Kuchita Maungano Gha Mpingo Kwizira pa Pulogiramu Yinyake ya pa Kompyuta

Maboma ghanandi kuzingilira charu chose chapasi ghakuzomerezga dankha yayi kuti ŵanthu ŵanandi ŵawunganenge pamoza. Kweniso ghaŵika dango lakuti ŵanthu ŵakhalenge mwakutalikirana na ŵanyawo. Ŵakaboni ŵa Yehova ŵaŵikapo mtima chomene kupulikira ivyo maboma ghali kuyowoya, ndipouli ŵakulutilira kusopa Yehova mwakukolerana. Kuti ŵachite nthena, mipingo yinyake yikugwiliskira ntchito mapulogiramu ghanyake gha pa kompyuta nga ni Zoom, kuti ŵachite maungano.

Kuti nyengo zose tichitenge maungano kweniso kuti paŵe chivikiliro chakukwana, Wupu Wakulongozga ukazomerezga kuti ndalama zinyake izo tikupeleka nga ni vyawanangwa, ŵagulire maakaunti gha Zoom kuti mipingo yinyake yigwiliskirenge ntchito. Ivi vyawovwira chomene mipingo yinyake iyo yikatenge yifiskenge yayi kulipira ndalama zakukwana $15-$20 panji kujumphirapo kuti yichite maungano kwizira pa pulogiramu iyi. Kanandi mipingo iyi yikagwiliskiranga ntchito mapulogiramu ghanyake ghaulere agho ghakuzomerezga ŵanthu ŵachoko waka kujoyina kweniso ghalije chivikiliro chikuru. Kweni pasono vinthu vili makora chifukwa mipingo yose iyo yikugwiliskira ntchito maakaunti gha Zoom agho gulu lili kugura, yikusuzgikaso na nkhani ya chivikiliro yayi kweniso ŵanthu ŵanandi ŵakujoyina ku maungano. Nakuti pasono, mipingo yakujumpha 65,000 mu vyaru vyakujumpha 170, yikugwiliskira ntchito maakaunti agha.

Mpingo wa Kairagi ku Manado, North Sulawesi, Indonesia, ukaleka kugwiliskira ntchito pulogiramu yaulere na kwamba kugwiliskira ntchito akaunti ya Zoom iyo gulu lili kugura. Mubali Hadi Santoso wakulongosora kuti: “Nanga ŵangaŵa ŵabali na ŵadumbu awo ŵakuvimanya makora yayi vya tekinoloje ivi, nawo ŵakukondwa chomene na maungano, chifukwa pasono ŵakukhumbikwiraso kunjira kanandinandi yayi kuti ŵachite makora maungano.”

Lester Jijón, Jr., uyo ni mulara mu mpingo wa Guayacanes Oeste ku Guayaquil, Ecuador, wakuti: “Chifukwa chakuti ŵabali na ŵadumbu ŵanandi mbakavu, vikate viŵenge vyakusuzga kuti mipingo yinyake yifiske kugura layisensi ya akaunti ya Zoom iyo yikovwira kuti mpingo wose ujoyine ku maungano. Sono tikuwonga chomene ivyo gulu lili kuchita pakutigulira akaunti ya Zoom iyo yikovwira kuti ŵanthu ŵanandi ŵajoyine ku maungano. Kweniso pasono tingachemerakoso na ŵanyithu kuti ŵajoyine kwambura kufipa mtima kuti tingafika pa umaliro wa chiŵelengero cha kuŵikika.”

Johnson Mwanza, uyo ni mulara mu mpingo wa Ngwerere North ku Lusaka, Zambia, wakalemba kuti: “Kanandi ŵabali na ŵadumbu ŵanandi ŵakutemwa kuyowoya kuti, ‘ndondomeko ya gulu yakuti tiŵe na akaunti ya Zoom yatovwira kuti tijipulikenge kuti tili pafupi chomene na ŵabali na ŵadumbu ŵithu, kweniso kuti Yehova wakutitemwa na kutipwelelera.’”

Maakaunti agha ghakugulika na ndalama izo zikusungikira ntchito yakovwira para kwachitika masoka. Ndalama izi zikufuma pa vyawanangwa ivyo vikupelekeka kuti viwovwire pa ntchito yithu ya pa charu chose. Vyawanangwa vinandi vikupelekeka kwizira pa donate.jw.org. Tikumuwongani chomene chifukwa cha vyawanangwa ivyo mukupeleka. Vyawanangwa ivi vikovwiraso chomene pa ntchito yakovwira para kwachitika soka iyo yikuchitika pa charu chose.—2 Ŵakorinte 8:14.