiskana na ŵakukondwelera, ŵacemerani ku maungano gha mpingo, kweneuko tikusambira Baibolo na covwiro ca mabuku ghakufuma kwa “muzga wa magomezgeko na wa vinjeru.” Rongosorani uyo ni “muzga” kweniso uyo ni “Fumu” mwakuti ŵamanye urongozgi wa Yesu. (Mat. 24:45-47) Rutani nawo kwa ŵarara kuti ŵamanyane nawo, ndipo rongosorani viyeneresko vya m’Malemba ivyo ŵarara ŵali navyo. (1 Tim. 3:1-7; Tito 1:5-9) Ŵaphalirani kuti mpingo ngwa ŵarara yayi, kweni iwo ŵakutovwira waka kuti tende mu marwayo gha Yesu Kristu. (Mil. 20:28; Efe. 4:16; 1 Pet. 5:2, 3) Wovwirani ŵakukondwerera aŵa kuti ŵawone kuti pali gulu lakulinganizgika makora ilo liri pasi pa urongozgi wa Kristu.

Kufumira mu Makani Ghaweme, tikusambira kuti panyengo iyo Yesu wakanjira mu Yerusalemu apo nyifwa yake yikaŵa pafupi, ŵasambiri ŵake ŵakacemerezga kuti: ‘Karonga uyo wakwiza mu zina la Yehova!’ (Luka 19:38) Peneapo ŵantu ŵakusambira Baibolo mwa kuyapantazi, ŵakumanya kuti Yehova panyengo yasono wali kupa Yesu mazaza gha kuwusa agho ŵantu wose ŵakukhwaskika nagho. (Dan. 7:13, 14) Para mukuyowoya nkani pa mpingo panji mukucitiska masambiro gha Baibolo, wovwirani ŵantu kuti ŵapulikiske na kumanya ivyo muwuso wa Yesu ukung’anamura kwa ise.

Didimizgani fundo yakuti vyakucita vithu vikurongora usange tikugomezga nadi kuti Yesu Kristu ni Themba ndiposo usange tikujilambika nadi ku muwuso wake. Didimizganiso ncito iyo Yesu wakapereka ku ŵarondezgi ŵake wati waka waphakazgika nga ni Fumu. (Mat. 24:14; 28:18-20) Yowoyani mazgu agho Yesu mweneuyo ni Phungu Wakuzizwiska, wakayowoya pakukhwaskana na vintu ivyo ni vyakuzirwa comene mu umoyo. (Yes. 9:6, 7; Mat. 6:19-34) Yowoyani mzimu uwo Karonga wa Cimango wakayowoya kuti ukwenera kuŵa na ŵarondezgi ŵake. (Mat. 20:25-27; Yoh. 13:35) Iŵani ŵakucenjera kuti muleke kweruzga ŵanji kuti ivyo ŵakucita ni vyakukwana yayi, kweni ŵaciskani kuti ŵaghanaghanire ivyo milimo yawo yikurongora pa kujilambika ku urongozgi wa Kristu. Para mukuyowoya nteura, namwe manyani kuti mukukhumbikwira kucita mwakuyana waka.

Kupanga Kristu Kuŵa Lufura. Baibolo likuyaniska ncito ya kupanga ŵasambiri Ŵacikristu na ncito ya kuzenga cigongwe pa Yesu Kristu nga ni lufura. (1 Kor. 3:10-15) Kuti mukwaniske ici, wovwirani ŵantu kuti ŵamumanye Yesu nga ni umo Baibolo likuyowoyera za iye. Iŵani ŵakucenjera mwakuti ŵaleke kuwona imwe nga ni muntu uyo iŵo ŵakurondezga. (1 Kor. 3:4-7) Ŵaphalirani kuti ŵakurondezga Yesu Kristu.

Usange fundo zinu zili na malufura ghaweme, musambiri winu wazamupulikiska makora kuti Kristu wakatipa ciyerezgero kuti ‘tirondezge marwayo ghake.’ (1 Pet. 2:21) Kuti mucite ici, khuŵirizgani musambiri kuti para wakuŵazga Makani Ghaweme waleke kuŵazga nga ni mdauko waka, kweni nga ni vintu ivyo tikwenera kuvirondezga. Ŵawovwirani kuti ŵakumbukirenge na kurondezga kaghanaghaniro na mikhaliro iyo Yesu wakarongora. Ŵakhuŵirizgani kuti ŵamanye makora umo Yesu wakawoneranga ŵawiske, umo wakacitiranga para wakumana na viyezgo, umo wakajilambikira kwa Ciuta, na umo wakacitiranga na ŵantu ŵa mikhaliro yakupambana-pambana. Didimizganipo za ncito iyo Yesu wakacita mu umoyo wake wose. Ndipo pamanyuma pake, usange musambiri wakupanga vyakusanka mu umoyo panji usange wakumana na viyezgo, wazamujifumba kuti: ‘Kasi waŵenge Yesu mpanyi wacita wuli pa nkani iyi? Kasi cakusanka cane cirongorenge kuti nkuwongera ivyo Yesu wali kunicitira?’

Para mukuyowoya nkani pa mpingo, nciweme yayi kuyowoya mwambura kuciska, kughanaghana kuti pakuti ŵabali ŵali kale na cigomezgo mwa Yesu, palije cifukwa cakuti ŵaghanaghanire comene za iye. Ivyo mukuyowoya vizamuŵa vyang’anamuro comene usange nkani yinu yazikika pa cigomezgo. Para mukuyowoya za maungano, yowoyani za ncito iyo Yesu wakugwira nga ni Mutu wa mpingo. Usange mukuyowoya za uteŵeti wa m’munda, yowoyani mzimu uwo Yesu wakarongora apo wakacitanga uteŵeti uwu, ndipo yowoyani mwakupulikikwa makora ivyo Kristu nga ni Fumu wakucita pa kuwunganiska ŵantu mwakuti waŵaponoske na kuŵanjizga mu caru cipya.

Nkhwakuwonekerathu kuti pakukhumbikwira vinandi kuruska kusambira waka vintu vicoko vyakukhwaskana na Yesu. Kuti ŵantu ŵaŵe Ŵakristu ŵakukwana, ŵakwenera kumugomezga na kumutemwa kufumira pasi pa mtima. Citemwa ca mtundu uwu cikutipangiska kuti tiŵe ŵakupulikira. (Yoh. 14:15, 21) Cikovwira ŵantu kuti ŵaŵe ŵakukhora mu cigomezgo panyengo ya suzgo, na kurutilira kwenda mu marwayo gha Kristu kwa umoyo wawo wose. Ndiposo kurongora kuŵa Ŵakristu ŵakukhoma ŵeneawo ‘mbakupandika na kuzikika pa marufura.’ (Efe. 3:17) Kucita ici kukwiziska ucindami kwa Yehova Ciuta, Ŵawiske ŵa Yesu Kristu.

“MAKANI GHAWEME GHENEAGHA GHA UFUMU”

PENEAPO wakayowoyanga za vimanyikwiro vya kuŵapo kwake na vya umaliro wa kaŵiro kaheni aka, Yesu wakayowoyerathu kuti: “Makani ghaweme gheneagha gha Ufumu ghamkupharazgika mu vyaru vyose ghaŵe cipanikizgo ku mitundu yose; penepapo ndipo umaliro uti wizenge.”—Mat. 24:14.

Kasi ni uthenga wuli uwo ukwenera kupharazgika pa caru cose? Ni uthenga wakuyowoya za Ufumu wa Ciuta uwo Yesu wakatisambizga kupempera kwa Ciuta kuti, “Ufumu winu wize.” (Mat. 6:10) Lemba la Civumbuzi 11:15 likurongosora kuti ni ‘Ufumu wa Fumu yithu [Yehova] na wa Kristu wake’ cifukwa mazaza gha kuwusa ghakufumira kwa Yehova ndipo wakughapereka kwa Kristu nga ni Fumu. Ndipouli, manyani kuti uthenga uwo Yesu wakayowoya kuti uzamupharazgika munyengo yithu, ukuruska uwo ŵarondezgi ŵake ŵa mu handiredi lakwamba ŵakapharazganga. Iwo ŵakaphaliranga ŵantu kuti: “Ufumu wa Ciuta waneng’enera.” (Luka 10:9) Yesu mweneuyo ngwakuphakazgika kuŵa Fumu, wakaŵa nawo pamoza. Kweni pa lemba la Mateyu 24:14, Yesu wakayowoyerathu za kupharazgika kwa makani ghaweme kuŵa cirongolero ca kukwaniskika kwa khumbo la Ciuta.

Mprofeti Daniel wakapika mboniwoni yakukhwaskana na kuthandazgika kwa makani ghaweme agha. Iye wakawona “yumoza ngati mwana wa muntu,” Yesu Kristu, wakupokera kufuma kwa “Murara wa Mwaka,” Yehova Ciuta, “kuwusa na ncindi na Ufumu, kuti ŵantu wose, ŵamitundu yose, na mayowoyero ghose ŵamuteŵetere.” (Dan. 7:13, 14) Ici cikacitika kucanya mu cirimika ca 1914. Ndipo pamanyuma pake, Diabolosi na viŵanda vyake ŵakaponyeka pa caru capasi. (Civ. 12:7-10) Kaŵiro kaheni aka ka vintu sono kanjira mu mazuŵa ghaumaliro. Kweni pambere kandafumirepothu, uthenga ukupharazgika pa caru cose kuti Ufumu wa Yehova panyengo yasono ukuwusa kucanya. Kumalo ghalighose ŵantu ŵakuphalirika uthenga uwu. Mazgoro ghawo ghakurongora umo ŵakuwonera Wapacanya-pa-vyose uyo Wakuwusa “mu ufumu wa ŵantu.”—Dan. 4:32.

Mwaunenesko, vintu vinandi vyakujumpa apa vikwaniriskikenge! Ticali kupempera kuti, “Ufumu winu wize,” kweni kuti tikung’anamura kuti kukhazikiskika kwa Ufumu kucitikenge kuntazi cara. Mumalo mwake, tikung’anamura kuti Ufumu wa kucanya uzamurongora nkongono yake kuti ufiske maucimi gha mu malemba gha nga ni Daniel 2:44 na Civumbuzi 21:2-4. Wuzamuzgora caru kuŵa paradiso wakuzura na ŵantu awo ŵakutemwana ndiposo awo ŵakutemwa Ciuta. Para tikupharazga ‘makani ghaweme agha gha Ufumu,’ tikuyowoya ivyo Ufumu uwu uzamucita. Kweni tikuyowoya mwakusimikizga kuti Yehova wali kupereka kale mazaza ghose gha kuwusa kwa Mwana wake. Kasi mukuyowoya mwakusimikizga makani ghaweme agha para mukupharazga za Ufumu?

Kurongosora za Ufumu. Kasi tingakwaniska wuli ncito yithu ya kupharazga Ufumu wa Ciuta? Tingawuska cikondwerero ca ŵantu mwa kwamba cidumbirano pa mitu yakupambana-pambana, kweni mwambura kucedwa tirongore kuti uthenga withu ukuyowoya za Ufumu wa Ciuta.

Cintu cakukhumbikwa comene para tikucita ncito iyi nkupenja na kuŵazga malemba agho ghakuyowoya za Ufumu. Para mukuyowoya za Ufumu, woneseskani kuti awo mukudumbiskana nawo ŵakumanya ico Ufumu ukung’anamura. Pangakhumbikwira vinandi kuruska kuyowoya waka kuti Ufumu wa Ciuta ni boma. Ŵantu ŵanyake cingaŵasuzga kupulikiska kuti cintu cambura kuwoneka cingaŵa boma. Mungadumbiskana nawo mwakugwiriskira ncito ntowa zakupambana-pambana. Mwaciyerezgero, mpepo tikuyiwona yayi, kweni yikucita vintu vinandi ivyo vikukhwaska umoyo withu. Tingamuwona yayi uyo wakapanga mpepo, kweni ncakuwonekerathu kuti wali na nkongono zikuru comene. Baibolo likumuzunura kuti ni “Karonga wakukhalirira swi.” (1 Tim. 1:17) Panji mungayowoya kuti mu vyaru vikuru-vikuru, ŵantu ŵanandi ŵandawuwone msumba ukuru wa mu caru cawo panji kuwonana na pulezidenti. Iwo ŵakuŵazga waka mu manyuzipepala, panji kupulika pa wayilesi. Mwakuyana waka, Baibolo liri mu viyowoyero vyakujumpa 2,200, ndipo likutiphalira za Ufumu wa Ciuta, likutiphaliraso uyo wapika mazaza gha kuwusa ndiposo ivyo Ufumu wa Ciuta ukucita. Gongwe la Mulinda, leneilo likupharazgika mu viyowoyero vinandi kuruska buku lililose lakupharazgika mu nyengo yithu, “Likupharazga Ufumu wa Yehova” nga ni umo pali kulembekera pa peji lake lakwamba.

Kuti movwire ŵantu kuti ŵapulikiske ivyo Ufumu ukung’anamura, mungazunura vintu ivyo iwo ŵangakhumba kuti boma liŵacitire: nga ni kumazga ukavu wawo, kwiziska mtende, kumazga kuswa marango, sanko, kupereka masambiro ghaweme, na umoyo uweme. Rongorani kuti ni Ufumu wa Ciuta pera uwo wuzamucita vintu vyose ivi, mwakukhorweska vyakukhumba vya ŵantu wose.—Sal. 145:16.

Yezgayezgani kupangiska ŵantu kuti ŵadokere kuŵa ŵahaliri ŵa Ufumu, uwo Yesu Kristu ni Fumu Yake. Yowoyani vyakuzizwiska ivyo Yesu wakacita kumanyuma nga ni ukaboni wa ivyo wazamucita kuntazi para wazakaŵa Fumu kucanya. Nyengo zose yowoyani za mikhaliro yiwemi iyo wakarongora. (Mat. 8:2, 3; 11:28-30) Yowoyani kuti wakapereka umoyo wake cifukwa ca ise na kuti pamanyuma pake Ciuta wakamuwuska na kumupa umoyo wambura kufwa kucanya. Kwambira panyengo iyo, iye wakuwusa kucanya nga ni Themba.—Mil. 2:29-35.

Didimizgani fundo yakuti panyengo yasono Ufumu wa Ciuta ukuwusa kucanya. Ndipouli, kumbukirani kuti ŵantu ŵanandi ŵakuwona ukaboni uliwose yayi wakuti uŵakhorweske kuti Ufumu wa Ciuta ukuwusa nadi kucanya. Zomerezgani ici, ndipo fumbani usange ŵakumanya ivyo Yesu Kristu wakayowoya kuti ni vimanyikwiro vya kuŵapo kwake. Yowoyani vimanyikwiro vinyake ivyo viri mu malemba gha Mateyu cipaturo 24, Marko cipaturo 13, panji Luka cipaturo 21. Pamanyuma pake fumbani cifukwa ico kukhara pa cizumbe kwa Kristu kwapangiskira kuti pa caru paŵe mikhaliro yiheni. Ŵazgani lemba la Civumbuzi 12:7-10, 12.

Kuti mumanye cintu cimoza ico Ufumu wa Ciuta ukucita panyengo yasono, ŵazgani lemba la Mateyu 24:14, ndipo rongosorani programu ya kusambizga Baibolo iyo yikucitika pa caru capasi sono. (Yes. 54:13) Phalirani ŵantu za sukulu zakupambana-pambana za kusambizga Baibolo izo Ŵakaboni ŵa Yehova ŵakwandula nazo ndipo zikucitika kwawanangwa. Rongosorani kuti kusazgapo pa uteŵeti withu wa kupharazga ku nyumba na nyumba, tikupereka urongozgi wakufuma mu Baibolo kwawanangwa ku ŵantu na mbumba zawo mu vyaru vyakujumpa 230. Ni boma wuli la ŵantu lingapereka masambiro nga ni agha ku ŵantu awo mbahaliri ŵa Ufumu wake pera cara kweni ku ŵantu wose pa caru cose? Cemani ŵantu kuti ŵafike pa Nyumba ya Ufumu, pa maungano gha dera na gha cigaŵa gha Ŵakaboni ŵa Yehova, mwakuti ŵazakajiwonere ŵekha umo masambiro agha ghasintira umoyo wa ŵantu.—Yes. 2:2-4; 32:1, 17; Yoh. 13:35.

Kweni, kasi mweneko nyumba wazamumanya umo ivi vikukhwaskira umoyo wake? Mukwenera kuyowoya mwaluso kuti khumbo la ulendo winu ndakuti mudumbiskane nayo za mwaŵi uwo wulipo wakuti wasanke umoyo nga ni muhaliri wa Ufumu wa Ciuta. Mwauli? Mwakusambira ivyo Ciuta wakukhumba na kucita mwakukolerana navyo sono ntena.—Dute. 30:19, 20; Civ. 22:17.

Kovwira Ŵanji Kuti Ŵaŵike Ufumu Pamalo Ghakwamba. Nanga pangaŵa pamanyuma pakuti muntu wazomera uthenga wa Ufumu, pakuŵa vyakusanka ivyo iye wakwenera kupanga. Kasi ni pwererero wuli ilo waŵikenge ku Ufumu wa Ciuta mu umoyo wake? Yesu wakakhuŵirizga ŵasambiri ŵake kuti “penjani nanga Ufumu wake.” (Mat. 6:33) Nimwauli umo tingawovwilira Ŵakristu ŵanyithu kuti ŵacite ici? Mwakurongora ciyerezgero ciweme ise taŵene na kudumbiskana nawo za mwaŵi uwo wulipo wa kucita ici. Nyengo zinyake, mwa kufumba muntu munyake usange wali kughanaghanapo za kucita milimo yinyake na kumuphalira vyakukumana navyo vyakukhwaskana na ivyo ŵanji ŵakucita pa nkani iyo. Dumbiskanani nayo Baibolo muntowa iyo yingamupangiska kuti wakuzge citemwa cake pa Yehova. Mungacita ici mwa kudidimizga fundo yakuti Ufumu wa Ciuta ni boma leneko. Kweniso mwa kudidimizgapo pa kuzirwa kwa ncito ya kupharazga Ufumu. Kuti cintu ciweme cicitike, kuti kukukhumbikwira kuphalira waka ŵantu za ico ŵakwenera kucita cara, kweni kuwuska khumbiro lawo lakuti ŵacite cintu ico.

Mwambura kukayikira, uthenga wakuzirwa uwo tose tikwenera kupharazga, comene-comene ukuyowoya za Yehova Ciuta, Yesu Kristu, na Ufumu. Unenesko wakukhwaskana na ivi ukwenera kudidimizgika mu upharazgi withu, pa mpingo, na mu umoyo withu. Usange tikucita nteura, tikurongora kuti tikusanga nadi candulo na Sukulu ya Uteŵeti wa Ciuta.