Ŵanalume ŵa Israyeli ŵakaluta kukendera charu cha Yeriko. Ŵati ŵafika, ŵakakhala ku nyumba ya mwanakazi munyake zina lake Rahabi. Fumu ya ku Yeriko yikati yamanya, yikatuma ŵasilikari ku nyumba ya Rahabi. Rahabi wakabisa ŵanalume aŵa pachanya pa nyumba yake, na kutuma ŵasilikari kuti ŵakawone kunyake. Wakati ku ŵanalume aŵa: ‘Nimovwiraninge chifukwa chakuti nkhumanya kuti Yehova wali namwe, ndipo mupokenge charu ichi. Nilayizgani kuti muzamuniponoska pamoza na banja lakwithu.’

Ŵanalume ŵara ŵakati kwa Rahabi: ‘Tikulayizga kuti palije wa mu banja lakwako uyo wazamupwetekeka.’ Ŵakatiso: ‘Ukakilire chingwe cha uzi uswesi pa windo lako, ndipo ŵa mu banja lakwako ŵazamuponoskeka.’

Rahabi wakafumiska ŵanalume ŵara na chingwe pa windo. Ŵakaluta ku mapiri na kukabisama mazuŵa ghatatu pambere ŵandawelere kwa Joshuwa. Ŵaisrayeli ŵakayambuka dambo la Yorodani na kunozgekera umo ŵangakapokera msumba uwu. Yeriko ukaŵa msumba wakwamba uwo Ŵaisrayeli ŵakapoka. Yehova wakaŵaphalira kuti ŵazingilire msumba wa Yeriko kamoza pa zuŵa. Wakati ŵachite ivi mazuŵa 6. Pa zuŵa la nambara 7, Ŵaisrayeli ŵakazingilira msumba uwu maulendo 7. Ŵasembe ŵakalizga mbata, ndipo ŵasilikari ŵakachemerezga na mazgu ghakuru. M’panda wa msumba uwu ukawa. Kweni nyumba ya Rahabi, iyo yikaŵa pafupi na m’panda, yikawa yayi. Rahabi na banja lakwake ŵakapona chifukwa wakagomezganga Yehova.

Ivyo vikachitika ku Yeriko vikapulikikwa mu vigaŵa vinandi vya ku Kenani. Mafumu ghose gha mu Kenani ghakakolerana kuti gharwe nkhondo na Ŵaisrayeli. Kweni Ŵagibiyoni ŵakaŵa na pulani yinyake. Ŵakavwara malaya ghakukeluka na kuluta kwa Joshuwa, ndipo ŵakamuphalira kuti: ‘Tafuma ku charu chakutali. Tili kupulika vya Yehova na vyose ivyo wakamuchitirani ku Eguputo na ku Mowabu. Tilayizgani kuti mutikomenge yayi, ndipo tiŵenge ŵateŵeti ŵinu.’

Joshuwa wakaŵagomezga ndipo wakaŵalayizga kuti ŵakomekenge yayi. Pakati pajumpha mazuŵa ghatatu, Joshuwa wakamanya kuti ŵanthu aŵa ŵakafuma pafupi waka. Ŵakaŵa ŵamwenemura mu Kenani. Joshuwa wakafumba Ŵagibiyoni kuti: ‘Chifukwa wuli mukatipusika?’ Iwo ŵakazgora kuti: ‘Tikawopanga. Tikumanya kuti Yehova Chiuta winu wakumulwerani nkhondo. Chonde kutikoma yayi.’ Joshuwa wakachita ivyo ŵakapangana ndipo wakaŵakoma yayi.

Pakati pajumpha mazuŵa ghachoko waka, mafumu 5 gha mu Kenani na ŵasilikari ŵawo, ŵakawofya Ŵagibiyoni kuti ŵarwenge nawo nkhondo. Joshuwa na ŵasilikari ŵake ŵakenda usiku wose kuti ŵakaponoske Ŵagibiyoni. Machero ghake, nkhondo yikayamba mulenjilenji. Ŵakenani ŵakayamba kuchimbira chopichopi. Kulikose uko ŵakachimbiliranga, Yehova wakaŵawiskiranga vimalibwe ndipo vikaŵadinyanga. Pamanyuma, Joshuwa wakapempha Yehova kuti wayimiske zuŵa kuti lileke kunjira. Chifukwa wuli wakapempha Yehova kuti wachite chinthu icho chikaŵa kuti chindachitikepo? Chifukwa Joshuwa wakagomezganga chomene Yehova. Ivyo wakapempha vikachitika nadi. Zuŵa likanjira yayi m’paka Ŵaisrayeli ŵakakoma mafumu ghose gha mu Kenani na ŵasilikari ŵawo.