Lutilirani Kuchita Makora Uteŵeti Winu
1. Kasi mbanjani awo ŵakawovwirika kuti ŵachite makora uteŵeti, ndipo tikusambirako vichi?
1 Ŵakhristu ŵakwenera kulutilira kuchita makora uteŵeti wawo. Lekani Yesu wakalutilira kusambizga ŵasambiri ŵake kuti ŵapharazgenge mwaluso. (Luka 9:1-5; 10:1-11) Kweniso Akwila na Prisila ŵakamutolera pamphepete Apolo na “kumulongosolera makora nthowa ya Chiuta.” (Mil. 18:24-26) Paulosi nayo wakachiska Timote kuti walutilire kulondezga ivyo wakasambira ‘mwakuti wose ŵawone umo wakukulira makora.’ (1 Tim. 4:13-15) Nangauli tingaŵa kuti tapharazga makani ghawemi nyengo yitali, kweni tikwenera kulutilira kusazgirako luso lwithu.
2. Kasi tingasambira wuli ku ŵanji?
2 Sambirani ku Ŵanji: Nthowa yimoza iyo yingawovwira kuti tisambizgenge mwaluso nkhusambira ku ŵanji umo ŵakuchitira. (Zinth. 27:17) Mwantheura tikwenera kutegherezga para munyithu wakupharazga. Kweniso tingafumba masachizgo ku ŵapharazgi ŵaluso, na kutegherezga. (Zinth. 1:5) Kasi mukumanya makora yayi umo mungachitira ulendo wakuwelerako, kwambiska sambiro, panji kupharazga mu nthowa zinyake? Usange vikumusuzgani, fumbani mulaŵiliri wa gulu panji mupharazgi waluso kuti wamovwirani. Kuti tisazgireko luso lwithu, tikwenera kulomba mzimu utuŵa kuti utovwire.—Luka 11:13.
3. Kasi tikwenera kuchita wuli para ŵanji ŵatiphalira umo tingachitira kuti tipharazgenge mwaluso?
3 Para ŵanji ŵatiphalira umo tingachitira kuti tipharazgenge mwaluso, tileke kukwiya. (Muph. 7:9) Nga Apolo, tikwenera kuzomera wovwiri mwakujiyuyura na kuwonga. Para tachita nthena vikulongora kuti ndise ŵamahara.—Zinth. 12:15.
4. Chifukwa wuli Yesu wakati tikwenera kusazgirako luso pakupharazga?
4 Uchindami Ukuluta kwa Chiuta: Yesu wakayowoyanga ntharika pakusambizga, ndipo wakachiska ŵasambiri ŵake kuti ŵalutilire kupharazga mwaluso. Yesu wakajiyelezgera na mpheska ndipo ŵakuphakazgika, nga ni minthavi ya mpheska. Wakayowoya kuti Ŵadada ŵake ŵakuwutozga munthavi uliwose uwo ukupambika vipambi “mwakuti upambike vipambi vinandi.” (Yoh. 15:2) Nga umo mweneko wa munda wakukhumbira kuti mpheska zake zipambikenge chomene, Yehova nayo wakukhumba kuti tifumiske ‘chipambi cha milomo yithu.’ (Heb. 13:15) Yesu wakayowoya uwemi uwo ukuŵapo para tikusazgirako luso pakupharazga. Wakati: ‘Adada ŵakupika uchindami para mukulutilira kupambika vipambi vinandi.’—Yoh. 15:8.