Maliferensi gha “Uteŵeti na Umoyo Wachikhristu—Kabuku ka Maungano”

Maliferensi gha Uteŵeti na Umoyo Wachikhristu—Kabuku ka Maungano

SEPUTEMBALA 2-8

Ivyo Tasambira

it-2-E 111

Yosefe

Zina la Yosefe Likaŵa Lakuchindikika. Pakuwona udindo ukuru uwo Yosefe wakaŵa nawo pakati pa ŵana ŵanalume ŵa Yakhobe, chikaŵa chakwenelera kuti nyengo zinyake zina lake ligwiliskike ntchito pakuzunura mafuko ghose gha Israyeli (Sa 80:1) kweniso mafuko ghose agho ghakaŵa ku ufumu wa kumpoto. (Sa 78:67; Am 5:6, 15; 6:6) Zina lake likusangikaso mu mauchimi gha mu Baibolo. Mu mboniwoni ya uchimi wa Ezekiyeli, Yosefe wakapika vigaŵa viŵiri kuŵa chiharo (Eze 47:13), chimoza mwa vipata vya msumba icho chikamanyikwanga kuti “Yehova Wali Kwenekuko” chikaŵa na zina la Yosefe. (Eze 48:32, 35) Pa nkhani ya kukoleranaso kwa ŵanthu ŵa Yehova, Yosefe wakuyowoyeka kuti ni mulongozgi wa gulu limoza la Ŵaisrayeli apo Yuda wakuyowoyeka kuti ni mulongozgi wa gulu linyake la Ŵaisrayeli. (Eze 37:15-26) Uchimi wa Obadiya ukalongora kuti “nyumba ya Yosefe” yizamovwirapo pa kuparanyika kwa “nyumba ya Esau” (Ob 18), ndipo uchimi wa Zekariya ukalongora kuti Yehova wazamuponoska “nyumba ya Yosefe.” (Zek 10:6) Mwakupambanako na Efurayimu, fuko la Yosefe ndimoza mwa mafuko agho ghakupanga Israyeli wauzimu.—Chiv 7:8.

Pakuti Yosefe wakuzunulika pa Chivumbuzi 7:8 vikulongora kuti uchimi uwo Yakhobe wakayowoya apo wakakhala pachoko kufwa ukeneranga kufiskika pa Israyeli wauzimu. Ntheura, ntchakukondweska kuti Wankhongono wa Yakhobe, Yehova Chiuta, wakapeleka Khristu Yesu kuŵa Muliska Muwemi uyo wakapeleka umoyo wake chifukwa cha “mberere.” (Yoh 10:11-16) Khristu Yesu ni libwe lapakona apo pali kuzengeka tempile la Chiuta lakupangika na Israyeli wauzimu. (Efe 2:20-22; 1Pe 2:4-6) Ndipo Muliska uyu, uyoso ni Libwe, wali na Chiuta Wankhongonozose.—Yoh 1:1-3; Mil 7:56; Heb 10:12; yaniskani na Ge 49:24, 25.

SEPUTEMBALA 9-15

Ivyo Tasambira

it-1-E 816

Mwana Mulanda

Pakuti chikaŵa chipusu kuluwa vyokoro kweniso ŵanthu ŵambura kuvikilirika aŵa, Yehova wakagwiliskira ntchito mazgu ghakuti “mwana mulanda,” kuti walongosore za urunji wa Ŵaisrayeli kweniso ivyo vikachitikanga para ŵaleka kulondezga fundo zaurunji. Apo mtundu wa Ŵaisrayeli ukachitanga makora mwauzimu, ŵana ŵalanda nawo ŵakapwelerekanga. Para mu charu mulije urunji, ŵana ŵalanda ŵakasuzgikanga, ndipo ichi chikaŵanga chimanyikwiro chakuti ŵanthu ŵaleka kulondezga fundo za Yehova. (Sa 82:3; 94:6; Yes 1:17, 23; Yer 7:5-7; 22:3; Eze 22:7; Zek 7:9-11; Mal 3:5) Yehova wakatembanga awo ŵakayuzganga ŵana ŵalanda. (Do 27:19; Yes 10:1, 2) Yehova wakati iyo ni Muwomboli (Zi 23:10, 11), Movwiri (Sa 10:14), na Wiske (Sa 68:5) wa ŵana ŵalanda. Iyo Ndiyo wakweruzga m’malo mwa iwo (Do 10:17, 18), kuŵalongora lusungu (Ho 14:3), kuŵapa wovwiri (Sa 146:9), na kuŵasungilira ŵamoyo.—Yer 49:11.

Chimanyikwiro chimoza cha Ŵakhristu ŵanadi, nkhovwira ŵanthu awo mfumu panji ŵapapi ŵawo ŵali kufwa. Msambiri Yakobe wakalembera Ŵakhristu kuti: “Kusopa kwakutowa na kwambura kufipiskika panthazi pa Chiuta, Dada withu ni uku: kupwelelera ŵalanda na vyokoro mu suzgo yawo, ndiposo kujisungilira wambura kabanga kakufuma ku charu.”—Yak 1:27.

SEPUTEMBALA 16-22

Ivyo Tasambira

it-1-E 1058 ¶5

Mtima

Kuteŵetera na “Mtima Wakufikapo.” Mtima wanadi ukwenera kuŵa wose kuti ugwire makora ntchito, kweni mtima wakuyelezgera ungagaŵikana. Davide wakalomba kuti: “Lungani mtima wane kuti wopenge zina linu,” kulongora kuti mtima wa munthu ungagaŵikana kuyana na ivyo wakutemwa kweniso ivyo wakopa. (Sa 86:11) Munthu wanthena wangaŵa “na mtima wapaŵiri”—wangaŵa wakufunda waka pakusopa Chiuta. (Sa 119:113; Chiv 3:16) Munthu wangaŵaso “na mtima wapaŵiri” (kung’anamura mitima yiŵiri), para wakuyezga kuteŵetera mabwana ghaŵiri, panji kuyowoya chinthu chinyake mwaupusikizgi uku mu mtima muli vinyake. (1Mi 12:33; Sa 12:2, mazgu ghamusi) Yesu wakaŵasuska mwankhongono ŵapusikizgi awo ŵakaŵa na mtima wapaŵiri.—Mt 15:7, 8.

OKUTOBALA 14-20

Ivyo Tasambira

it-2-E 994

Sumu

Mazgu ghakuti “sumu yiphya” ghakusangika mu buku la Masalimo kweniso mu ivyo wakalemba Yesaya na mpositole Yohane. (Sa 33:3; 40:3; 96:1; 98:1; 144:9; 149:1; Yes 42:10; Chiv 5:9; 14:3) Para tasanda mu malo ghanandi umo mukusangika mazgu ghakuti “sumu yiphya” vikulongora kuti sumu iyi yikimbikanga para Yehova wachita chinthu chinyake chiphya icho chikalongoranga mazaza ghake. Nga umo pakuyowoyera pa Salimo 96:10, wamasalimo wakimba mwachimwemwe kuti: “Yehova waŵa themba.” Milimo yiphya ya Yehova yakukhwaskana na kusanuzgika kwa ufumu wake, kuchanya na charu chapasi ndivyo vikupanga mutu wa “sumu yiphya” iyi.—Sa 96:11-13; 98:9; Yes 42:10, 13.

OKUTOBALA 21-27

Ivyo Tasambira

it-2-E 596

Nyangenyange

Para chiyuni cha nyangenyange chakhuta, kanandi chikuduka na kukakhala ku malo ghachekha, chikudukumara kweniso chikuwoneka chachitima ndipo chikunjizga mutu wake mu mapapindo ghake, chikusunkhunyika yayi nakuti para chili patali chingawoneka nga ni libwe lituŵa. Nyengo zinyake chiyuni ichi chikuchita ivi kwa maora ghanandi. Ivi vikukolerana na ivyo wamasalimo wakalemba pakuyowoya umo wakajipulikiranga chifukwa cha chitima icho wakaŵa nacho apo wakalemba kuti: “Nkhuyana na chiyuni cha nyangenyange mu mapopa.” (Sa 102:6) Pa lemba ili, mazgu ghakuti mapopa, ntchipalamba yayi kweni ni malo agho ghali kutali na uko kukukhala ŵanthu panji mu chisapa. Mu myezi yinyake, viyuni vya nyangenyange vikusangika mu visapa vya kumupoto kwa vidika vya Yorodani. Ku Israel kukusangika mitundu yitatu ya nyangenyange. Mtundu uwo ukusangika chomene ni nyangenyange mutuŵa (Pelecanus onocrotalus); apo nyangenyange wamathothomathotho (Pelecanus crispus) kweniso nyangenyange wa mtundu wa pinki (Pelecanus rufescens) ukusangika chomene yayi.

Chiyuni cha nyangenyange chikutemwa chomene ku malo agho ŵakulimako yayi, uko ŵanthu ŵakuleka kufikako. Ku malo ghanthena ndiko chikuzenga vivwimbo na kukonkhomora ŵana ŵake, kweniso kupumulirako para chakora somba. Pakuti chiyuni ichi chikutemwa ku malo ghachekha ku mapopa, mu Baibolo kanandi chikwimira pharanyiko. Pakuyowoya za kuparanyika kwa Edomu, Yesaya wakati ghazamuzgoka malo ghakukhala nyangenyange. (Yes 34:11) Zefaniya wakachima kuti viyuni vya nyangenyange vizamukhala pa ntchindamiro za msumba wa Nineve. Ichi chikulongora kuti msumba uwu uzamuparanyikirathu ndipo kuzamuŵavya ŵanthu.—Zef 2:13, 14.